Usea 14 - Fanawbuid tagsibaliwas Fakayabian

Usea at Foyungan sa sangay Taw Israel

¹ Usea nalong te, “Am fag ngay taw Israel, afolii wan sa ay Dius Yawi. Nafaurianan am aroro say asalanan.

² Afolii wan sas Yawi ay longi sa anya te, ‘Falyami wan em ngay asalanan, ay aylati emi kata am fagmasineun, laman mafauseganan ami emu.

³ Ay wami get ya fanggubukun siginans Asirya, ay wa yangay mi gseg ya em ngay tagfawayan tagsakayan sis kabayu. Ay wa yangay mi gngayan ya em nawat fag ngay fagsegan te, em ngay dius. Aroro anfanyu tuo emi kata sik ngay sisian at yud e fagtainan ya.’ ”

⁴ Dius nabalus te, “Gfalyam kban ku ngay taw at fakamaboun ay maksvn nu kesug au anya sas fagdaul ku amatanganan. Aroro nalyam wan ku dotama sa anya fagayu.

⁵ Ay gfon au at masine sa sangay taw Israel; kata au damug sa anya. Ay kabuskad kata at masine fag barugwak, ay kata sik tagbia fag fun kayu tangabasad nu glalid.

⁶ Kanya ban marabung tua, ay at kamasinean ban kata sik dingin, ay mabebanglu kata sik anangi.

⁷ Kanya fagayu gdog namanwan sanya fag ngay fun kayu at lanbung Kanya umkayu kata ngay tanum nu marabung, kanya ban umkayu kata fare, ay kata wat ubas nu gbarugwak. Ay kanya ban fagayu kadungug kata sik fanlangu tagsiginans Lebanun.

⁸ Ngay taw Israel, ayayui wan siginans ngay fagsegan. Ay gbalus kban ay ngay darangin, ay kafanyu kyangay ayu. Ay gufud kban ayu, kata sik fun dingin nu glanbung ayu. Au yangay tagfayu ayu.”

Taguyan fag Fangatulun

⁹ Am at ke fagsafulun, asafuli ay atogdungugi takatanya fagayu. Kasakan tua Yawi at ngay balyawvtan, ay at matuyan fag ngay taw gfaning tua, dewa katanya, kanya mauri way sa sangay taw takamabo.