Usea 10 - Fanawbuid tagsibaliwas Fakayabian

¹ Ebi, ngay taw Israel kata sik ngay tanum wat ubas mataglu ay marabung ay at rawvg ngayu tua. Dewa katanya, kaduge kanya fagayu ankayu, kayu yangay nya at nawat fag ngay fagirugan ay gfasine at fagsegan fag ngay gang.

² Ay kanya fagayu kamuag wan, ay katsi kanya fagayu gafaurianan aroro sat ngay asalanan. Dius nanrasras at ngay fagirugan fanggalangun ay at fagsegan fag ngay gang.

³ Anud, sa ban taguyan, kanya fagayu glong te, ‘Wami kaylat sik fun aroro wami kalimu Yawi. Dewa ami e fun, kanya we fakamulun at masine laman sa emi.’

⁴ Kanya fagayu garingang way lang, dewa katanya, we fakamulun. Kanya fagayu kamuag nu gfatuyanan, ay dewa e nasadian, wa gfafasludan. Ay nu katanya, at ngay mamalong kata way sik maganga fag makmak tagtugbung sit naali fag daga.

⁵ Ngay tagbanwan sis Samarya kalimu, aroro at ngay fagsegan fag baka tina tumad sis Bet-Aben umkalyam ban. Ay at ngay tagfon fanggalangun taguseganan sat ngay fagsegan at kamasinean gwayway ban, aroro gbul siginan anya at ngay fagsegan,

⁶ ay gbuba sas Asirya laman sik famonun sat mabalyanan fag fun. Ay nu katanya, ngay taw Israel umkapla aroro gafanud sat ngay fagsegan.

⁷ Ay at fun ban kalyam kata sik kayu takalimus.

⁸ E rumasras ban at ngay bale fagnansegan si tangabat fag buknga sis Aben, tagfae asalanan ngay Israel. Ay at ngay fagirugan fanggalangun umfaut wan siginan at madugi fag ngay makmak. Ay kanya fagayu glong ban sa sangay buksul te, ‘Fakwani wa emi.’ ”

Nafaurianan ngay Taw Israel

⁹ Dius nalong te, “Am fag ngay taw Israel, gfataglayun wayam gugat gasalanan siginan ebi ay ngay mangaguyang nu gasalanan sis Gibya, ay wam gtubus ya. Nu katanya, am wan fag ngay tagfakamulun at mauri, e gfawayan ayu sis Gibya.

¹⁰ Kaylat kwan gfaurianan ayu. Nu katanya, tiba tibak talun nangaful laman namawayan ayu, aroro gfataglayun wayam gasalanan.

¹¹ Ebi, kata tuam sik tumad baka tina at nafananad, ay takaylat gruyus. Dewa katanya katsi, gfaurianan au ayu fag ngay taw Israel. Anggan am fag ngay taw Uda, umkata wam sik tumad baka tina at yud batang e fantungud liug sit masine fag liug, ay gidapan gguyud fangali daga.

¹² Glong au ayu te, falukmei wan ay ngay amatanganan kata sik naali fag lutuk. Ay tanumi fagmatuyanun ay gumutlu ban am fakesugun. Aroro buknga wan nu kafoli am sa angku yakmay kban andasug, ay namakamulun au sa ayu at matuyan.

¹³ Dewa katanya, natanum wayam fagmauriun, ay ay nagutlu fagmauriun yangay. Nafamuag am, ay fakauriun way at rawvg. Aroro sa ay fagafanudun sa ay sadili fagmakatuun, kata nangus nu ngayu ay ngay tagfawayan,

¹⁴ kadasug ban sik awayan sa ay ngay taw, ay karasras ay ngay furuan ayu daul at maaladan. Am ngay fawayan gfakamulun kata Salman at nafakamulun sis furuan Bet-Arbel, gina kanya nafatong ay nafabul at ngay talnayan.

¹⁵ Katanya yangay ban takadasug sa ayu ngay taw Betel, aroro maksvn ay fagmauriun. Ay gina gakamenitun wan, matuyan taw Israel at fun umbul wan.”