2 ቆሮ 1 - ኦራ ጫ̈ቃ ማጻ̈ፋ

¹ ጾ̈ሳ̇̇̈ ቆፊፌ̈ን ዬሱ̈ስ ክርስቶ̈ሳብ ሃዋ̈ራ ማ̈ቂ̇ኖ ታ ጳውሎ̈ሳኬ ኑ ኢሻ ጢማ̈ቶሳክ ዎልኣ ቆሮንቶ̈ሳ ካታማ ጋርታ ዎ ዬሱ̈ሳ ኣማ̇ኒዝ ኣሳንኬ ማ ኣካ̈ያ ጋዳ̇ ዎ ኣማ̇ኒዝ ዎርዣ ዎይቦ፥

² ጾ̈ሳ̇ ኑ ባ̈ባ̈ፔኬ ኑ ጎዳ ዬሱ̈ስ ክርስቶ̈ሳ ጋልዳፖ ኢ ኮሺ̇ቲንዲኬ ሳ̈ሪቲን ዪንታ̇̇ብ ማቆ̇ ጌይሬ።

ጳውሎ̈ሲ ጾ̈ሳ̇̈ቦ ሺ̈ሺ̇ኖ ጋላታ

³ ኣሳብ ሚጪንቲ̇ዛ̈ዲኬ ሚ̈ንዛ ኑ ጎዳ ዬሱ̈ስ ክርስቶ̈ሳ ባ̈ባ̈ ጾ̈ሳ̇̈̇ቦ ጋላታ ማ̈ቆ̇።

⁴ ኑ̈ኒ ጾ̈ሲ ኑ̈ብ ኢማ̇ዝ ሚ̈ንምባራ ሜታ ጋርታ ዎን ዎይ ሚ̈ንምፔን ጾ̈ሲ ኑና ኑ ሜቲን ዎይምባራ ሚ̈ንሬ።

⁵ ክርስቶ̈ሳ ጊሽ ኑ ዎይሊን ሜታ ኤኪ̇ኖንዲፌ̈ኒ ኢ ኢማዝ ሚ̈ንንዳሬ ዎይሊን ዲጚ̈ሬ።

⁶ ኑ ሜታ ኤካ̇ዚምባራ ዪንቲ̇ ሚ̈ንኬ ፋቲ ዲጚ̈ሬ። ኑ ሚን ዲጛምባራ ዪንቲ̇ ኑ ኤኪ̇ኖ ሜቲ̇ን ዪንታ̇ ዬሊ̇ኖ ጋላስ̇ ጋርዣር ሚ̈ን ዲጚ̈ሬ።

⁷ ኑ ኤካ̇ዝ ሜቲን ዪንቲ̇ ኤካ̇ዚንዲፌ̈ኒ ኑ̈ብ ኢሚ̇ንታዝ ሚ̈ንንዳር ጾ̈ሲ ዪንታ̇̇ብ ኢማ̇ዚን ኑ ኤሪዛኮታ̇ቦ ሜታ ዬይናካር ኢዝ ጋርታ̇ ዪንቲ̇ ሚጚ ኤቃ̇ዚን ኑ ኣማ̇ኒ̈ሬ።

⁸ ቴ ኢሺንታን! ኑ̈ኒ ኢ̈ሳ ጋዳ̇ ዎምባራ ኑ̈ና ዬሊ̇ኖ ሜቲን ዪንቲ̇ ኤራምፔ̈ን ኑ ኮይሬ፤ ኑ ቶ̈ካ̇ንዳብ ዳንዳኣካዮ ጴች ሜታ ኑ̈ና ዬሊ̇ኖኮታ̇ቦ ሜላ ኣቲ̇ን ኑ ኑ̈ና ሼምፓባር ዶኢሬ ጌዪ ቆፓካ̇ዬ።

