Unas 4 - Fanawbuid tagsibaliwas Fakayabian

Unas Andotama aroro Yawi Anfanyu Furuan Ninibe

¹ Unas maksvn nu kadotama aroro Yawi wa nafataglayun nu gfaurianan furuan Ninibe.

² Nu katanya, Unas nalong sas Yawi te, “Yawi, matuyan ebi ku nalong gina au si em furuan te, nangafanyu o kafag ngay taw tagsis Ninibe nu gubun tua at ngay asalanan, aroro nasaful kwa te, sik Dius tuo at mafangafanyu ay at mafangamatang. Ay mafangesug tuo ay di o gfangadotama. Ay mafalganan tuo gfabali am amatanganan laman di o namaurianan. Kanya wan ku fagnalagyuun sas Tarsis.

³ Yawi, fabuli wan angku, aroro kaylat kwan nu gfabul o angku nu gamut nu gleleg au.”

⁴ Yawi nabalus te, “O maksvn nu kadotama o ku nafakamulun sas furuan Ninibe?”

⁵ Ay Unas nasas day furuan ay nananmalunggung sas fakamenitan baliwa. Ay kanya nawat at fagfalanbungan ay gfalanbung sanya kaduge gfanya takafasludan sa kafag furuan daul.

⁶ Ay Unas karoy, nu katanya, Yawi nafatugbung sik tanum at kabatan abat yap tua sik taw laman famalanbung Unas. Ay Unas maksvn nu guseganan.

⁷ Ay balabag di sbalabag, Dius nafadasug sik basul at nangon kanya fag tanum, ay kafag tanum anlangke.

⁸ Ay menit nu nsure, Dius nafadasug sik masugba fag tagmara siginans fakamenitan. Ay maksvn nu maroy, at kaksvnan, Unas arvs anranug. Kanya kaylat wan nu kabul, ay nalong te, “Fabuli wan angku nu gamut ro nu gleleg au.”

⁹ Dius nalong sas Unas te, “O maksvn nu kadotama o at kindasug sanya fag tanum?” Ay Unas gbalus te, “Sabv, maksvn nu kadotama au, fabuli wan angku.”

¹⁰ Yawi nalong sas Unas te, “O nunda wo nfangulan kafag tanum nu gtugbung at kadugean sik yabi way ay balabag di fag yabi anlangke wan, ay kanya bunwa am natanum ay am nafatugbung?

¹¹ Aksvn yap tua kanya nu gafangulanan au furuan daul Ninibe at taw. Kanya fagayu at kayuan ayu yap tua sadik sandan duak safuluk libu, ay kanya fagayu ya nasaful sabaliwa at masine ay at mauri. Ay sanya yangay ngayuk fagbaugun.”