ማ̈ርቆ̈ሳ 8 - ኦራ ጫ̈ቃ ማጻ̈ፋ

ዬሱ̈ሲ ኦይዲ ሙኩላ ኣስ ፊ̈ሺ ሙሲዴ

¹ ዪና̇ ኢዝ ኬሊ̇ንባራ ዎይሊን ዎርዦ ኢ̈ክ ማ̈ቃር ሺ̈ቂዴ፤ ኢንታ̇ብ ሙይዝ ባዝ ባዮ̇ኮታ̇ቦ ዬሱ̈ሲ ፌ ታማ̈ራን ጼይጋር ኢንታ̇ኮ፥

² “ኣሳን ዓን ታባር ዓይዚ̇ ቃም ዶኢኔ። ኢንቲ̇ ሙይዝ ባዚ ባዮ̇ ኮታ̈ቦ ኢንታባዚን ታ̈ና ዎይሊን ሚቻ̇ዴ።

³ ዓና̇ ጋፍሲንቲ̇ኖንዲፌ̈ኒ ቴ ኢንታ ኣ̈ል ሚሼ̈ጌይንዶ ኢንታ ጋርታ̇ፖ̇ ፔታ̇ን ፔታ̇ናን ጎት ቤሳ̇ፖ̇ ዬይኖኮታ̇ቦ ዳ̈ቡራር ጎይምጋል ኬዲዝዳ” ጌይዴ።

⁴ ኢ ታማ̈ራን ኢ̈ኮ “ኣሲ ባዮ̇ ቤሳ̇ ዓ ጋርታ ዓ ዎይ ዎርዣ̈ብ ጊዲዝ ፊ̈ሺ ዎይዲፖ ቤንቲ̇̈ራ?” ጌይዴ።

⁵ ዬሱ̈ሳር “ኣ̈ፊን ሶ̈ላ̇ ዪንታ̇ክ ዎ?” ጋ̈ር ኦይጪ̇ን፥ ኢንታ̇ር “ታብዛ ሶ̈ላ̇ ሙታ̇ ኑ̈ክ ዎ” ጌይዴ።

⁶ ኢያሬ ዎርዣ̈ኮ “ዪንቲ̇ ሳ̈ዳ ዶኢብቴ̇” ጋ̈ሪ ታብዛ ሶ̈ሊ̇ን ኤካ̇ር ጾ̈ሳ̇̇ ጋላቲኖ̈ፖ ዓኒ ዳርሲ̇ ዳርሳ̇ሪ ዎርዣ ዎይ ዬልምፔ̈ኒ ፌ ታማ̈ራንቦ ኢሚ̇ዴ፤ ኢንታ̇ሬ ዎይ̈ን ዬልዴ።

⁷ ኢሺት̇ ሞላሬ ሙቃ̇ ዎዶ̈ን ዪና ኢዝቦ ጾ̈ሳ̇̇ ጋላታሪ ዎርዣ ዬልምፔ̈ኒ ፌ ታማ̈ራን ኪ̈ቲ̇ዴ።

⁸ ዎርዣ ዎይ ሙዪ ሚሽኪ̇ዴ። ኢናፖ̇ ኢንቲ̇ ሙይን ሺኖ ዶካ̇ ታብዛ ሌ̈ማታ ኩም ሺ̈ሺ ዲንዴ።

⁹ ሙይኖ ኣሳንር ኦይዲ̇ ሙኩላ ማ̈ቂሬ። ዬሱ̈ሲ ዎርዣ ሚሺኖፖ ዓኒ፥

¹⁰ ፌ ታማ̈ራንባር ዎል ማ̈ቃ̇ር ጎጛባር ዳልማኑ̈ታ ጌይዝ ቤስ̇ ሉኪ̇ዴ።

¹¹ ፋራሳ̈ዋን ዬሱ̈ሳክ ዬ̈ሪ ኢባር ፋላማ ኤ̈̇ዴ። ኢያ ፋ̈ጫ̇ንዳብ ኮያሪ “ኣፋፖ̇ ማላ̇ ኑ̈ና ቤይሳቤ” ጋ̈ር ኦይጪ̇ዴ።

¹² ዬሱ̈ሳር ፌ ቡ̈ዳባር ዎይሊን ሹ̈ናሪ “ዓታ̇ባሮ ኣሳ̈ዲ ማላ̇ ቤቃ̇ንዳብ ኣባብ ኮዪ̈ራ? ቴ ዪንታ̇ብ ኪን ሶ̈ላሬ፥ ዪ̈ፌ̈ኖ ባዝ ኣባካር ዪንታ̇ብ ኦ̈ንቲባ̈ሴ” ጌይዴ።

