1 ቆሮ 11 - ኦራ ጫ̈ቃ ማጻ̈ፋ1 ታ̈ኒ ክርስቶ̈ሲ ዎታዚንዲፌ̈ኒ ዎታ̈ሬ፤ ዓት ዪንታ̇̇ር ቴ ዎታዚን ዎቲብቴ። ጾ̈ሳ̇ ጎሽቲዝ ዎጋ 2 ዎይ ጋላስ ዪንቲ̇ ታ̈ብ ቆፓ̇ዚንኮታ̇ብኬ ዪንቲ̇ ታ ጋልዳፖ ሲስኪ̇ኖ ቲሚርቲ̇ን ሚ̈ን ና̈ጊሙታ ዎኮታ̇ቦ ቴ ዪንታ̇ ኣንጃ̈̇ሬ። 3 ማጫ̇ ጋልዳ ሲልጣ̇̈ና ዎዲ ኣቲናቦ፤ ኣቲና ጋልዳ ሲልጣ̇̈ና ዎ̈ዲ ክርስቶ̈ሳቦ፤ ክርስቶ̈ሳ ጋልዳ ሲልጣ̇̈ና ዎ̈ዲ ጾ̈ሳ̇̇̈ ባ̈ባቦ̈ ማ̈ቂ̇ኖን ዪንቲ̇ ኤራም̇ፔን ቴ ኮያ̈ሬ። 4 ፌ ቆሚ̇ን ጋልዳ ኣፊላ ጉ̈ሊንታ̇ሪ ዎ̈ሳ ዎ̈ሲ̇ዛ̈ዲ ዎይ ካ̈ያ ካ̈ዪዝ ኣቲኖ ዎይ ኢ ጋልዳ ሲልጣ̈ና ዎ ክርስቶ̈ሳ ዬ̈ሊ̇̈ሬ። 5 ፌ ቆሚ̇ን ጋልዳ ኣፊላ ጉ̈ሊንታ̇ካ̇ይዶራ ዎ̈ሳ ዎ̈ሳ̇ዚን ዎይ ካ̈ያ ካያ̈ዝ ኣሲንዳ ማጫ̇ ጋልዳ ኢ̈ብ ሲልጣ̈ና ዎ ኣቲና ዬ̈ሊ̇ሬ። ፌ ቆሚ̇ን ጋልዳ ኣፊላ ጉ̈ሊንታ̇ባሶ ማጪ̇ንዳ ኢዛ ፌ ቆሚ̇ን ጉልኪ̇ኖ̈ዲፌ̈ን ፋይዲንታ̇̈ሬ። 6 ማጮ̇ ፌ ቆሚ̇ን ጋልዳ ኣፊላ ጉ̈ሊንታ̇ብዳ ጌያ ኢጻ̇̈ርኮ ኢዛ ፌ ቆሚ̇ን ቃጻጋ̈ቤ፤ ዎቲናካር ማጮ̇ ፌ ቆሚ̇ን ቃጻ̇ዚንዳ ዎይ ጉልካ̇ዚንዳ ኢዝቦ ዬ̈ሊ̇ዝ ባዝ ማ̈ቃ̇ር ቤንቴጌይንዶ ፌ ቆሚ̇ን ጋልዳ ኣፊላ ጉ̈ሊንታጋ̈ቤ። 7 ኣቲኖ ጾ̈ሳ̇̇ ማልካዲኬ ጾ̈ሳ̇ ቦንቻ̇ ኢ ጋልዳ ቤንቲ̇ዛኮታ̇ቦ ፌ ቆማ̇ ጋልዳ ኣባክ ጉ̈ሊንታ̇ንዳብ ኮሺ̇̈ባ̈ሴ፤ ዎቲናካር ማጮ̇ ኣቲና ቦንቻ̇ቦ ኮቺንቲ̇ኔ። 8 ማጮ̇ ኣቲ̇ና ጋልዳፖ ኮቺንቲ̇ንዶኬ ኣቲኖ ማጫ̇ ጋልዳፖ̇ ኮቺንታካ̇ዬ። 9 ማ ማጮ̇ ኣቲናቦ ኮቺ̇ንቲ̇ንዶኬ ኣቲኖ ማጫ̇ቦ ኮቺንታ̇ካ̇ዬ። 10 ዪኒ̇ ጊሻብኬ ኪ̈ታ̇ንቻ̇ን ቤቃ̇ዚንኮታ̇ቦ ጋ̈ሪ ማጮ̇ ፌ ኣስናፖ̇ ጻና ማቂ̇ኖን ቤይሳንዳቦ ፌ ቆሚ̇ን ጋልዳ ኣፊላ ጉ̈ሊንታጋ̈ቤ። 11 ዎቲናካር ኑ̈ቦ ጎዳባር ዎ ፔቲ̇ቲን ጋርታ̇ ማጮ̇ ኣቲና ባይዶን ዶኣባሴ፤ ኣቲናር ማጫ̇ ባዪዶን ዶኢባ̈ሴ። 