Uel 3 - Fanawbuid tagsibaliwas Fakayabian

Yawi Namaurianan ngay Talun

¹ Yawi nalong te, “Gina kban nafafoli sas Uda ay sas Erusalem at fagmanabayanun,

² namaful kban ay nantaban tibak talun at ngay taw sas datag Eusafat. Ay namaurianan kban anya fagayu, aroro sat nafakamulun mauri sa ku ngay taw Israel. Kafag ngay taw nataban ku ngay taw sa tibak talun ay nafudan at daga.

³ Kanya fagayu nafafidfilian laman namasaruayan ku ngay taw, ay nafaebayad at ngay sisian mangama ay mangena laman sik ngay fagsuguan, laman e famayad fanlangu ay tagfaebayad fag ngay mangena.

⁴ “Fagayu am tagsis Tiru ay Sidun, ay anggan am fag ngay furuan sis talun Filistia, wain ay fagnafakamulunun takatanya sa angku? O gfasud am ku nafakamulun sa ayu? Nu katanya, namasud kyangay tagalvngvdan ay nafakamulun.

⁵ Aroro nabul am ku fagagbilugun fag sanbung salapi ay gintu, ay nusnga setaw at mafanud, nabuba am sa ay fagnansegan.

⁶ Ay nafae bayad am ngay taw Uda anggan ngay taw Erusalem sa sangay taw Gresya laman sik ngay fagsuguan ay nafayayu am anya fagayu siginan at talun.

⁷ “Dewa katanya, nanggubuk au anya fagayu laman malao siginans ngay furuan nu inda nu gfae bayad am anya, ay namakamulun au sa ayu kata ay nafakamulun sa anya.

⁸ Namae bayad au ay ngay sisian sas talun Uda ay kanya fagayu namae bayad yangay anya sa sangay taw Saba tagbanwan sa tangayayu fag talun. Kanya umfasludan aroro au Yawi taglong tuy.”

⁹ Fasafuli sa sangay talun at ngay taw te, “Falganani ay ngay sadili. Uroi ay ngay tagfawayan laman namawayan.

¹⁰ Ay ngay fangali daga awati sik ngay fiso tagsumbalian at uyup, ay ngay fanggafas awati ngay bangko. Dewa at ngay mamomuy fag ngay taw makatu way gfawayan.

¹¹ Gewan, ngay taw siginan tibak talun, nangaful am sas datag Eusafat.” Yawi, fasanyai wan am ngay tagfawayan.

¹² Yawi nalong yay fia te, “Fasafuli sa sangay taw tagsiginan tangayayu fag ngay talun te, loi sas datag Eusafat ay sanya nu namaurianan au anya fagayu.

¹³ Kanya fagayu kata sik faggutluun at masine kagutlu, ay mannga kata sik ubas at rawvg at masine gturis, aroro ankapnu wan sa sangay fagturisan. Kanya fagayu maksvn nu mauri; at ngay asalanan kata sik naturis fag rawvg ubas tagsawe wan sit ngay fagsuadan.”

¹⁴ Ngayu wan at ngay taw sis Fagfawabiluganan fag Datag, aroro munakbang wan Yawi at nafili fag menit nu namaurianan ngay taw.

¹⁵ Ginanya ban, menit ay magdanun umdulum, ay ngay galeme wa gyamag ya.

¹⁶ Yawi ban at aringang gbia kata sik lingsi siginans Buksul Siun. Nu katanya, daga ay banwa muigan. Dewa katanya, Yawi wan ngay taw Israel at mogat fag fagsarigan.

Famonun sas Dius at ngay Taw

¹⁷ Yawi nalong te, “Ngay taw Uda, ginanya ban sumaful am te, au wan ay Dius Yawi tagbanwan sis Buksul Siun at yud e malong. Ay Erusalem ban umsik yud e malong, ay tiba bank talun at ngay tagfawayan wa manamawayan ya ayu.

¹⁸ Ginanya ban fag buknga, umramraman am. Ay umkapnu ban sa ay ngay fagsuadan ngay fanlangu siginans wat ubas. Ay umkayu yangay ban ay ngay baka ay ngay kambing sa sangay fagnamafangonan. Ay ay ngay liskung ban di kalanggang. Ay e gbulbugan ban siginans Yawi at bale ay nanfamilugan sa sangay fun akasya fag datag.

¹⁹ Igiptu ban umsik mabalu fag talun ay Edum ban umsik yud e taw fag talun, aroro nafaurianan ngay taw Uda, ay nafabul ngay taw at yud e asalanan.

²⁰ Dewa katanya, Uda ban ay Erusalem umsik mabayan fag fagbanwanan kabavn.

²¹ Namasud kban at nafabul ku ngay taw. Ay namaurianan kban at nafakamulun takatanya. Au Yawi tagbanwan sis Siun.”