Usea 4 - Fanawbuid tagsibaliwas Fakayabian

Yawi Nafayud ngay Taw Israel ay at ngay Tagfon Fanggalangun

¹ Ngay taw Israel, dungugani, Yawi gfayud ayu: “Fagayu am tagbanwan ste, wam matuyan, ay wam kesug ay wam gtoglag ya angku.

² Abat ngate, gfataglayun wayam glong at mauri sa ay iba, ay kamuag, ay kamabul, ay gfangkamul ay gfanugtug. Ay wam gfaning ya ku ngay faugali, ay wam gfaragang nu kamabul am.

³ Nu katanya, wa ban kafatugbung ya ngay fananumun sa ay daga, ay fagayu ban tagbanwan sanya maksvn nu kabalu, ay fagayu mangilafang, ay ngay manuk tungud ay anggan ngay albon, umbul wan.

⁴ Nu katanya, am fag ngay tagfon fanggalangun, lag am nanlong at yud matuyan sa sangay taw ay lag namauri, aroro am way ku fakauriun.

⁵ Ay kadasug ban sik buknga laman namaurianan au ayu fag ngay tagfon fanggalangun ay fag ngay taglong. Ay gfaurianan kyangay ban anggan ay mina fag talun Israel.

⁶ Ay gfaurianan kyangay ban ku ngay taw, aroro we fagsafulun sabaliwa angku. Aroro am oma fag ngay tagfon fanggalangun wam naylat fagsafulun, nu katanya, gfaurianan kyangay ban ayu. Ay wam yangay nafaning ku ngay suguan, nu katanya, gfaurianan kyangay ban ay ngay sisian.

⁷ Am fag ngay tagfon fanggalangun gina am ankayu, ankayu yangay ay ngay asalanan sa angku, ay natubus am angku, at matuyan fag Dius, sat yud e tungkul fag ngay fagsegan.

⁸ Ay naylat wayam ku ngay taw nu gasalanan, laman kayu ay ngay ramraman siginan nu gfon at ngay fanggalangun famalyam at ngay asalanan.

⁹ Nu katanya, nu nafaurianan kway ku ngay taw, gfaurianan kyangay ban anggan ayu. Nu mauri way ay nafakamulun, mauri yangay ban takadasug sa ayu.

¹⁰ Kon oma am, ay wam kapsug. Ay gseg oma am ay ngay fagsegan laman kae sisian am, dewa katanya, wa ban am kae sisian aroro natalyuyan am Yawi,

¹¹ ay naseg tibak fagsegan. Ngay taw Israel, at bagu ay at dan fag fanlangu gfauri ay ngay amatanganan.

Dius Kauri at ngay Taw nu Gseg Tibak Fagsegan

¹² Kanya gfamatang way ayu laman nanseg am sa sangay fagsegan at mawatan siginans kayu, ay gafanud am te, kanya ro fag ngay fagsegan gbalus tua ayu. Ay at mauri fag falad gfaylatan ay gtaban ayu, laman nanseg am kafag ngay fagsegan, nu katanya, natalyuyan am angku, kata sik takamatugtug fag mangena.

¹³ Ay glao am sa sangay tungud fungsu ay sa sangay buksul ay sa sangay daga kayu at marabung laman namon am ay fagirugun fag ngay fanggalangun. Nu katanya, ay ngay baguina nanamataladan ngay mangama, ay ay nugang fag ngay mangena kamatugtug.

¹⁴ Dewa katanya, kwa ban gfaurianan ay ngay baguina ay ay nugang fag ngay mangena, dewa nafakamulun takatanya, aroro am fag ngay mangama, nanamataladan yangay am takamatugtug fag ngay mangena, sis fagnansegan fag bale, gina am gfon ngay fanggalangun. Nu katanya, gfaurianan kban ayu aroro wam nasaful at matuyan.

¹⁵ Ngay taw Israel, dewa am natalyuyan angku kata sik mangena takamatugtug, lag am gfataip ngay taw Uda. Ay am fag ngay taw Uda, lag am glao sas Gilgal ay sas Bet-Aben laman nanseg angku, ay lag am glong ku ngayan gina am gfatuyanan.

¹⁶ Aroro ngay taw Israel kamaogatun at amatanganan, kata sik tumad baka tina at yud magup. Nu katanya, tain ro nu mafaulit au anya fagayu kata sik ngay tupa sas fagnamafangonan?

¹⁷ Kanya fagayu kaylat gseg tibak fagsegan, nu katanya, lag kasalag ya anya fagayu!

¹⁸ Kanya fagayu gina galangu, namataladan ngay mangena. Ay at ngay tagfangguna maksvn nu kaylat gfakamulun at mapla fag ngay fakamulun.

¹⁹ Nu katanya, sik tagridribudan ban fag tagmara namalayug anya fagayu, ay kanya ban fagayu umke fakaplaun aroro nafon ngay fanggalangun sa tibak fagsegan.”