2 ቆሮ 13 - ኦራ ጫ̈ቃ ማጻ̈ፋ

ዉርሲ ዞራኬ ሳሪቲኬ

¹ ዪዚ ቴ ዪንታ̇̇ክ ሉኬ̇ጌይን ዓና̇ ታ̈ብ ዓይዚ̇ ቶ̈ሄ፤ ዎይ ባዚ ኪን ማ̈ቂ̇ዛ̈ዲ ናምኢ ዎይ ዓይዚ̇ ማርካ̇ባራ።

² ናምኢ ቴ ዪንታ̇ ኦይጫ̇ንዳብ ሉካ̇ር ዪንታ̇̇ባር ዎምባ̇ራ ዪንታ̇ ዎይሊን ዬኢ̇ራ ዪንታ̇̇ብ ሶ̈ሊንዶን፤ ማ ዓት̇ ቴ ጎትዶራ ዓኒፖ̇ ቲ̈ን ናጋራ ኦ̈ኖንብኬ ሜላንባር ዎይ ዬኢ̇ር ሶ̈ላሬ፤ ዓታ̇ር ቴ ዪንታ̇̇ክ ማ̈ቃ̇ ሉካ̇̈ራ ኦ̈ባካር ሚጪ̇ንታ̇ባሴ።

³ ዪ̈ዳሬ ኣባቦ ጌይን ታባር ማ̈ቃ̇ር ሶ̈ሊዛ̈ዲ ክርስቶ̈ሳ ማ̈ቂ̇ኖን ዪንቲ̇ ኤራንዳብ ማላ̇ ኮዪኖኮታ̇ ዪንቲ̇ ኢዞ ቤቂ̇ዝዳ። ክርስቶ̈ሲ ዪንታ̇ ጊዳ̇ ቤንቲ̇ዛዲ ዎልቃባሮ ማ̈ቃ̇ርዶኬ ዳ̈ቡርስባር ማ̈ቃ̇ር ጊዳካ̇ዬ።

⁴ ኢ ማስቃ̇ላ ጋልዳ ሶ̈ቲንታ̇ሪ ዓይቂ̇ኖ̈ዲ ኣስፌ̈ኒ ኣይሽ ማኢኖኮታ̇ቦ ዳቡርስባር ማ̈ቂ̇ናካሬ ዓት ጾ̈ሳ̇ ዎልቃ̇ባራ ሼምፓባር ዎ። ኑ̈ናሬ ኣይሽ ማኢኖኮታ̇ቦ ኢባር ዳቡሪዝ ኣሴ፤ ማ̈ቂ̇ናካሬ ዪንታ̇ ማ̈ዳ̇ንዳቦ ኑ̈ኒ ጾ̈ሳ̇̈ ዎልቃባራ ክርስቶ̈ሳባር ዎልኣ ሼምፓባር ዶኢ̈ሬ።

⁵ ዪንቲ̇ ኣማ̇ናባር ሚ̈ጛር ዎን ኤራንዳ̇ቦ ዪንታ̇ ማሊ̇ ቤቂ̇ብቴ፤ ፋ̈ጪ ቤቂ̇ብቴ፤ ዬሱ̈ስ ክርስቶ̈ሲ ዪንታ̇ ጋርታ̇ ዎን ዪንቲ̇ ኤራካያ? ዪፖ̇ ኣቴ̇ጌዪን ዪንቲ̇ ፋታናባር ኬዲ̇ኔ ጌይዛ̈ዳ።

⁶ ኑ̈ኒ ፋታናባር ኬዳካ̇ዮን ዪንቲ̇ ኤሪ̈ሬ ጌዪ ቆፒ̇̈ሬ።

⁷ ኢ̈ታ̇ ባዝ ዪንቲ̇ ኦ̈ካዮ̈ዲፌ̈ኒ ኑ̈ኒ ዪንታ̇̇ብ ጾ̈ሳ̇ ዎሲ̇̈ሬ፤ ኑ ዎ̈ሳ̇ዚንዳ ኑ̈ኒ ሚጚኖ ኣስ ማ̈ቃ̇ር ቤንታካ̇ይ ኣቴ̇ጌይናር ዪንቲ̇ ዎይ ጋላስ ኮሽ̇ ማ̈ቂ̇ኖ ባዝ ኦ̈ምፔ̈ንዶኬ ኑ ሚ̈ጚኖ ኣስ ማ̈ቂ̇ኖን ዪንታ̇ ቤይሳንዳብ ጊዳካ̇ዬ።

⁸ ኑ̈ኒ ኪን ባዛብ ኦ̈ርዶኬ ኪንን ኢጺ̇ዝ ባዝ ኣባካር ኦ̈ባሴ።

⁹ ኑ̈ኒ ዳ̈ቡሪዛን ማ̈ቂ̇ን ዪንቲ̇ ሚ̈ንን ማ̈ቂ̇ኖኮ ኑ̈ና ኡፋይሳ̇̈ሬ፤ ኑ ዎ̈ሳ̇ዝ ዎ̈ሲንዳ ዪንቲ̇ ኣማ̇ናባር ሚ̈ጚኖ ኣስ ማ̈ቃ̇ምፔ̈ኔ።

¹⁰ ዓና ኪ̈ቲ̇ን ጎት ዎዶራ ቴ ዪንታ̇ብ ጻ̈ፊኖንዳ ቴ ዪንታ̇̇ክ ዬ̈ራ ጎዳ ታ̈ብ ኢሚ̇ኖ ሲልጣ̈ኒን ቴ ዪንታ̇ ጋልዳ ቤይሳካዮ̈ዲፌ̈ን ጋ̈ር ጻ̈ፊኔ። ጎዳ ሲልጣ̈ና ታ̈ብ ኢሚ̇ኖዲ ዪንታ̇ ሺ ሚ̈ንምፔ̈ንዶኬ ዪንታ̇ ላ̈ላ̇ምፔ̈ን ጊዳካ̇ዬ።

¹¹ ዪዚ ቴ ኢሺንታ̇ን! ሳሮ ዶኢብቴ̇! ዪንታ̇ ኣማ̇ኒንባር ሚ̈ጚብቴ! ቴ ዞሪን ኤኪ̇ብቴ፤ ዎልዎልኣ ፔቲ̇ ቆፊ ዪንታ̇̇ብ ዶኦጋ̈ቤ፤ ሳሪቲባር ዶኢብቴ ካንኬ ሳሪቲ ጾ̈ሳ̇̇̈ዲ ዪንታ̇̇ባር ማ̈ቂ̇̈̃ሬ።

¹² ኮሽ̇ ቡ̈ዳባር ዎል ዎልኣ ዬርቃ̇ር ሳሪብቴ̇፤

¹³ ኣማ̇ኒኖ ኣሳን ዎይ ዪንታ̇ ሳሮ ጌይሬ፤

¹⁴ ጎዳ ዬሱ̈ስ ክርስቶ̈ሳ ኮሺ̇ቲ፣ ጾ̈ሳ̇ ካን፣ ጌ̈ሻ̇ ኣያ̇ና ጋልዳፖ̇ ቤንቲ̇ዝ ፔቲ̇ቲ ዪንቲ̇ ዎይንባር ማ̈ቆ̇ጋ̈ቤ።