ሳጻ 3 - ኦራ ጫ̈ቃ ማጻ̈ፋ

ሳርዴ̈ሳ ዎ ዎ̈ሳ ኬምቦ ሚሺኖ ኪ̈ታ

¹ ሳርዴ̈ሳ ዎ̈ሳ ኬ̈ን ኪ̈ታንቻ̇̈ቦ ዪዝ ጋ̈ር ጻ̈ፋቤ፤ ጾ̈ሳ̇̈ ኣያ̇ና ታብዛንኬ ታብዛ ቤ̈ርሳን ፌ ኩሽታ̇ ኤ̈ኖ ሶ̈ሊኖ ሶ̈ላ፤ ኔ ኦ̈ሲን ቴ ኤራ̈ሬ፤ ሱ̈ምቦ ኔ̈ኒ ሜላ̇ ሼምፓ ዎ ጌዪንታ̇̈ርዶኬ ኔ̈ኒ ዓይቂ̇ኔ።

² ባርካ̇ቤ! ዓይቃ̇ንዳብ ዬ̈ሊ̇ኖን ኔ̈ብ ጊላ̇ ኣቲ̇ኖ ዎልቂን ያካ̇ይዶን ኢዞ ሚ̈ንቤ፤ ኔ ኦ̈ሲንዳ ቴ ጾ̈ሳ̇̈ ቲ̈ን ማ̈ዛ ኢዝ ጋልዳ ባዮ̇ ማ̈ቃ̇ር ታ̈ብ ቤንታ̇ካዬ።

³ ዪዚ ኔ̈ ኤኪ̇ኖንዲኬ ታማ̈ሪኖ ቲሚርቲ̇ንዶ ቦቲጛፔ፤ ኢዝቦ ኪ̈ቲንታ̇ቤ፤ ማ ማ̈ሪቲ ጌላቤ፤ ኔ̈ኒ ባርካካ̇ይ ኣቴ̇ጌይን ታ̈ኒ ሶላፌ̈ን ኔ ቆፓካ̇ይዶን ኔ̈ክ ዬ̈ሬ፥ ታ̈ኒ ኣ ሳኣ̈ታ ጋልዳ ዬ̈ርኮ ኔ ኤራባሴ።

⁴ ዎቲናካር ናጋራባር ፌ̈ና ኢ̈ሳ̇ካ̇ዮ ሙቃ̇ ኣሳን ሳርዴ̈ሳ ጋርታ̇ ኔባር ዎ፤ ኢንቲ ቦ̈ርስ ኣፊላ ማኣሪ ታባር ዬንዳቦ ቤይሲ̈ሬ።

⁵ ጋሚዝ ኣሲ ኢንታ̇ፌ̈ን ቦርስ ኣፊላ ማኢ̈ሬ፤ ታ̈ኒ ኢ ቴዪ ማ̈ቂ̇ኖን ታ ባ̈ባብኬ ኢ ኪ̈ታንቻን ቲ̈ን ኤርሳንዳ፤ ሜናብ ሼምፓባር ዶኢዝ ኣሳን ሱምን ጻ̈ፊንታ̇ዝ ማጻ̈ፊን ጋልዳፓሬ ኢ ሱምን ቁቻ̇ ይሳንዳባዬ̇።

⁶ ጌ̈ሻ̇ ኣያ̇ና̈ዲ ዎ̈ሳ ኬ̈ንቦ ሶ̈ላዝ ባዚንዶ ዋይ ዎ ኣሲ ሲስካ̇ጋ̈ቤ!

