Usea 13 - Fanawbuid tagsibaliwas Fakayabian

¹ Ebi taguna, gina Efraim at gaban nu garingang, tibak taw Israel gtadtaruyan kalimu famalag te, gsuyu Efraim at gaban. Dewa katanya, kanya fag ngay taw anke asalanan aroro gseg Baal, nu katanya, kanya fagayu anbul.

² Ay katsi, am fag ngay taw Efraim, gfataglayun yayam gfakamulun takatanya fag asalanan. Kawat am ngay fagsegan siginan ay ngay salapi. Ay dewa katanya, takatanya fagayu taw way at nawat. Ay e glong sabaliwa ayu te, ‘Kanya fagayu gfon taw sat ngay fagsegan riangan baka ay gayuk anya.’

³ Nu katanya, umkalyam ban am kata linyabu ay damug sbalabag, ay kata upa nu kalayug gina gtagmara, ay kata anus nu gduksun siginans faraungan.

⁴ Au ay Dius Yawi at nafalfas ayu siginans talun Igiptu. Wam e fagtoglagun ya tibak Dius at mafalangfe ayu, nu bunway au way lang.

⁵ Nalaga au ayu gina am sis talun yud e taw, sit matat fag daga.

⁶ Ay nafafangon koma ayu yakmay am napsug, ay nu nkapsug wam kamatungudun wayam ay nalyam am angku.

^7-8 Nu katanya, gfawayan kban ayu ay gfauri kata sik tagfangagat fag mela. Ay gfauri au kata sik usu nu e naago at riangan. Gfanya au ayu sis day dalan ay gfauri au ayu kata sik liun.

⁹ Gfamin au ayu ngay taw Israel, aroro au wan at nafalangfe ayu, ay dewa katanya, gfawayan wayam angku.

^10-11 Dada wan katsi ngay fun ay tiba yak tagfangguna ay namatangan te, kanya ro at mafalangfe ayu? Siginan ku dotama, nafon au ay fagetun, ay siginan yangay ku dotama, nabul au anya siginan ayu.

¹² Kwa kalyam ay ngay asalanan. Kata am sik rirukan at masifigan ay nasuksuk.

¹³ Andasug sa ayu sik anini kata sik mangena tagafasalugun, ay kata wayam sik ngenge at yud e fagsafulun. Nu ndasug nu gfasalug fag buknga, wa gduksun siginan at mina at ungdan.

¹⁴ Kwa ban gfalangfe ayu siginans fakabulun, abat ngate, glong kban sas fakabulun te, ‘Fakabulun, dada wan am famauri? Dada wan am famabul?’ Kwa kafanyu ya ayu.

¹⁵ Dewa am kata sik sigbo tagtugbung, gfadasug kban at masugba fag tagmara siginans fakamenitan, ay siginans talun at yud e taw, laman ay ngay bulbug ay anggan ay ngay bubun umlanggang. Ngay tagfangkamul ban gbul ay ngay ramraman.

¹⁶ Gfaurianan au ngay taw Samarya, aroro sat fakamaboun angku at Dius. Kanya ban fagayu umbul sas awayan. E gfafalang ban at ngay sisian sas daga yakmay anbul, ay e gfilas ngay tagfafion at ungdan.”