12 ማጮ̇ ኣቲ̇ና ጋልዳፖ̇ ቤንቲ̇ኖንዲፌ̈ኒ ኣቲ̇ናሬ ማጫ̇ ጋልዳፖ̇ ዬሊንቲ̇̈ሬ ዎቲናካሬ ዎይ̈ባዝ ቤንቲ̇ኖ̈ዲ ጾ̈ሳ̇̇ጋልዳፖ። 13 ዪዚ ዪንቲ̇ ፊርዲብቴ፤ ማጮ̇ ፌ ቆሚ̇ን ጋልዳ ኣፊላ ጉ̈ሊንታ̇ካይዶራ ጾ̈ሳ̇ ዎሳ̇ዚን ኮሻ̇? 14 ኣቲኖ ማጫ̇ፌ̈ን ፌ ቆም ዲቼ̇ጌይን ዬ̈ሊ̇ዝ ባዝ ማ̈ቂ̇ኖን ሚናፖ̇ ኤሪንቲ̇ኖ ባዝ ባያ? 15 ማጫ̇ቦ ቆሚ̇ ኢሚ̇ንቲ̇ኖንዳ ኢዝ ቆሚን ካጛምፔ̈ን ማ̈ቂ̇ኖኮታ̇ቦ ኢዛ ፌ ቆሚ̇ን ዲቼ̇ጌዪን ኢዝቦ ቦንቼ̇። 16 ባዝ ዓኒ ጎይባር ዋጫንዳብ ኮይዝ ኣሲ ዎኮ ኑ̈ናር ማ̈ቂ̇ን ዎይ ዎ̈ሳ ኬ̈ን ዎይን ጋርታ ዓና̇ ቴ ጌይኖምፖ ሜላ ዎጋ ኑ̈ብ ባዬ። ጎዳ ኢራታ ሙይዝ ዎጋ ማ̈ቶ̈ሳ 26፡26-29 ፤ ማ̈ርቆ̈ሳ 14፡22-25 ፤ ሉቃ̈ሳ 22፡14-20 17 ዪንቲ̇ ዎልኣ ሺ̈ቂ̇ኖፖ̇ ዎሃ ዎል ዎቲዝ ባዛ̈ዲ ኣስ ጎዳ̇ኢዝ ባዝዶኬ ኮሽ ባዝ ጊዳካ̇ዮኮታ̇ቦ ቴ ዓኒ̇ፖ̇ ጻና ዪንታ̇ብ ኢማ̇ዝ ቲሚርቲ̇ን ሶ̈ላ̈ርዶራ ዪንቲ̇ ኮሽ ኦ̈ኔ ጌያ ዪንታ̇ ኣንጂ̇ዝ ኣስ ጊዳካ̇ዬ። 18 ቲ̈ኒታር ቴ ዪንታ̇ብ ሶ̈ላንዳብ ኮያዚንዳ፥ ዪንቲ̇ ዎልኣ ሺ̈ቃምባ̇ራ ዪንታ̇ ጊዳ ፋጊቲ ዎን ቴ ሲስኪ̇ኔ። ቴ ሲስኪ̇ኖ ባዛን ጋርታ̇ፖ̇ ዶካ̇ን ኪን ማ̈ቂ̇ኖን ቴ ኣማ̇ና̈ሬ። 19 ዪንታ̇ ጊዳፖ̇ ኪን ማ̈ቂ̇ኖን ኢንቲ̇ ኦ̈ናኮ ኤሪንታ̇ምፔ̈ኒ ዪንታ̇ ጊዳ̇ ፋጊቲ ዶሲን ኢጺ̇ን ዶኣንዳ̇ብ ኮሺ̈̇ሬ። 20 ዪንቲ̇ ዎልኣ ፔታ̇ን ሺ̈ቃር ሞ̈ዚን ጎዳ ኢራታ ጊዳካ̇ዬ፤ 21 ኣባ ጌይን ዪንቲ̇ ሙይርዶሪ ፔታ̇ና̈ዲ ፔታ̇ና ና̈ጋካ̇ይዶር ፌ̈ብ ሙይሬ፤ ዪዚ ዪ̈ኒ̇ባራ ፔታ̇ና ጋፍሲንታምባ̇ራ ሜላ̈ዲ ማሲቲ̈ሬ። 22 ዪንቲ̇ ሞ̈ንዳ̇ብኬ ኡሽካ̇ንዳቦ ኣ̈ሊ ዪንታ̇ብ ባያ̇? ዎይ ዪንቲ̇ ጾ̈ሳ̇ ዎ̈ሳ ኬ̈ን ሌቃ̇ር ዎቲ̇ራ? ዎይ ዪንቲ̇ ዎርባያን ዬ̈ሊ̇ንዳብ ኮዪ̈ራ? ዪዚ ቴ ዪንታ̇ ኣብዝ ጋ̈ኖ? ባዝ ዪኒ̇ኮታ̇ ቴ ዪንታ̇ ኣንጃ̇ኖ? ዋኣኬ! ዪንቲ̇ ኮሽ ኦ̈ኔ ጌያ ቴ ዪንታ̇ ኣንጃ̇ባሴ! 