¹³ ኢናፖ̇ ኢንታ ኣሻ̇ሪ ጎጛ ጋርታ̇ ጌላሪ ጌዳ ፊ̈ን ፊ̈ጚዴ።

ዬሱ̈ሲ “ፋራሳ̈ዋን ታማ̈ርሲዝ ቲሚርቲ̇ን ጋልዳ̇ፖ̇ ዪንታ̇ ና̈ጊብቴ” ጌይዴ

¹⁴ ዬሱ̈ሳ ታማ̈ራን ሶ̈ላ̇ ኤ̈ካ̇ይ ቦቲጚኖኮታ̇ቦ ጎጚን ጋርታ ፔቲ̇ ሶ̈ላ̇ ሙታ̇ ዎዶኬ ሜላ ኣባካር ባዬ̇።

¹⁵ ዬሱ̈ሲ ኢንታኮ “ፋራሳ̈ዋንፕኬ ሄሮዶ̈ስ ኢርሺን ጋልዳፖ̇ ዪንቲ̇ ና̈ጊንቲ̇ብቴ” ጋ̈ሪ ኪ̈ቲ̇ዴ።

¹⁶ ኢንታ̇ሬ “ዪና̇ ኢ ጌይኖንዳ ኑ ሶ̈ላ̇ ኤ̈ካ̇ዮኮታ̇ቤ̇ ኣባብ ዶ̈ኔ?” ዪዝ ጋ̈ር ዎልዎልኣ ሶ̈ሊንቲዴ።

¹⁷ ዬሱ̈ሲ ኢንቲ ቆፒ̇ኖን ኤራሪ ኢንታኮ “ዪንቲ ‘ኑ ሶ̈ላ̇ ኤ̈ካ̇ዮ ኮታ̇’ ጋ̈ሪ ዎልዎልኣ ኣባብ ሶ̈ሊራ? ዪንታ̇ብ ዓታ̇ር ኣባካር ጌላካ̇ዮ ኣሳ? ዪንታ̇ ቡ̈ዳ ዓታ̇ር ፊርቂ̇ንታካ̇? ጌይዴ።

¹⁸ ኣ̈ፊ ዪንታ̇ብ ዎ፥ ቤቂ̇ ዲጚባ̈ሳ? ዋይ ዪንታ̇ብ ዎ፥ ሲስኪባ̈ሳ? ዪንታ̇ብ ዎዛ̈ርታ̇ር ኤልቅ ጋ̈ባሳ?

¹⁹ ታ̈ኒ ኢሺ̇ን ሶ̈ሊ̇ን ኢሺ̇ን ሙኩላ ኣሳብ ዳርሳ̇ር ኢሚ̇ን ኢንቲ ሙይን ሺኖ ኣ̈ፊን ሌ̈ማታ ኩም ዲንቴ?” ጋ̈ር ኦይጪ̇ን፥ ኢንታሬ “ታጶ̇ ናምኢ ሌ̈ማታ ኩም” ጌይዴ።

²⁰ “ዪና̇ ኢዝፌ̈ኒ ታብዛ ሶ̈ሊ̇ን ኦይዲ̇ ሙኩላ ኣሳብ ዳርሳ̇ር ኢሚ̇ን ኢንቲ ሙይን ሺኖ ኣ̈ፊን ሌ̈ማታ ዲንቴ?” ጋ̈ር ኦይጪ̇ን ኢንታሬ “ታብዛ ሌ̈ማታ ኩም” ጌይዴ።

