2 ታሳ 2 - ኦራ ጫ̈ቃ ማጻ̈ፋዉጫ ኣስ 1 ኑ ኢሺንታ̇ን! ኑ ጎዳ ዬሱ̈ሳ ዬንቲ̇ን ጎይኬ ኑ̈ናር ኢባር ዶኣንዳቦ ኢ̈ክ ሺ̈ቃዚን ጎይ ቴ ዪንታ̇ ጌሻዚንዳ ዓኖ̇፦ 2 ካ̈ያባራ ዎይ ቃ̈ላባራ ሶሊንቲ̇ኖዲፌ̈ን ቆፓ̇ሪ ዎይ ኑ ጻ̈ፋር ዪንታ̇ብ ሚሺኖ ኪ̈ታፌን ማሃሪ “ጎዳ ዬ̈ዝ ቃሚ̇ን ዬሊ̇ኔ” ጋ̈ሪ ኤሊ̇ር ዪንታ̇ ቆፊባር ጌዳክ ዓኒክ ጋ̈ፒ̇ቴ፤ ማ ሼምፓር ዶኢብቴ። 3 ኦ̈ናካር ኣሲ ኣ ጎይባርካር ማ̈ቂ̇ን ዪንታ̇ ጪ̈ጪንቻፖ̇፤ ቲ̈ኒታሪ ዉጫ ኦ̈ሲን ዬ̈ካ̇ይዶንኬ ያብ ጊ̈ጊንቲ̇ኖ ውጫ ና̈ሳ ዬ̈ካ̇ይዶን ዪና̇ ቃሚ̇ን ዬ̈ባሴ። 4 ዪ ዉ̈ጫ ና̈ሳ̈ዲ ጾ̈ሴ ጌይ ጼይጊንቲዛ̈ን ጋልዳፖኬ ኣሲ ጎሽቲ̇ዝ ባዝ ዎይ ጋልዳፖ ፌ̈ና ሾክ ሾክ ዎቲ̇̈ሬ፤ ኢ ኢ̈ጫካይ ጾ̈ሳ̇ ኬ̈ ጋርታ ዶኣሪ ፌ̈ና ጾ̈ሴ ጌይሬ። 5 ቴ ዪንታ̇ባር ዎ ኬሊ̇ንባራ ዪኖ̇ ዪንታ̇ብ ሶ̈ሊኖን ዪንታ̇ክ ኤልቅ ጋ̈ባሳ? 6 ኢ̈ብ ጌይኖ ቃሚ̇ንባር ኢ ቤንቲ̇ዝ ዲራስ ዓት ኢ ቤንታካ̇ይፌ̈ን ኢያ ካዪኖ ባዚን ኢዛ ኣብዝኮ ዪንቲ̇ ኤሪ̈ሬ። 7 ዉ̈ጫ ዎልቃ̈ዲ ኣሳብ ፌ̈ና ቤይሳካ̇ይዶሪ ዓት ኦ̈ሳ ጋ̈ልዳ ዎ፤ ማ̈ቂናካር ኢ ኦ̈ካ̇ይፌ̈ን ካዪዛ̈ዲ ፋኪ̇ዝ ዲራስ ኢ ኦ̈ሳካ̇ይፌ̈ኒ ኢያ ካዪሙታ ዶኢ̈ሬ። 8 ዪኒፖ ዎሃ ጎዳ ዬሱ̈ሲ ፌ ኖ̈ኒን ጋርታፖ ኬስካ̇ዝ ፌ̈ኒ̇ንባር ኢያ ይሲ̇ዛ̈ዲኬ ቦንችባራ ቤንታ̇ሪ ይሲዛ ዉጫ ና̈ሳ ቤንቲ̇̈ሬ። 9 ዪ ዉጫ ና̈ሳ ዬይዛ̈ዲ ሴ̈ጣና ዎልቃባራ ኣስ ባሊዝ ታ̈ሚ̇ራ̈ታኬ ማላ̇ኬ ማ ኣስ ጋራ̇ሚሲዝ ባዝ ኦ̈ሙታ ዬይሬ። 10 ማ ዪዝ ኣሳን ጪ̈ጪንቺ̇ዝ ኢ̈ታ ኦ̈ሳ ዎይ ኦ̈ሙታ̇ ዬይሬ፤ ዪን ኣሳን ያዚንዳ ኢንታ ፋንዳብ ዳንዳኣዝ ኪንን ካር ኣማ̇ናካይ ኣቲ̇ኖኮታ̇ቦ። 11 ዪ̈ኮታ̇ቦ ዎርዳ ባዚን ኣማ̇ናምፔ̈ኒ ጾ̈ሲ ኢንታ̇ ባሊዝ ዎልቃ ሚሺ̇̈ሬ። 12 ዪና̇ ማ̈ቃ̇ዚንዳ ኢንቲ̇ ኪንን ኣማ̇ናብዳ ጋ̈ሪ ናጋራባር ኡፋይቲ̇ዛን ዎይ ፊርዲንታ̇ምፔ̈ኔ። ሚ̈ጛር ኤቂ̇ብቴ 13 ጾ̈ሳ̇ባር ካን̇ቲኖ ኑ ኢሺንታ̈ን! ኑ̈ኒ ዪንታ̇ጊሽ ዎይ ጋላስ ጾ̈ሳ̇ ጋላታንዳ̇ብ ኮሺ̇̈ሬ፤ ኑ ኢያ ጋላታዚንዳ ዪንቲ̇ ጌ̈ሻ̇ ኣያ̇ናባር ጌ̈ዥጋሪ ኪንን ኣማ̇ናሪ ፋጻምፔ̈ኒ ጾ̈ሲ ቲ̈ኒታር ዪንታ̇ ማራ̇ጺኒኮታ̇ቦ። 14 ዪንቲ̇ ጎዳ ዬሱ̈ስ ክርስቶ̈ሳ ቦንቺ̇ን ኤኪ̇ዝ ኣስ ማ̈ቃ̇ምፔ̈ኒ ኑ ሳባ̇ኪኖ ዎጛሊን ጎይባራ ዪንታ̇ ጼይጊኔ። 15 ዪዚ ቴ ኢሺንታ̇ን! ሚ̈ጛር ኤቂ̇ብቴ፤ ኑ̈ኒ ዪንታ̇ብ ኖ̈ናባር ሶ̈ሊኖንዳር ማ̈ቂ̇ን ጻ̈ፋር ሚሺኖ ቲሚርቲ̇ን ሚ̈ንር ኤ̈ብቴ። 16 ኢ ኑ ጎዳ ዬሱ̈ስ ክርስቶ̈ሳኬ ኑ̈ና ካኖ ፌ ኮሺ̇ቲንባር ሜና ሚ̈ንቲንዲኬ ማ ኮሻ̇ ታስፋ ኢሚ̇ኖ ጾ̈ሳ̇ ኑ ባ̈ባ̈ዲ 17 ዪንታ̇ ቡ̈ዲን ሚ̈ንጋቤ፤ ማ ዪንቲ̇ ኮሽ̇ ማ̈ቂ̇ኖ ባዝ ዎይ ኦ̈ምፔ̈ንኬ ሶ̈ላምፔ̈ን ዪንታ̇ ሚ̈ንጋ̈ቤ። |