Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 ታሳ 2 - ኦራ ጫ̈ቃ ማጻ̈ፋ


ታሳሎንቃ ጋዳ̇ ጳውሎ̈ሲ ኦ̈ኖ ኦ̈ሳ

1 ቴ ኢሺንታ̇ን! ኑ̈ኒ ዪንታ̇ኮ ሜላ̇ ኣ̈ፊ ባዮ̇ ባዛቦ ዬ̈ባሶን ዪንቲ ዪንታ̇ ቆሚ̇ን ኤሪ̈ሬ።

2 ዪንቲ ኤራዚንድፌ̈ኒን ዓኒ̇ፖ ቲ̈ን ኑ̈ኒ ፊልጲሶ̈ሳ ካታሚን ጋርታ ዎ ኬሊ̇ንባራ ዎይሊን ሜታኬ ቆ̈ሳክ ኑ̈ና ዬሊ̇ኔ፤ ጴች ዳሲ̇ ኑ̈ና ዬሊ̇ናካሬ ታሳሎንቃ ሉካ̇ሪ ጾ̈ሳ̇ ዎጛሊን ዪንታ̇ብ ማርኪታምፔ̈ኒ ጾ̈ሳ̇̇ ኑ ቡ̈ዲን ሚ̈ንኔ።

3 ኑ̈ኒ ዪንቲ̇ ዎጛሊን ኣማ̇ናምፔ̈ኒ ዪንታ̇ ጌሺኖንዳ ኑ ባሊ̇ታ̇ሪ ዎይ ኢ̈ታ ቆፊባር ጊዳካ̇ዬ፥ ማ ኑ ዪንታ̇ ጪ̈ጪንቻር ዎቲኖ ባዚ ኣባካር ባዬ̇።

4 ዎቲናካር ጾ̈ሲ ዎጛላ ኦ̈ሲንዶ ኑ̈ቦ ዓዳራባር ኢሚ̇ኖኮታ̇ቦ ሶ̈ሊ̈ሬ። ኑ ዪኖ̇ ዎታዚንዳ ኑ ቡ̈ዲን ቤቂ̇ዝ ጾ̈ሳ̇ ኡፋይሳ̇ንዳብ ጋ̈ሪዶኬ ኣስ ኡፋይሳ̇ንዳ̇ቦ ጋ̈ር ጊዳካ̇ዬ።

5 ኑ̈ኒ ሜላ ኣቲ̇ን ፔቲ̇ ጋላሳ̇ር ዪንታ̇ ማቃባር ማይጺሳር ዎይ ሚ̈ሽ ዲጛንዳቦ ጋ̈ሪ ሶ̈ላካ̇ዮን ዪንቲ̇ ኤሪ̈ሬ፤ ጾ̈ሳ̇̇̈ዳር ኑ̈ቦ ማርካ።

6 ኑ̈ኒ ዪንታ̇ ጋልዳፓ̇ሬ ማ̈ቂ̇ን ኦ ጋልዳፓካር ማ̈ቂ̇ን ቦንች ኮያካ̇ዬ።

7 ኑ̈ኒ ክርስቶ̈ሳብ ሃዋ̈ራ ማ̈ቂ̇ኖኮታ̇ቦ ኑ̈ብ ኮሺ̇ዝ ባዝ ዎይ ኢማምፔ̈ን ዪንታ̇ ኦይጫንዳብ ዳንዳኢ̈ርዶን ዎቲናካሬ ፌ ናኣን ዲቻ̈ንዳቦ ዋ̈ያዝ ኢንዲ̇ንዲፌ̈ኒ ኑ ዪንታ̇ ጊዳ ኣሽካ ማ̈ቃ̇ር ቢሪንቲ̇ዴ።

8 ዪኒፖ ሺ ኑ ዪንታ̇ ዎይሊን ካዛኮታ̇ቦ ዪንታ̇ብ ጾ̈ሳ̇ ዎጛላ ሳባ̇ኪዛ ሙታ̇ ጊዳካ̇ይዶን ኑ ሼምፒ̇ንዳር ዪንታ̇ጊሽ̇ ኣ̈ር ኢማ̈ንዳቦ ጊ̈ጊንቲ̇ኖን።

9 ኑ ኢሺንታ̇ን! ኑ̈ኒ ዎዛርፌ̈ን ኦ̈ ዳ̈ቡሪኖኮ ዪንቲ̇ ኤሪ̈ሬ፤ ኑ̈ኒ ዪንታ̇ብ ቶ̈ፊ ማ̈ቅባ̈ዳ ጋ̈ሪ ጋ̈ላሳ̈ር ቃማ̇ር ኦ̈ሙታ ዎጛላ ሳባ̇ኪዴ።

