ማ̈ርቆ̈ሳ 16 - ኦራ ጫ̈ቃ ማጻ̈ፋ

ዬሱ̈ሲ ዓይቃ ጋርታ̇ፖ̇ ዲንዲዴ

¹ ሳምባታ ኣ̈̇ኖፖ̇ ዓኒ ማ̈ራማ ማግዳሎ̈ንዶ፣ ዓይቆ̈ባ ኢንዲን ማ̈ራሚኬ ሳሎ̈ሞ ዎል ማ̈ቃ̇ሪ ዬሱ̈ሳ ኣሂን ቆቲሳንዳብ ጋ̈ሪ ሺታ̇ ዎጚዴ።

² ዎጊ̇ ጋላስ ጌ̈ሽ ጌላፋ ቦይና ቢርት ኬስካ̇ምባራ ዬሱ̈ሳ ዱ̈ፊንኮ̇ ሉኪ̇̈ርዶ̈ር ጎይምጋልዳ፥

³ “ዱ̈ፊን ካሪን ጋልዶ ሹቺ̇ን ኦ ኑ̈ብ ፊሪሲ ፋይ̈ራ?” ጌዪ ዎልዎልኣ ሶ̈ሊንቲ̇ሙታ̇ ሉኪ̇ዴ።

⁴ ኢናፖ̇ ኢንቲ̇ ሾክ ጋር ቤቃ̇ዚምባራ ሹቻ̇ ጴቻ̇ ፊራር ፋኪ̇ንዶ̈ን ቤቂ̇ዴ።

⁵ ዶ̈ቺ̇ን ጋርታ ጌሊኖንዲፌ̈ኒ ፔቲ̇ ኣስ ናኢቲዶ̈ር ቦ̈ርስ ኣፊላ ማኣር ኡሻች ጎይ ዶኢንዶ̈ን ቤቃ̇ር ባቂቲዴ።

⁶ ና̈ሳ ኢንታ̇ኮ “ባቂታፒ̇ቴ፤ ዪንቲ ሶቲንቲ̇ኖ ና̈ዝሬ̈ት ዬሱ̈ሳ ኮያዚን ቴ ኤራ̈ሬ፤ ኢ ዓይቃ ጋርታ̇ፖ̇ ዲንዲ̇ኔ፤ ዓይዲ ባዬ̇፤ ኢያ ዱ̈ኪ̇ኖ ቤሲ̇ን ዓኒ̇ሼ ቤቂ̇ብቴ።

⁷ ዪንቲ̇ ዓት ሉካ̇ሪ ኢ ታማ̈ራንብኬ ጴ̈ጥሮ̈ሳቦ ‘ዓኒፖ̇ ቲ̈ን ዬሱ̈ሲ ዪንታ̇ብ ሶ̈ሊኖንዲፌ̈ኒ ዪንታ̇ፖ̇ ቲ̈ኒታር ጋሊላ ሉኪ̇ሬ፤ ኢና ዪንቲ ኢያ ዲጚ̈ሬ ጋ̈ር ሶ̈ሊብቴ’ ” ጌይዴ።

⁸ ማጫ̇ን ኢ̈ችባራ ጋንዲ̇ ሙታ̇ዶ̈ሪ ዶ̈ቺ̇ን ጋርታፖ̇ ዎጺ̇ ኬስኪ̇ዴ። ኢንቲ̇ ዎይሊን ኢ̈ጪ̇ኖኮታ̇ቦ ኦ̈ባካር ኣባክ ሶ̈ላካ̇ይ ኣቲ̇ዴ። [

⁹ ዬሱ̈ሲ ዎጊ̇ ጋላስ ጌ̈ሽ ጌላፋ ዓይቃ ጋርታ̇ፖ ዲንዲኖፖ̇ ዓኒ፥ ታብዛ ኢ̈ታ ኣያ̇ና ኢዝ ጋልዳፖ ኬሲ̇ኖን ማ̈ራማ ማግዳሎ̈ምቦ ቤንቲ̇ዴ።

¹⁰ ኢዛ ሉካ̇ራ ሙርሚ̇፥ ዬ̈ኪ̇ ሙታ̇ ዎን ዬሱ̈ሳ ታማ̈ራንቦ ኢ ዓይቃ ጋርታ̇ፖ̇ ዲንዲኖንዲኬ ኢዝቦ ቤንቲ̇ኖንዶ ኢንታብ ሶ̈ሊን፥

