1 ጴጥ 5 - ኦራ ጫ̈ቃ ማጻ̈ፋ

ዎ̈ሳ ኬ̈ን ቲ̈ኒዛንቦ ኢሚ̇ኖ ዞራ

¹ ዪዚ ታ̈ኒ ኢንታ̇ባራ ዎልኣ ዎሳ ኬ̈ ጪጛ̈ሽ ማ̈ቂ̇ኖ፥ ክርስቶ̈ሳ ሜ̈ቲን ማርኪ̇ቲዝ ኣስ ማ̈ቂ̇ኖ፥ ማ ጊዳክ ዬ̈ዝ ጎዳ ቦንቺ̇ን ኤኪ̇ዛ፥ ዪንታ̇ ጊዳ̇ ዎ ዎሳ ኬ̈ ጪጛ̈ሻን ዞራ̈ሬ።

² ዪንታ̇ቦ ዓዳራባር ኢሚ̇ኖን ጾ̈ሳ̇ ዎርዣ ና̈ጊብቴ፤ ዪንቲ̇ ኢንታ̇ ና̈ጋዚንዳ ዎልቃባር ጊዳካ̇ይዶን ጾ̈ሳ̇ ኮዪዝ ጎይባራ ዶሳባር ማ̈ቆ̇፤ ሚ̈ሻ̇ብ ጋንዲሙታ̇ ጊዳካ̇ይዶን ኦ̈ሲምቦ ጋ̈ሪ ኦ̈ብቴ።

³ ዪንታ̇ቦ ዓዳራባር ኢሚ̇ኖ ዎርዣ̈ ዎልቃባር ኣቂሲዝባዝ ጊዳካ̇ይዶን ኢንታ̇ብ ኮሽ ሚሳ̇̈ሊ ማ̈ቃ̇ር ቤይሲሙታ ኣቂሲብቴ።

⁴ ዪንቲ ዪኖ̇ ዎቴጌይንዶ ጴቻ ዎይ ኣቂሲዝ ጎዳ ዬ̈ዚምባራ ሜናብ ዶኢዝ ቦ̈ንች ኣኪሊላ ዪንቲ̇ ኤኪ̇̈ሬ።

⁵ ማ ዪንቲ̇ ናኢቲን! ዶምዛንቦ ኪ̈ቲንቲ̇ብቴ፤ ዪንቲ ዪንታ̇ ዪርክ ዪርክ ዎቲ ሙታ ፔታ̇ ፔታ̇ና ማ̈ዶጋ̈ቤ፤ ኣኮታ̇ቦ ጌይን “ጾ̈ሳ̇ዲ ኦቲርቂዛ̈ን ኢጺ̇̈ሬ፥ ፌ̈ና ዪርክ ዪርክ ዎቲዛንቦ ፌ ኮሺቲን ቤይሲ̈ሬ” ጋ̈ሪ ጻ̈ፊንቲ̇ኔ።

⁶ ዪዚ ጾ̈ሳ̇ ፌ ጌይኖ ኬሊ̇ንባራ ዪንታ̇ ሾክ ሾክ ዎታምፔ̈ኒ ጾ̈ሳ̇ ዎልቂን ጴቺ̇ን ጻኒን ጋርታ ዪንታ̇ ዪርክ ዎቲብቴ̇።

⁷ ኢ ዪንታ̇ቦ ቆፒ̇ዛኮታቦ ዪንታ̇ ዋይዝባዝ ዎይ ኢ ጋልዳ ቶ̈ጚ̈ብቴ።

⁸ ዪንቲ̇ ዪንታ̇ብ ኮሻ̇ዚንዲፌ̈ን ዶኢብቴ̇፥ ማ ባርኪብቴ! ዪንታ̇ ጻላ̈ታ ሴ̈ጣኖ ቆ̈ዝባዝ ኮያሪ ዲ̇ዝ ዞብፌ̈ኒ ዪንታ̇ ቡጉዳባራ ቢሪንቲ̇̈ሬ።

⁹ ኣላሚን ጋልዳ ዎይ ዎ ኢሺንታ̇ን ዪኒፌ̈ኖ ሜቲን ኤኪ̇ሙታ ዎን ኤራሪ ዪንታ̇ ኣማ̇ኒንባር ሚ̈ጛር ኢያ ቆዳ̇ር ጎቲ̇ሲብቴ።

¹⁰ ጊሊ̇ ጊዛብ ዪንቲ̇ ሜታ ኤኪ̇ኖፖ̇ ዓኒ ክርስቶ̈ሳ ጎይባራ ሜና ቦንቻ̇ብ ዪንታ̇ ጼይጊኖ ኮሺ̇ቲ ዎይ ኢ̈ክ ዎ ጾ̈ሳ̇̇̈ዲ ኢ ዪንታ̇ ዬሊ̇ኖ ሜቲን ጋርታፖ ዪንታ̇ ኬሳ̇ር ሚ̈ን ኤሲ̇̈ሬ።

¹¹ ሜናብ ቦንችኬ ዎልቃኬ ኢ̈ብ ማ̈ቆ̇! ኣሚንኤ።

ዉርሲ ሳሪቲ

¹² ኢ ታ̈ብ ኪን ኢሺዬ ጌያ ቴ ቆፒ̇ዛ ሲላ̇̈ሳ ጎይባራ ዓና̇ ኪ̈ቲን ቃቢንባር ቴ ዪንታ̇ብ ጻ̈ፊኔ፤ ቴ ዪንታ̇ብ ጻ̈ፊኖንዳ̇ሬ ዪንታ̇ ዞራንዳብኬ ዓና̇ ኪን ጾ̈ሳ̇ ኮሺቲ ማ̈ቂ̇ኖን ዪንታ̇ብ ሶ̈ላንዳብ ጻ̈ፊኔ፤ ዪዚ ዓና̇ ጾ̈ሳ̇ ኮሺ̇ቲንባራ ሚ̈ጛር ኤቂ̇ብቴ።

¹³ ዪንታ̇ፌ̈ን ማራጺንቲ̇ኖን ባ̈ቢሎ̈ና ጋዳ̇ ዎ ዎሳ ኬ̈ንዳ ዪንታ̇ ሳሮ ጌይኔ፤ ታ ናኣ ማ̈ርቆ̈ሳሬ ዪንታ̇ ሳሮ ጌይኔ።

¹⁴ ካንባር ዎል ዎልኣ ዬርቂ̇ ሳሪብቴ። ክርስቶ̈ሳ ኣማ̇ኒዛን ዎይንቦ ሳሪቲ ማ̈ቆ̇።