⁹ ዪና̇ ኢዝባራ ኑ̈ኒ “ኑ ጋልዳ ዓይቃ ፊርዳ ፋራዲንቲ̇ኖ ኣሴ” ጌዪ ቆፒ̇ኔ፤ ዪ̈ ዎይ ማ̈ቂ̇ኖ̈ዲ ኑ̈ኒ ኣስ ዓይቃ ጋርታፖ ዲንዝ ጾ̈ሳ̇ባር ኣማ̇ኒንታ̇ምፔ̈ንዶኬ ኑ ዎልቃባር ኣማ̇ኒንታ̇ካዮ̈ዲፌ̈ኔ።

¹⁰ ኢ ዓይቃብ ዬልዝ ሜታ ጋርታፖ̇ ኑ̈ና ፋኔ፤ ዓታ̇ር ፋ̈ሬ፤ ማ ኢ ኑ̈ና ፋዚን ኑ ኢባር ኣማ̇ኒንቲ̇̈ሬ።

¹¹ ዪንታ̇̇ሬ ኑ̈ና ዎ̈ሳባር ማ̈ዲ̇ብቴ። ዎይሊን ኣሲ ዎ̈ሲ̇ን ጾ̈ሳ̇ ፌ ኮሺቲን ኑ̈ብ ቤይሲኖንኮታ̇ቦ ዎይሊንን ኑኮታ̇ብ ጾ̈ሳ̇ ጋላቲ̈ሬ።

ጳውሎ̈ሲ ፌ ቆፒ̇ኖ ቆፊን ላሚ̇ዴ

¹² ኑ̈ና ኬርፊሲዝ ፔቲ̇ ባዚ ዎ ዪ̈ናሬ፤ ኑ̈ኒ ዓኒ ኣላሚን ጋልዳ ማ ዎይ̈ፖ ሺ ዪንታ̇ባራ ኑ̈ብ ዎ ፔቲ̇ቲን ጋርታ ኑ̈ኒ ጾ̈ሳ̇̇ ጋልዳፖ ዲጚኖ ጌ̈ሺ̇ቲንባርኬ ኣሽኪቲንባራ ዪንታ̇ባር ዶኢኖን ኑ ቡ̈ዲን ኑ̈ቦ ማርኪታ̈ሬ። ዪ̈ና̇ ኣሳ ኤራባራ ጊዳካ̇ይዶን ጾ̈ሳ̇̇ ኮሺ̇ቲባር ማ̈ቂ̇ኖባዜ።

^13-14 ዪንቲ̇ ናባ̇ባንዳብኬ ኤራንዳብ ዳንዳኢባሶ ባዝ ኑ ዪንታ̇̇ብ ጻፊባ̈ሴ። ዓት ዪንቲ̇ ኑ ባዝ ኤራዚንዳ ጊላ̇፥ ዎሃ ዪንቲ̇ ኮሺንቺ̇ ኤሪ̈ሬ ጌያ ቴ ቆፓ̇ሬ፤ ጎዳ ዬሱ̈ሲ ዬ̈ዝ ቃሚ̇ንባራ ኑ̈ኒ ዪንታ̇̇ባር ኬርፊ̈ሬ ዪንታ̇̇ሬ ኑባር ኬርፊ̈ሬ።

¹⁵ ዪኖ̇ ታ̈ኒ ኮሺንቻ ኤሪኖኮታ̇ቦ ዪንቲ̇ ናምኢ ቶህ ጻቃ̇ሚንታ̇ምፔ̈ኒ ጋ̈ራ ቴ ቲኒ̇ታር ዪንታ̇̇ክ ሉካ̇ንዳ ጌያ ቆፒ̇ንዶን፤

¹⁶ ቴ ዪንታ̇ክ ሉካ̇ንዳብ ቆፒ̇ኖንዳ ቴ ሜቂዶ̈ና ሉካ̇ርዶራ ጎይ ኢዝባራ ዪንታ̇ ሉካ̇ ኦይጫ̇ራ ማ ሜቂዶ̈ናፖ̇ ማ̈ቃ̇̈ርዶራ ዪንታ̇ክ ጎይ ኢዝባር ማ̈ቃ̇ራ ዪሁዳ ሉካ̇ምባራ ጎይብ ማቂዝ ባዝባር ዪንቲ̇ ታ̈ና ማ̈ዳ̇ምፔኔ።

¹⁷ ቴ ዪኖ̇ ኮሺንቻ̇ ቆፓ̇ካይዶራ ዎቲኖ ዪንታ̇ብ ማይጻ̈ራ? ዎይ ቴ ዪኖ̇ ቆፓ̇ርዶራ ኤሊራ “ኣዓ” ዎይ “ዋኣኬ” ጌያ ጌዳክ ዓኒክ ኣሳ ቆፊ̈ፌን ዎቲዛ ማይጻ̈ራ?

