Usea 7 - Fanawbuid tagsibaliwas Fakayabian

¹ Kaylat koma gfafia ngay taw Israel, aroro ku nalag si anya fagmauriun way lang. Kanya fagayu gfandaya, ay gsakbo sa sangay bale laman nanfangkamul, ay nanfamalabag sa sangay dalan.

² Kanya fagayu wa gamatangan ya te, kwa ban kalyam at ngay fagmauriun. Anggan katsi, kanya fagayu gasalanan way gugat.

³ Kanya fagayu gfauseganan at fun ay at ngay tagfangguna siginan at ngay fagmauriun ay at fakamuagun.

⁴ Kanya fagayu sik takamabo way fag ngay taw. Ay kata sik tagfatama tinapay at faygangan at yud kalay ya siginan nu gfasigad gluag famabia tinapay yakmay kafag tinapay anbia.

⁵ Gina at fun at fangasalug fag menit, kanya fagayu nafainum fanlangu sas fun at ngay fagsuguan. Ay anggan at fun ginuman yangay gasfuan at ngay fagsuguan at yud gfadiuganan anya.

⁶ Ay kanya fagayu gina nangakbang sat fun ay sat ngay fagsuguan laman namabul, at amatanganan mauri mandi, kata sik faygangan at yud kalay ya. Kanya fagayu nu namawayan wan, gfalangfe yay sik yabi laman gfaksvn yay nu kauri, ay nu menit wan, mauri mandi at ngay amatanganan, at kaksvnan kata sik tagigang fag afuy.

⁷ Kanya fagayu nu kauri maksvn tua, at kaksvnan kata sik faygangan daul afuy ay gbia nu gigang. Nu katanya, kanya fagayu nafabul wan at ngay tagfangguna. Anggan at ngay fun anbul wan aroro nusdi sadi we naet gubuk sa angku.

⁸ Ngay taw Israel nanangagamut sa tibak furuan. Kanya fagayu we masuad, kata way sik fagfatamaun tinapay at mayangfis ay at yud nabiling ya.

⁹ Tibak talun we fagmabitsugun ya, dewa katanya, wa kasalag ya. Ay kata yangay sik taw at nangae ubanun, dewa katanya, wa kasalag ya.

¹⁰ At ngay fakamabatunun gfatuyan te, kanya ban fagayu nangafaurianan. Dewa katanya, kanya fagayu dewa nafaurianan, ya kafoli ay kakbang sa angku, at Dius Yawi.

¹¹ Kanya fagayu kata way sik labikung tagfangafalingunan ay at yud e fagsafulun. Kanya fagayu nananget oma gubuk sa sangay taw Igiptu ay sa sangay taw Asirya.

¹² Dewa katanya, kanya fagayu gina glao si sangaba dalan, nafaragang kway anya fagayu kata sik manuk tungud at nagamatan sis fanggamat ay naranggut au sat daga. Ay namaurianan au anya fagayu kata ebi ku nalong gina maful.

¹³ Kanya fagayu sik afanyuan fag ngay taw aroro anyayu siginan angku. Ay namamin kban anya fagayu aroro nafamabo angku. Kaylat koma ggubuk anya fagayu, dewa katanya, wa matuyan at ngay nalong sa angku.

¹⁴ Kanya fagayu wa matuyan dewa get gubuk sa angku. Kanya fagayu gwayway gina sit ngay igyan, ay gfaidapan at ngay sadili kaduge get fakonun ay fanginum sat ngay fagsegan.

¹⁵ Nafoyung koma anya fagayu sabaliwa nu kaksvn, dewa katanya, at algan at mauri way gugat sa angku.

¹⁶ Kanya fagayu nananget oma gubuk sat yud e tungkul fag ngay fakakbangan. Kanya fagayu kata way sik yud e masuad fag godun. At ngay tagfangguna anbul sas awayan aroro wa matuyan at ngay longan. Nu katanya, ngay taw Igiptu ban namalingun anya fagayu.