23 ታ̈ኒ ጎዳ ጋልዳፖ̇ ኤኪ̇ኖ ቲሚርቲ̇ንዶ ዪንታ̇̇ብ ታማ̈ርሲኔ፤ ዪና̇ሬ፥ ኣሳን ጎዳ ዬሱ̈ሳ ዓይቃብ ኣ̈ ኢማ̇ዝ ጋላሲን ኦማ ኢ ሶ̈ሊ̇ን ዲንሪ፥ 24 ጋላታ ዎ̈ሳ ዎ̈ሲ̇ኖፖ̇ ዓኒ ዳርሳሪ “ዓና̇ ቴ ዪንታ̇̇ብ ኢማ̇ዝ ቴ ኣይሺ̇ንዶ፤ ዓኒ̇ባራ ዪንቲ̇ ታ̈ና ቆፒ̇ብቴ” ጌይዴ። 25 ዪና̇ ኢዝፌ̈ኒ ኢራ̈ቲን ሙይኖፖ̇ ዎሃ ጺዊ̇ን ዲንሪ “ዓና̇ ጺዊንባሮ ኡሺ̇ንዳ ቴ ቴ ሱ̈ንባር ዪንታ̇̇ብ ኤሲ̇ኖ ኦራ ጫ̈ቂንዶ፤ ዪንቲ̇ ኢዞ ኡሽኪ̈ርዶሪ ዎይ ጋላስ ታ̈ና ቆፒ̇ብቴ” ጌይዴ። 26 ዪንቲ̇ ዎይ ጋላስ ዓኖ̇ ሶ̈ሊ̇ን ሙይርዶርኬ ዓኖ̇ ኡሺ̇ን ኡሽኪ̈ርዶሪ ጎዳ ዬይዝ ዲራስ ኢ ዓይቂን ሶ̈ሊ̈ሬ። 27 ዪዚ ኦ̈ናካር ኣሲ ኢ̈ ሞ̈ንዳብ ቤይሳካ̇ዮ ጎይባራ ሶ̈ሊ̇ን ዓኖ̇ ሙዬጌይንዶ ዎይ ጎዳ ኡሺ̇ን ኡሽኬጌይንዶ ጎዳ ኣይሽኬ ሱ̈ን ጋልዳ ናጋራ ኦ̈ኖኮታ̇ቦ ኦይጪንቲ̈̇ሬ። 28 ኣሲ ኦ̈ናካሪ ማ̈ቂ̇ን ዪኖ̇ ሶ̈ሊ̇ን ሞ̈ናፖ̇ ቲ̈ንኬ ዪኖ̇ ኡሺ̇ን ኡሽካ̇ናፖ̇ ቲ̈ን ፌ̈ና ማራማ̇ሪ ቤቆ̇ጋ̈ቤ። 29 ኣባ ጌይን ኦ̈ናካሬ ጎዳ ኣይሺ̇ንዳ ኣብዝኮ ኢ̈ብ ጌላካ̇ይዶን ሙዪ ጎዳ ኡሺ̇ንዳር ኡሽኬጌዪንዶ ፌ ጋልዳ ፊርዳ ኤሄይሬ። 30 ዪንታ̇ ጊዳ̇ፖ̇ ዎይሊንን ዳቡሪኖንዳ፣ ማኖንዲኬ ማ ፔታ̇ን ፔታ̇ናን ዓይቂ̇ኖንዳ ዪ̈ኮታ̇ቦ። 31 ዎን ኑ ኑ̈ና ማራ̇ማ̇ሪ ቤቂ̇̈ርኮ ኑ ጋልዳ ፍርዲንቲ̇ባ̈ስዶን። 32 ዎቲናካሬ ጾ̈ሲ̇ ዓና̇ ኣላሚን ጋልዳ ዎ ኣሳን ጋልዳ ፊርዳምባ̇ራ ኑ̈ናር ኢንታ̇ባር ዎልኣ ፊርዲንታ̇ካዮ̈ዲፌ̈ኒ ኢ ዓት ኑ̈ና ዓጊ̇̈ሬ። 33 ዪዚ ቴ ኢሺንታን! ዪንቲ̇ ጎዳ ኢራ̈ታ ሞ̈ንዳብ ሺ̈ቃሪ ዎል ዎልኣ ና̈ጋር ሙብቴ̇። 34 ዪንቲ̇ ሺ̈ቃሪ ዎልኣ ና̈ጋካ̇ይዶር ሞ̈ዚምባራ ጾ̈ሳ̇ ፊርዳ ዪንታ̇ ጋልዳ ዬ̈ካ̇ዮ̈ዲፌ̈ኒ ጋፍሲንቲ̇ኖ ኣሲ ዎኮ ፌ ኣ̈ል ሙዮጋ̈ቤ። ዓኒ̇ፖ̇ ኣቲ̇ኖ ባዛንቦ ቴ ዪንታ̇ክ ኢና ሉካ̇ራ ዪንታ̇ ታማ̈ርሳንዳ̇። |