1 ታሳ 3 - ኦራ ጫ̈ቃ ማጻ̈ፋ

¹ ዪ̈ኮታ̇ቦ ዓኒ̇ፖ ጌዳ ኑ̈ኒ ጋርዣንዳብ ዳንዳኣካ̇ዮኮታ̇ቦ ኣቴ̈ና ካታሚን ጋርታ ኑ ኑ̈ብ ሙታ̇ ኣታ̇ንዳቦ ኮዪዴ።

² ዪንታ̇ ሚ̈ንምፔ̈ንኬ ዞራምፔ̈ን ዪንታ̇ኮ ዎጛላ ኦ̈ሲን ጋርታ ኑባር ዎልኣ ጾ̈ሳ̇̇̈ብ ኦ̈ዛ ኑ ኢሻ ጢማ̈ቶሳ ዪንታ̇ቦ ሚሺኔ።

³ ዪና̇ሬ ዪንታ̇ ዬሊ̇ኖ ሜ̈ቲን ጋርታ ኢ̈ጫ̇ር ጋስ ማ̈ቃካ̇ዮ̈ዲፌ̈ኒ ዪንታ̇ ማ̈ዲ̇̈ሬ፤ ዪኒ̇ፌ̈ኖ ሜቲ̇ን ኑ ጋልዳር ዎይ ጋላስ ዬላ̇ዚን ዪንቲ̇ ኤሪ̈ሬ።

⁴ ኑ̈ኒ ዪንታ̇ባር ዎንባራ ኑ̈ና ሜታ ዬላዚን ቲ̈ኒታር ኑ ዪንታ̇ብ ሶ̈ሊኔ፤ ዪንቲ̇ ኤራዚንዲፌ̈ኒ ኑ ጌይኖ ሜቲን ኑ̈ና ዬሊ̇ኔ።

⁵ ዪኒ̇ኮታ̇ቦ ዓኒ̇ፖ ጌዳ ታ̈ኒ ጋርዣንዳብ ዳንዳኣካ̇ዮኮታ̇ቦ ዪንታ̇ ኣማ̇ኒን ዎዛርኮ ኤራንዳቦ ኮያራ ጢማ̈ቶ̈ሳ ዪንታ̇ክ ሚሻዴ፤ ቴ ዪኖ̇ ዎቲኖንዳ ኣስ ፋታ̇ኒዝ ኢ̈ታ ዪንታ̇ ፋታ̇ኒንዶኢዝዳ፥ ዪዚ ኑ ዋ̈ዪንዳር ሜላ̇ ዓሪ ኣቲ̇ኔ ጋ̈ራ ኢ̈ጫ̇ር ዎቲኔ።

⁶ ዎቲናካር ዓት̇ ጢማ̈ቶ̈ሲ ዪንታ̇ካፖ ማ̈ቂ̇ ዬ̈ሪ ዪንታ̇ ኣማ̇ኒን ጎይኬ ዪንታ̇ ካን ጎይ ኑ̈ና ኡፋይሲ̇ዝ ባዝ ኑ̈ብ ሶ̈ሊኔ፤ ማ ዎይ ጋ̈ላስ ኑ̈ና ኮሽባር ቆፓ̇ዚንዲኬ ኑ ዪንታ̇ ቤቃ̇ንዳቦ ሹ̈ኒታዚንዲፌ̈ኒ ዪንታ̇ር ኑ̈ና ቤቃ̇ንዳብ ሹ̈ኒታዚንዶ ኢ ኑ̈ብ ሶ̈ሊኔ።

⁷ ዪ̈ኮታ̇ቦ ቴ ኢሺንታ̇ን! ኑ̈ኒ ዋ̈ያ ጋርታ̇ኬ ሜታ ጋርታ ዎካራሬ ዪንታ̇ ኣማ̇ኒንባዝ ሲስካ̇ሪ ሚጚንቲ̇ኔ።

⁸ ዪንቲ ጎዳ̈ ዬሱሳባር ሚ̈ጛር ዎኮታ̇ቦ ኑ̈ናር ሼምፓባር ዎ።

⁹ ኑ̈ኒ ዪዚ ዓት ዪንታ̇ኮታ ጾ̈ሳ̇ ጋላቲ̈ሬ፤ ዪንታ̇ ጎይባራ ጾ̈ሳ̇ ቲ̈ን ኑ̈ብ ዎ ኡፋይሲ̇ምቦ ኑ ኢያ ጋላቲ̈ሬ።

¹⁰ ጋላስ ቃም ሚጛ̈ር ዎሳ̇̈ዚንዳ ኑ ዪንታ̇ ኣ̈ፍባር ቤቃ̇ንዳብኬ ዪንታ ኣማ̇ኒን ጋልዳ ጉ̈ጺ̇ኖ ባዝ ዎኮ ኢዞ ኩምንዳቦ።

¹¹ ዓታ̇ር ኑ ጾ̈ሳ̇̇̈ዲኬ ኑ ባ̈ባ ኢ ኑ ጎዳ ዬሱ̈ስ ክርስቶ̈ሲ ኑ ዪንታ̇ክ ሉካ̇ምፔ̈ኒ ጎይ ኑ̈ብ ፊርቆ̇ጋ̈ቤ።

¹² ኑ ዪንታ̇ ካዚንዲፌ̈ኒ ዪንቲ̇ ዎልዎልኣ ካንታ̇ምፔ̈ንኬ ማ ዪንቲ̇ ሜ̈ላን ካዝ ካንን ዎይላ ዲጫ̇ምፔ̈ኒ ጎዳ ዪንታ̇ ማ̈ዶ̇ጋ̈ቤ።

¹³ ኑ ጎዳ ዬሱ̈ስ ክርስቶ̈ሲ ፌ ጌ̈ሻ ኣሳንባራ ማ̈ቃ̇ር ዬ̈ዚምባራ ኑ ጾ̈ሳ̇̇̈ዲኬ ኑ ባ̈ባ ቲ̈ን ዪንታ̇ ቡ̈ዲንዳ ጌ̈ሽኬ ኢ̈ታ ባዚ ኣባክ ባዮ̇ ማ̈ቃ̇ር ዶኣምፔ̈ኒ ኢ ዪንታ̇ ሚ̈ንሬ።