ፊላ̈ዴልፋ ዎ ዎ̈ሳ ኬ̈ምቦ ሚሺኖ ኪ̈ታ

⁷ ፊላ̈ዴልፋ ዎ̈ሳ ኬ̈ን ኪ̈ታንቻ̇̈ቦ ዪዝ ጋ̈ር ጻ̈ፋቤ፤ ጌ̈ሽ̇ኬ ኪን ማ̈ቂ̇ኖ፥ ዳዊታ ቁልፊን ፌ ኩሽታ̇ ኤ̈ኖ̈ዲ ሶ̈ሊኖ ሶ̈ላ፦ ኢ ፊርቂኖን ኦ̈ናካር ዪብጺ̇ባ̈ሴ፤ ኢ ዪብጺ̇ኖንዳር ኦ̈ናካር ፊርቂ̇ባሴ።

⁸ ቴ ኔ ኦ̈ሲን ኤራ̈ሬ፤ ቤቃቤ! ኦ̈ናካር ዪብጻ̇ንዳብ ዳንዳኢባ̈ሶ ፊርቂቲ̇ኖ ካራ ኔ ቲ̈ን ጋዲ̇ኔ፤ ኔ ዎልቂን ጊላ̇ ማ̈ቂ̇ኖን ቴ ኤራ̈ሬ፤ ማ̈ቂ̇ናካሬ ኔ̈ኒ ታ ቃ̈ሊን ና̈ጊኔ፤ ታ̈ና ካ̈ዳካ̇ዬ።

⁹ ዪዚ ኣይሁድ ባዪዶሪ ፌ̈ና ኣይሁዴ ጌዪዛን ዪን ሴ̈ጣናባር ማ̈ባራ ማ̈ቃ̇ር ዎን ማቃ ማቂ̇ዛን ዬ̈ሪ ኔ ቶሂን ጋልዳ ኬዳ̇ምፔ̈ንኬ፤ ማ ታ̈ናሬ ኔ̈ና ካኖን ኢንቲ̇ ኤራምፔ̈ን ዎታንዳ።

¹⁰ ኔ̈ኒ ጋርዢዝ ኣስ ማ̈ቃ̇ቤ ጋ̈ራ ቴ ኔ̈ብ ሶ̈ሊኖ ታ ቃ̈ሊን ና̈ጊኖኮታቦ ታ̈ናሬ ሳ̈ዝ ጋልዳ ዶኢዛን ፋታ̇ናንዳቦ ኣላሚን ዎይን ጋልዳ ዬ̈ዝ ሜታ ኬሊ̇ን ጋልዳፖ ቴ ኔ̈ና ና̈ጋንዳ።

¹¹ ዪዚ ቴ ኤሊ̇ባር ዬ̈ንዳ፤ ኔ ኣኪሊሊን ኦ̈ናካር ኔ ጋልዳ̇ፖ ኤካካ̇ዮ̈ዲፌ̈ን ኔ̈ብ ዎን ሚ̈ንር ኤ̈ቤ።

¹² ጋሚኖ ና̈ሳ̈ዳ ቴ ጾ̈ሳ̇ ኬ̈ ጋርታ ኢያ ቱ̈ሳፌ̈ን ማሃንዳ፤ ኢናፖ ኢ ኣባካር ጌይን ኬስኪ̇ባ̈ሴ፤ ቴ ጾ̈ሳ̇̈ ሱምንዲኬ ቴ ጾ̈ሳ̇̈̇ ካታሚን ሱምን ኢ ጋልዳ ጻ̈ፋንዳ፤ ዪና̇ ካታሚንዳ ኣፋ ቴ ጾ̈ሳ̇̈ ቲ̈ናፖ ሶባዚን ኦራን ዬሩሳ̈ላሞ፤ ታ ሱምን ኦራንዳር ኢ ጋልዳ ጻ̈ፋንዳ።

¹³ ጌ̈ሻ̇ ኣያ̇ና̈ዲ ዎ̈ሳ ኬ̈ንቦ ሶ̈ላዝ ባዚንዶ ዋይ ዎ ኣሲ ሲስካ̇ጋ̈ቤ!