¹⁸ ጾ̈ሳ̇̇̈ዲ ኣማ̇ኒንቲ̇ኖ ማ̈ቂ̇ኖኮታ̇ቦ ኑ̈ናር ዪንታ̇̇ብ ሶ̈ሊርዶሪ “ኣዓ” ማ ማ̈ቃ̇ር “ዋኣኬ” ጌዪ ጌዳክ ዓኒክ ጋ̈ባሴ።

¹⁹ ታ̈ና፣ ሲላ̇̈ሳኬ ጢማ̈ቶ̈ሳ ጎይባር ዪንታ ጊዳ̇ ሳባ̇ኪንቲ̇ኖ ጾ̈ሳ̇ ና̈ኣ ዬሱ̈ስ ክርስቶ̈ሲ “ኣዓ” ማ ማ̈ቃ̇ር “ዋኣኬ” ጊዳካ̇ዬ፤ ኢ ጎይባራ ዎይ ጋላስ “ኣዓ” ሙታ።

²⁰ ጾ̈ሲ ኑ̈ብ ኢሚ̇ኖ ታስፋ ቃ̈ላ ዎይ “ኣዓ” ማ̈ቃ̇ዚንዳ ክርስቶ̈ሳ ጎይባራ፤ ኑ̈ናሬ ጾ̈ሳ̇ ቦንቻ̇ብ ክርስቶ̈ሳ ሱምባር “ኣሚንኤ” ጋ̈ዚንዳ ዪኒ̇ኮታ̇ቦ።

²¹ ዪዚ ኑ̈ናር ዪንታ̇̇ር ክርስቶ̈ሳባር ሚ̈ጛምፔ̈ን ዎቲኖ̈ዲ ጾ̈ሳ̇̇̈ዳ፤ ኑ ኢ ኦ̈ሲን ኦ̈ምፔ̈ን ማራ̇ጺኖ ኢያ።

²² ኑ ኢያይ ማ̈ቂ̇ኖን ማርኪቲዝ ማ̈ታማ ኑ ጋልዳ ጋዲ̇ ዎሃ ኑ̈ብ ኢማ̇ዝ ባዚምቦ ፌ ጌ̈ሻ ኣያ̇ና̈ዳ ቃብዳፌ̈ን ኑ ቡ̈ዲን ጋርታ ጋዲ̇ኖ ኢያ።

²³ ታ̈ኒ ቆሮንቶ̈ስ ካታሚን ጋርታ ማ̈ቃ̇ር ዬ̈ካ̇ዮንዳ ቴ ዪንታ̇ ጎይላር ሺን̇ ዎታካ̇ዮ̈ዲፌ̈ኒ ዪንታ̇̇ብ ሚጪንታራ ኣቲ̇ኔ። ዪና̇ ታ ጋ̈ዚን ማቃኮ ጾ̈ሲ̇ ታ ጋልዳ ፊርዶጋ̈ቤ።

²⁴ ዪንቲ̇ ሚ̈ጛር ኤቃ̇ዚንዳ ኣማ̇ናባራ ማ̈ቂ̇ኖኮታ̇ቦ፥ ዪንታ̇ ኡፋይሳ̇ምፔ̈ን ኑ ዪንታ̇̇ባር ዎልኣ ኦ̈ንዳብዶኬ፥ ዪንታ̇ ኣማ̇ኒን ጋልዳ ኑ ኣላቃ ማ̈ቃ̇ንዳብ ጊዳካ̇ዬ።