10 ኑ̈ኒ ዪንቲ ኣማ̇ኒኖ ኣሳን ጊዳ̇ ዎምባራ ጌ̈ሺቲባራ፥ ጺሊ̇ቲባርኬ ኢታ ባዚ ኣባክ ኑ ጋልዳ ባዪዶን ዶኢኖን ዪንታ̇ሬ ጾ̈ሳ̇̇̈ዳር ኑ̈ቦ ማርካ።

11 ባ̈ቦ ፌ ናኣንቦ ዎታዚንድፌ̈ኒ ኑ̈ናር ዪንቲ ዎይንቦ ዎቲኖን ዪንቲ ኤሪ̈ሬ።

12 ፌ ካ̈ቲቲንኬኬ ፌ ቦንቺ̇ንኮ ዪንታ̇ ጼይጊኖ ጾ̈ሳ̇̇̈ቦ ኮሻ̇ዚንዲፌ̈ን ዪንቲ ዶኣምፔ̈ኒ ኑ ዪንታ̇ ዞሪኖን፥ ሚ̈ንኖንዲኬ ሚ̈ንር ዪንታ̇ ጌሺኖን ዪንቲ̇ ኤሪ̈ሬ።

13 ማ̈ ኑ̈ኒ ዪንታ̇ኮ̈ታ ጾ̈ሳ̇ ዎይ ጋ̈ላስ ጋ̈ላታዚንዳ ዪንቲ̇ ኣማ̇ኒዝ ኣሳን ጋልዳ ኦ̈ዝ ዪና̇ ቃ̈ሊን ዪንቲ ኑ ጋልዳፖ̇ ሲስኪ̇ኖንባራ ኣሲ ሶ̈ሊዛ̈ዲፌ̈ን ማሃር ቤ̈ቃካ̇ይዶር ጾ̈ሲ ሶ̈ሊዛ̈ዲፌ̈ን ማሃር ኤኪ̇ኔ፤ ኢዛ̈ር ኪን ጾ̈ሳ̇ ቃ̈ላ።

14 ቴ ኢሺንታ̇ን! ዪንቲ ዪሁዳ ጋዳ̇ ዎ ዬሱ̈ስ ክርስቶ̈ሳ ኣማ̇ኒዝ ኣሳን ማይጺ̈ሬ፤ ኣኮ̈ታቦ ጌይን ኢንታ ጋልዳ ኣይሁድ ዜርን ሜታ ዬልኖንዲፌ̈ኒ ዪንታ̇ ጋልዳሬ ዪንታ̇ ዜርን ሜታ ዬልኔ።

15 ኣይሁዳን ጎዳ ዬሱ̈ሳኬ ናባን ዎ ማ ኑ̈ናር ጋዳ̇ፖ ዳኪ̇ ኬሲ̇ኖ ኣሴ፤ ኢንቲ ጾ̈ሳ̇ ኣዛንዛንኬ ኣስ ዎይ ኢጺ̇ዛን።

16 ኢንታ̇ ፋዝ ቃ̈ሊን ሶ̈ላካ̇ይፌ̈ኒ ኑ̈ና ካዪኔ፤ ዪኒ̇ፌ̈ን ዎቲሙታ̇ ናጋራ ጋልዳ ናጋራ ጊጂሙታ ሉኪ̈ሬ፤ ዪ̈ኮታ̇ቦ ዉርሲ ጋልዳ ጾ̈ሳ̇ ጎይላ ኢንታ̇ ጋልዳ ዬይኔ።


ጳውሎ̈ሲ ታሳሎንቃ ኣሳን ናምኢ ቤቃ̇ንዳብ ኢኒ̇ቲኖ ኢና̇

17 ቴ ኢሺንታን! ኑ̈ኒ ቆፊባር ጊዳካ̇ይዶን ኣይሽባር ጊሊ̇ ጊዛቦ ዪንታ̇ ጋልዳፖ ጎታ̇ር ዎኮታ̇ ዪንቲ̇ ኑ̈ና ሹ̈ኒሺኖኮታ̇ብ ኑ ዪንታ̇ ኣ̈ፍባር ቤቃ̇ንዳቦ ዎይሊን ኮዪኔ።

18 ኑ ዪንታ̇ኮ ሉካ̇ንዳቦ ኮዪንዶ̈ን፤ ዎይፖ ሺ ቴ ዉሎ̈ሲ ዪንታ̇ኮ ዬ̈ንዳቦ ዎይሊን ጎይ ቆፒ̇ንዶን፤ ሴይጣኖ ኑ̈ና ጋስ ማሂኔ።

19 ዪዚ ኑ ታስፋን ዎይ ኑ ኡፋይሳ̇ን ዎይ ክርስቶ̈ሲ ዬይኖ ቃም ኢ ቲ̈ንን ጋርታ ኑ̈ ቦንቻን ኦ̈ኖ? ዪንቲ ጊዳካ̇ያ?

20 ኪንባራ ኑ ቦንቻ̇ንኬ ኑ ኡፋይሳን ዪንታ̇።

ကြှနျုပျတို့နောကျလိုကျပါ:



ကြော်ငြာတွေ