²¹ ኢያሬ “ዓት ዪዲኮ ዪና̇ ዪንታ̇ብ ኣባብ ኤልቅ ጋ̈ካ̇ይ ኣታ̇?” ጌይዴ።

ዬሱ̈ሲ ቤ̈ቴሳይዳ ኣ̈ፊ ዎቢ̇ኖ ፔቲ̇ ኣስ ፋዴ

²² ዬሱ̈ሳኬ ኢ ታማ̈ራንኬ ዎልኣ ቤ̈ቴሳይዳ ጋዝ ቤሲ̇ን ዬይኖፖ ዓኒ ኣሳን ኣ̈ፊ ዎቢ̇ኖ ፔቲ̇ ኣስ ዬሱ̈ሳክ ኤሄ̈ሪ ፋምፔ̈ን ኢያ ጌሺዴ።

²³ ኢያሬ ና̈ሳ ኣ̈ፍ ዎባ̇ ኩሺን ኤ̈̇ሪ ኢ ዎ ቤሲ̇ምፖ̇ ቡጊድ ኢያ ኬሳ̇ሪ፥ ኢ ኣ̈ፋን ጋልዳ ጩቲ̇ኖፖ̇ ዓኒ ፌ ኩሺን ኢ ጋልዳ ጋዳ̇ሪ “ዓት ኔ ኣ̈ፊን ኣባክ ቤቂ̇ ዲጛ̈ራ?” ጋ̈ር ኦይጪ̇ን፥

²⁴ ኢያር ሾክ ጋር ቤቃ̇ሪ “ኣ̈፥ ኣሲ ዬዛ ታ̈ብ ቤንቲ̇̈ርዶ̈ኒ፥ ሚ ኤንኢዛ̈ዲፌ̈ን ማይጻር ታ̈ብ ቤንቲ̇̈ሬ” ጌይዴ።

²⁵ ዬሱ̈ሲ ዓታ̇ር ናምኢ ፌ ኩሺን ና̈ሳ ኣ̈ፋን ጋልዳ ጋዲ̇ን ዪና̇ ኢዝባራ ኢ ኣ̈ፊን ፋጺን ጎት ዎ ባዛር ዎይ ኮሺንቺ̇ ቤቃ̇ንዳብ ዳንዳኢዴ።

²⁶ ኢናፖ̇ ዬሱ̈ሲ ናሳ̈ኮ “ዎዳ ኔ ዎ ቤሲ̇ን ማ̈ቃ̇ ሉካፔ፥ ኢናሬ [ኦ̈ባክ ኣባካር ሶ̈ላፔ̇]” ዪዝ ጋር ኢያ ኣ̈ል ሚሺዴ።

ዬሱ̈ሲ ክርስቶ̈ሳ ማ̈ቂኖን ጴ̈ጥሮ̈ሲ ሶ̈ሊዴ

²⁷ ዬሱ̈ሲ ፌ ታማ̈ራንባር ዎል ማ̈ቃ̇ሪ ፊልጶ̈ስ ቂሳ̈ራ ጌይዝ ቤስ̇ ቡጊድ ዎ ቤሳ̇ን ጋርታ̇ ሉኪ̇̈ርዶ̈ር ጎይምጋልዳ “ኣሳ ታ̈ና ኦ̈ና ጌይራ?” ጋ̈ሪ ፌ ታማ̈ራን ኦይጪ̇ዴ።

²⁸ ኢንታ̇ሬ “ፔታ̇ን ፔታ̇ናን፥ ጻማ̇ቂዛ ዋ̈ኒ̇ሳ ጌይሬ፤ ሜላን ኤ̈ላ̈ሳ ጌይሬ፤ ዶካ̇ን ናባን ጋርታ̇ፖ ፔታ̇ና̈ዳ ጌይሬ” ዪዝ ጋ̈ር ማሂዴ።