ሎ̈ዶቃ ዎ ዎ̈ሳ ኬ̈ንቦ ሚሺኖ ኪ̈ታ

¹⁴ ሎ̈ዶቃ ዎ̈ሳ ኬ̈ን ኪታንቻ̇̈ቦ ዪዝ ጋ̈ር ጻ̈ፋቤ፦ “ኣሚንኤ ማ̈ቂ̇ኖ፥ ኪንኬ ኣማ̇ኒንቲኖ ማርካ̇፥ ጾ̈ሲ̈ ኮቺ̇ኖ ባዝ ዎይቦ ላ̈ ማ̈ቂ̇ኖ ሶ̈ሊኖ ሶ̈ላ፦

¹⁵ ቴ ኔ ኦ̈ሲን ኤራ̈ሬ፤ ኔ̈ኒ ዛ̈ክ ዎይ ሶ̈ል ጊዳካ̇ዬ፤ ኔ ዛ̈ክ ዎይ ሶ̈ል ማ̈ቂ̇ኖኮ ዎን ኮሽዶን!

¹⁶ ኔ̈ኒ ዛ̈ክ ዎይ ሶ̈ል ጊዳካይ ሜላ̇ ባልቅ ባልቅ ጌይኖኮታ̇ቦ ቴ ኖ̈ኒን ጋርታ̇ፖ ጩታ̇ንዳብ ዎታ̈ሬ፤

¹⁷ ኔኒ ‘ቴ ዱሬ፤ ዎይሊን ቆሊን ታ̈ብ ዎ̈፤ ታ̈ብ ዲሪጚኖ ባዚ ኣባካር ባዬ’ ጋ̈ሬ፤ ዎቲናካሬ ኔ̈ኒ ማንቂስ ማ̈ቂ̇ኖን፤ ዎርባያ ማ̈ቂኖን፤ ኣ̈ፊ ዎብ̇ ማ̈ቂ̇ኖንዲኬ ካላ̇ ማ̈ቂ̇ኖን ኔ̈ብ ኤሪንታ̇ባሴ።

¹⁸ ኔ̈ኒ ዱር ማ̈ቃ̇ንዳብ ኮያዶኮ ታማ ጋርታ ጌላር ኬስኪ̇ኖ ዎርቂን ታ ጋልዳፖ ዎጛንዳቦ፥ ጾ̈ሲ ኮቺ̇ኖ ካሊ̇ን ካጛንዳቦ፥ ቦ̈ርስ ኣፊላ ማኣንዳቦ፥ ኔ ኣ̈ፊንዳር ቤቃ̇ንዳ̇ብ ዳንዳኣምፔ̈ን ኣ̈ፋ ጋ̈ላ ታ ጋልዳፖ ዎጛራ ኔ ኣ̈ፊን ዲርካ̇ምፔ̈ን ቴ ኔ̈ና ዞራ̈ሬ።

¹⁹ ታ̈ኒ ቴ ዶሲዝ ናኣን ዎይ ጎይላ̈ሬ፤ ዓጋ̇̈ሬ፤ ዪ̈ኮታ̇ቦ ኔ̈ኒ ሚ̈ጛቤ፥ ማ̈ሪቲ ጌላቤ።

²⁰ ዪዚ ቤቃ̇ቤ! ታ̈ኒ ካራ ጋልዳ ኤቃ̇ራ ካሪን ቆንካ̈ሬ፤ ኦ̈ናካር ቴ ቆ̈ን ሲስካ̇ር ካሪን ታ̈ብ ፊርቄጌይን ቴ ኢ̈ክ ጌላ̈ራ ኢባር ዎልኣ ፊሽ ሞ̈ሬ፤ ኢያር ታባር ሙይሬ፤

²¹ ታ̈ኒ ታ ጻላ̈ታን ጋማራ ታ ባ̈ባ̈ባር ዎልኣ ዶኢኖንዲፌ̈ኒ ጋሚኖ ኣሲ ቴ ዙፋ̈ኒን ጋልዳ ቴባር ዎልኣ ዶ̈ኣምፔን ዎታንዳ።

²² ጌ̈ሻ̇ ኣያ̇ና̈ዲ ዎ̈ሳ ኬ̈ንስቦ ሶ̈ላዝ ባዚንዶ ዋ̈ይ ዎ̈ ኣሲ ሲስካ̇ጋ̈ቤ።”