Usea 12 - Fanawbuid tagsibaliwas Fakayabian

¹ Ngay taw Israel gseg at yud e masuad. Fagngabak menit kanya fagayu gfafalo nusnge wain tagtaban anya sas faurianan. Kanya fagayu gtungud yay nu mauri ay nu kamuagan, ay nanangasadi sas Asirya ay talun Igiptu, nu katanya, kanya fagayu gfon sas talun Igiptu langis at yud e famayad.

² Usea nalong te, Yawi e ngay longan yangay laman sa sangay taw Uda, Akub at ngay sugfun. Ay gfaurianan ban anya fagayu aroro sat mauri fag ngay ugali, ay gfasud ban tagalvngvdan at nafakamulun.

³ Ebi, at fufuama Akub gina yay sit mina at ungdan, kaylat gdaya at kaka Isaw. Ay kanya nu nbia wan, nafagbuan Dius

⁴ siginan at tagbarita, ay nababo. Ay kanya gwayway gfainfanyu sanya fag tagbarita te, “Fadantei angku.” Kanya nalag Dius sis Betel, ay sanya Dius nafakamatoan anya.

⁵ Kanya Yawi, Dius at mabalyanan; katoglag siginan at ngayan te, Yawi.

⁶ Nu katanya, am Akub at ngay sugfun, afolii wan sas Dius, falagi anya te, kesug am anya ay masine wam sa anya. Fataglayuni nu gafanud am sa anya.

Dius at Famayud Anfamut sas Israel

⁷ Dius glong te, “Ngay tagfaebayad gananad kamuag. Kanya fagayu gagbilug at yud matuyan fag famabudbungguan.

⁸ Am fag ngay taw Israel, kamatungudun am glong te, ‘Nafaful ami ramraman, ay katsi, maramraman wami. We malong ya te, anramraman ami siginan at mauri fag ngay balyawvtan, aroro nasaful waymi te, takatanya asalanan.’

⁹ Nu katanya, au wan ay Dius Yawi at nafalfas ayu siginan talun Igiptu ay nu katanya glong au te, gdog kban gfabanwan ayu sa sangay fayag at nafalindug galay buknga fag fagmafulun sabaliwa nu Kawat ngay Fayag.

¹⁰ Nafakamatoan au sa ay ngay taglong, ay nafalag au sa anya fagayu ngayuk taginfan. Ay siginan anya fagayu, nafadasug au sik famararang te, gafaurianan waban am fia.

¹¹ Dewa katanya, ngay taw Gilyad gfataglayun yay gugat at ngay fagmauriun, ay kata way nu yud e masuad. Ngay taw Gilgal gfon ngay tama baka sat ngay fagsegan, ay nu katanya, gfarasras au at ngay fagirugan fanggalangun, ay umkata ban sik nafaful fag ngay gang gina naali at gamasun.

¹² Akub nalagyu wan ay nalo sas Aram, ay sanya at fakamulun sik tagalaga tupa laman mafamubay.

¹³ Siginans Muisis fag taglong, nafalfas au ayu siginans talun Igiptu ay naulit.

¹⁴ Aroro ay nafabul ngayu, nafadotama am angku ay Fun. Nu katanya, gfaurianan kban ayu, ay gfasud kban ayu aroro nafauri am angku.