²⁹ “ዓት ዪዶኮ ዪንቲ ታ̈ና ኦ̈ና ጌይራ” ጋ̈ር ኦይጪ̇ን፥ ጴ̈ጥሮ̈ሲ ኢ̈ኮ “ኔ̈ኒ ክርስቶ̈ሳ” ጌይዴ።

³⁰ ዬሱ̈ሳር ኢንታኮ “ዪኖ̇ ኦ̈ባካር ሶ̈ላፒ̇ቴ” ጋ̈ር ኪ̈ቲዴ።

ዬሱ̈ሲ ፌ ዓይቃ̇ዚን ቲ̈ኒታር ሶ̈ሊዴ

³¹ ዬሱ̈ሲ ፌ ታማ̈ራንኮ “ጋዳ ጪጛሻን፣ ቄ̈ሳ ኣላቃንኬ ሙ̈ሳ ሂጋ̇ ታማ̈ርሲዛን ታ̈ና ኣሳ ናኣ ዎይሊን ሌቂ̇̈ሬ፥ ማ ዎ̈ሬ። ማ̈ቂ̇ናካሬ ታ̈ኒ ዓይዚ̇ ቃምባራ ዓይቃ ጋርታ̇ፖ̇ ዲንዳ̈ሬ” ጋ̈ር ታማ̈ርሲዴ።

³² ኢ ዪና̇ ኢንታ̇ብ ፋል̇ ሶ̈ሊን፥ ጴ̈ጥሮ̈ሲ ጌዳ ዱማ ኢያ ኤ̈ጛሪ “ኔ ዎሃ ዪፌ̈ኖ ባዝ ሶ̈ላ̈ፔ̇” ዪዝ ጌዪ ኢያ ጎይሊዴ።

³³ ዬሱ̈ሲ ጋስ ቢሪንቲ̇ ፌ ታማ̈ራን ቤቂ̇ ሙታ̇ዶ̈ር ጴ̈ጥሮ̈ሳክ ጋ̈ሪ “ኣን ዓ̈ ሴ̈ጣና! ኔ ታ ላፋፖ̇ ፋካ̇ቤ፤ ኔ̈ኒ ኣሲ ቆፒ̇ዛ̈ዲፌ̈ንዶኬ ጾ̈ሳ̇̇ ቆፒ̇ዛ̈ዲፌ̈ን ቆፓ̇ባሴ” ዪዝ ጋ̈ር ኢያ ቆዲ̇ዴ።

³⁴ ኢናፖ̇ ዓኒ ዬሱ̈ሲ ዎርዣ̈ዳኬ ፌ ታማ̈ራን ጼይጋሪ “ቴ ዎሂን ዬ̇ንዳብ ኮዪዝ ኣሲ ፌ ቆማ̇ብ ቆፓ̇ዚን ኣሾ̇ጋ̈ቤ፤ ፌ ማስቃ̇ሊን ቶ̈ካ̇ር ቴ ዎሂን ዬ̇ጋ̈ቤ።

³⁵ ፌ ሼምፒ̇ን ጋዳ̇ንዳ̇ብ ኮዪዝ ኣሲ፥ ኢዞ ይሲ̇̈ሬ፤ ቴ ጊሻ̇ብኬ ዎጛላ ጊሻብ ጋ̈ሪ ፌ ሼምፒ̇ን ኣ̈ ኢሚ̇ዛ̈ዲ ፌ̈ና ፋ̈ሬ።

³⁶ ኣሲ ኣላማ ጋልዶ ቆሊን ዎይ ዲጛር ዱሪታሪ፥ ኢ ሼምፒ̇ን ዬ̈ጌንዶ ኢያ ኣ ማ̈ዳ̇̈ራ?

³⁷ ኣሲ ፌ ሼምፒን ቤስ̇ ማ̈ቂዝ ባዝ ኣብዝ ጪጋ̇ንዳ̇ብ ዳንዳኢ̈ራ?

³⁸ ዓ ጾ̈ሳ̇̇ ጎይን ዬ̇ንዳ̇ብ ኮዪባ̈ሶ፥ ናጋራንቻ̇ ዓቶ̇ ኣሳ ቲ̈ን ታ ሱ̈ምን ጼይጊ̈ንታምባርኬ ታ ቃ̈ሊን ሶ̈ሊንታምባራ ዬ̈ልቂዝ ኣሲ ዎይ፥ ታ ኣሳ ናኣ̈ዲ ታ ባ̈ባ ቦንቻ̇ ባርኬ፥ ጌ̈ሻ ኪ̈ታንቻንባር ዬ̈ርዶ̈ር ቴ ኢያ ቤቃ̇ር ዬ̈ልቃ̇̈ሬ!” ጌይዴ።