Usea 6 - Fanawbuid tagsibaliwas Fakayabian

Taw Israel wa Matuyan nu Gubun at Ngay Asalanan

¹ Ngay taw Israel gkamatoan te, “Gewan! Kafoli watam sas Yawi. Aroro kanya nafaurianan antam, kanya yangay ro at mafafia antam.

² Ay kata nu nbul watam, ay kanya yangay at mafaleleg antam, laman mabanwan tam sit daga salubangan.

³ Masine nu gugatan tam gtoglag Yawi. Matuyan, kanya umdasug wa fia kata menit nu kasure. Ay kata arak nu kadasug laman namarugme daga.”

⁴ Dewa katanya, Yawi nalong sas Israel ay sas Uda te, “Nataw ku fakamulun sa ayu? Nu kesug am angku wa matuyan, kata way sik ayuyus ay kata sik damug masakit kalyam.

⁵ Nu katanya, nafararang au sa ayu siginan ku ngay taglong at foyungan sa ayu te, namaurianan kban ay namabul ayu kasakit sik limbad.

⁶ Aroro ku fakaylatun, nu kesug tuam angku, bundi ay ngay fanggalangun. Ku fakaylatun, nu gtoglag am angku gtungud yap tua ay ngay fagirugun fag ngay fanggalangun.

⁷ Nafaning wayam Adan, wam nafaning tam nasadian. Natalyuyan am angku gina am si ay talun.

⁸ Furuan Gilyad, ngay taw way mauri ay takamabul at fagbanwanan.

⁹ Ay ngay tagfon fanggalangun kata sik ngay tagfangkamul tagfanya at fagnamauriun. Kanya fagayu gfabul wan ngay taw taglao sas Sekem, ay gfakamulun nusnga setaw fag mauri.

¹⁰ Ngay taw Israel, e nalag au si ayu at maksvn nu mauri. Gseg am sa tibak fagsegan, nu katanya, sik masuya wayam.

¹¹ Ay sa ayu fag ngay taw Uda, faurianan mafalganan wan. Ku fakaylatun ngvs ku ngay taw e fagmanabayanun tua.