¹¹ ኢንቲ ኢዛ ጌይኖን ኪን ጋ̈ካ̇ይ ኣቲ̇ዴ።

¹² ኢናፖ̇ ዓኒ ዬሱ̈ሳ ታማ̈ራን ጋርታፖ̇ ናምኣን ጋጻራ ጎይ ሉካ̇ምባራ ዬሱ̈ሲ ሜላ ኣስ ማይጻር ኢንታ̇ብ ቤንቲ̇ዴ።

¹³ ኢንታ̇ሬ ኢናፖ̇ ማ̈ቃ̇ሪ ፌ ቤቂ̇ኖን ኣቲ̇ኖ ታማ̈ራንብ ሶ̈ሊን፥ ዪንር ሶ̈ሊኖን ኪን ጋካ̇ይ ኣቲ̇ዴ።

¹⁴ ኢናፖ̇ ዓኒ ዬሱ̈ሳ ታማ̈ራን ጋርታ̇ፖ̇ ታጶ̇ ፔታ̇ናን ቡና ኡሽካ̇ንዳቦ ዎልኣ ዶኢንዶ̈ን ኢንታብ ቤንቲ̇ዴ። ኣሳን “ዬሱ̈ሲ ዓይቃ ጋርታ̇ፖ̇ ዲንዲኔ፥ ኑ̈ናር ኢያ ኑ ኣ̈ፍባር ቤቂ̇ኔ” ዪዝ ጌዪ ኢንታ̇ብ ሶ̈ሊኖን ኢንቲ ኪን ጋ̈ካ̇ይ ኣቲ̇ኖኮታ̇ብኬ ኢንታ ቡ̈ዳ ዛቢኖ̈ቦ ዬሱ̈ሲ ኢንታ ቦሪዴ።

¹⁵ ኢናፖ̇ ኢንታ ኪ̈ቲ̇ርዶ̈ሪ “ሳ̈ዝ ኤ̈ሻ̇ ዎይ ጋልዳ ሉኪ̇ብቴ፤ ዎጛሊንዶ ኣሳ ዎይ̈ቦ ሶ̈ሊብቴ፥

¹⁶ ኣማ̇ናር ጻማ̇ቂንቲኖ ኣስ ፋጺ̈ሬ፤ ኣማ̇ኒባ̈ሶ ኣሲ ፊርዲንቲ̈ሬ።

¹⁷ ታ̈ና ኣማ̇ኒዛን ዎይንቦ ዪን ማላ̇ን ኢንታ̇ብ ዶኢ̈ሬ፡ ቴ ሱምንባራ ኢ̈ታ ኣያ̇ና ኬሲ̇̈ሬ፣ ኦራ ኖ̈ና ሶ̈ሊሬ፣

¹⁸ ሾ̈ሽ ፌ ኩሽባር ኤ̈̇̈ሬ፣ ዎዝ ጋ̈ላ̇ ኡሽኪናካሬ ኢንታ ዎባሴ፣ ፌ ኩሺን ማዝ ኣስ ጋልዳ ጋዳ̇ር ዎ̈ሴ̈ጌይን ማዛን ፋጺ̈ሬ” ጌይዴ።

¹⁹ ጎዳ ዬሱ̈ሲ ኢንታብ ዪኖ ሶ̈ሊኖፖ̇ ዓኒ ኣፋ ሉካ̇ሪ ጾ̈ሳ̇̇̈ቦ ኡሻች ጎይ ዶኢዴ።

²⁰ ኢ ታማ̈ራን ዎይ ቤስ̇ ሉካ̇ሪ ጾ̈ሳ̇̇ ቃ̈ላ ታማ̈ርሳምባራ፥ ጎዳ ኢንታባር ማ̈ቃ̇ር ኦ̈ዴ። ኢንቲ̇ ታማ̈ርሳምባራ ዱማ ዱማ ማላ̇ን ቤንቲ̇ ሙታ̇ ኢንቲ ታማ̈ርሲኖ ቲሚርቲ̇ን ኪን ማ̈ቂ̇ኖን ኤሪሲዴ።]