Unas 2 - Fanawbuid tagsibaliwas Fakayabian

Unas Gdarangin

¹ Ay Unas gdarangin sat Dius Yawi gina sis albon at ungdan.

² Katatuy at darangin, “Yawi, gina au gidapan nadarangin au sa emu ay nabalus tuo angku. Gina au swabilug fakabulun naet au sa emu gubuk ay nadungug tuo angku.

³ Nafaukas o angku sas fagngabasadan dagat, ay anlubgub au sam nafadasug fag lugwak.

⁴ Ay naiyan o angku siginan am daga salubangan, dewa katanya, e fagsegun kyay gdog nangakbang sa emu, sam bale yud e malong.

⁵ Ay anlubgub au, ay arvs napnut kwan. Ay anfalyu au sas mamam, ay ngay makmak tagsis dagat nasafung ku alfuyu.

⁶ Ay anlubgub au sas fagngabasadan dagat, ay kata nu maubungan au sa sik tangabasad fag lusung at yud e fakatabuan. Dewa katanya, Yawi, ku Dius, nalakwi tuo angku siginans fagngabasadan dagat.

⁷ Yawi, gina au gakabulun, nauro au emu, ay nadungug tuo ku darangin sim bale at yud e malong.

⁸ Ngay taw tagseg at yud e tungkul fag ngay fagsegan, wa kesug emu.

⁹ Dewa katanya, au ban nangalubad ktua sa emu sik mauseganan fag alubad. Ay namafasludan kban ku ngay fatuyanan te, namon au sa emu fanggalangun. Yawi, o wan ku tagfalangfe.”

¹⁰ Sanya ginan, Yawi nasugu kafag albon laman namangkok Unas sas tigyangan dagat.