Unas 3 - Fanawbuid tagsibaliwas Fakayabian

Unas Nalao sas Ninibe

¹ Yawi gdog yay glong sas Unas te,

² “Loi wa vtv sas furuan daul Ninibe ay namoyung o kata ku nalong emu.”

³ Ay Unas nafaning Yawi at suguan anya. Ninibe sik furuan daul; at kadaulan nu e glao gfafagdaul, tuluk menit.

⁴ Ay Unas nasakbo sas furuan Ninibe. Ay at nalao nu sik menit wan, kanya nauro sa sangay taw tagbanwan sanya te, “Ufat way langk safuluk menit ay furuan gafaurianan wan.”

⁵ Ay sanya fag ngay taw anke fagafanudun tua sas Dius. Nu katanya, fagayu taw at maramraman, ay anggan at yud e fagmakatuun, e buknga nu yud gfangon laman gdarangin, ay nasulun saku laman gfalag te, gubun at ngay asalanan.

⁶ Ninibe at fun nu nadungug Unas at foyungan, kanya anlindug siginan at fagmalunggungan ay nabul at lanbung tagfatoglag te, sik fun, ay nasulun yangay saku ay nananmalunggung sas tagalukbuun fag daga laman gfalag te, gubun at asalanan.

⁷ Ay kanya nasugu laman gfoyung sa sangay taw Ninibe te, “Katatuy Ninibe at fun ay anggan at ngay tagfangguna at suguan: wam masine gfangon ay ginum, anggan ay ngay baka, tupa ay kambing.

⁸ Fagayu am, suluni saku ay faksvni nu gdarangin am sas Dius. Ay ubuni wan ay ugali at mauri ay anggan ay fakamawayanun,

⁹ bangaran ban Dius nafabali yay at amatanganan ay nafalyam yay at maksvn fag dotama sa antam ay di ban namamin ya antam.”

¹⁰ Dius nalag kafag ngay taw Ninibe nu gubun at ngay ugali at mauri. Nu katanya, kanya nafabali tua at amatanganan, ay di nafaurianan anya fagayu kata ebi at longan.