Usea 5 - Fanawbuid tagsibaliwas Fakayabian

¹ Yawi nalong yangay te, “Ngay taw Israel, dungugani, anggan am fag ngay tagfon fanggalangun, ay am tagbanwan sis fun at bale daul, aroro kadasug sa ayu sik faurianan: fagayu am kata am sik sangdaw, aroro nasangdaw am ngay taw tagbanwan sis Mispa ay sis Tabur.

² Nafamabo am angku, ay kamabul, nu katanya, namaurianan kban ayu.

³ Saful kway ngay taw Israel at ngay fakamulun. Fagayu taw Israel at fakamulun we masuksukan sa angku. Gseg am tibak fagsegan, nu katanya, sik masuya wayam.

⁴ Ay mauri fag ngay fakamulun gsalag ayu laman wam kafoli sa angku. Aroro sik falad gfamatangan ayu laman gseg am tibak fagsegan, ay wam gtoglag te, au Yawi.

⁵ Ay fakamatungudunun gfatuyan te, masine nu gafaurianan am. Ngay taw Israel, umfaurianan am, anggan am ngay taw Uda, aroro sa ay ngay asalanan.

⁶ Dewa ban am gfon sa angku ngay tupa, ngay kambing, ay ngay baka laman ay fanggalangun ginam nangakbang sa angku, wa ban am lumag ku fagmasineun, aroro natalyuyan kwan ayu.

⁷ Nafamabo am angku siginan nu gsisian am siginan ay yud mangena. Nu katanya, namabul au ayu ay nanrasras ay ngay gamasun, gina ban am maful sabaliwa Magdanun nu Bagu Kasure.

Ngay Taw Uda ay ngay Taw Israel nu Gawayan

⁸ Uyupi ngay budyung laman sik famararang sa sangay taw Gibya ay Rama. Fadungugi sas Bet-Aben te, e awayan! Ngay taw Benamin, am at namangguna.

⁹ Talun Israel ban karasras gina gafaurianan fag menit. Anud, umfasludan ban ku longan sas Israel at ngay kasugfunanan.

¹⁰ Uda at ngay tagfangguna kata sik taw at nafalin at taba daga aroro naago ngay taw Israel at daga. Nu katanya, gfadasug kban sa anya ku dotama takata sik lugwak.

¹¹ E gfaidapan ban ay gfamin ngay taw Israel aroro gfaurianan au anya, aroro kanya gfataglayun nu gfaning tibak fagsegan.

¹² Namamin au ngay taw Israel ay Uda, kata ngay fatung nu gfamin sik bale.

¹³ Ngay taw ban Israel ay ngay taw Uda nu nalag nu gidapan gbanwan, Israel nanget gubuk sas Asirya at fun at mabalyanan, dewa katanya, kafag fun wa magubuk.

¹⁴ Aroro kata kban sik liun laman namabo Israel ay Uda. Namabul kban anya fagayu, ay namuba sa tibak talun ay wa ban e mafalangfe anya.

¹⁵ Sanya ginan, kafoli kwa ban sa ku bale kanya fagayu nu naubun wan at ngay asalanan. Ay gina ban gidapan, kanya fagayu nangakbang sa angku.”