Uel 2 - Fanawbuid tagsibaliwas Fakayabian

Ngay Liung nu Namamin ngay Tanum

¹ Uyupi ay budyung laman gfararang sa sangay taw tagbanwan sis Siun, sis Yawi at nafili fag buksul. Am fag ngay taw Uda alimui, aroro munakbang wan Yawi at nafalganan fag menit laman namaurianan.

² Ginanya ban fag menit, glinyabu ay madulum. Ngay liung ban kadasug ay nangarapyag sa sangay buksul gina gakamenitun. Ya batang e nfasludan takaksvn nya ay wa ban umfasludan ya takatanya kabavn.

³ Ngay liung masakit nu gfamin ngay tanum kata afuy nu girug. Gina kafag ngay liung kadasug, kafag talun masine oma kata tanuman Eden. Dewa katanya, ngay liung nu naon wan we fasawadan ya, ay ankata way lang at yud e taw fag talun.

⁴ Kafag ngay liung at kawalungan ay at kasakitan kata kabayu.

⁵ Ay kafag ngay liung nu gliptuk sa sangay tungud buksul grvtrvtan kata ngay kabayu at faguyudan nu garinggit, ay kata ngay nagutan nu gigang. Kanya fagayu kata sik ngay tagfawayan at maseganama ay at mafalganan laman namawayan.

⁶ Nusnga sinu fag taw at nalag kafag ngay liung maksvn nu kalimu.

^7-8 Kanya fagayu kata ngay tagfawayan nu gfawayan, ay nu ggaygaritan sa sangay alad. Ay nu glao gturunan ay di gsidsikfitan. At ngay fawayan dewa gfana, kanya fagayu di gsaruayan.

⁹ Kafag ngay liung namawayan furuan ay nangkato sa tangabat fag ngay alad. Ay nangkato yangay sa sangay bale, ay gdalan sas fagbanawanan kata sik tagfangkamul.

¹⁰ Gina kafag ngay liung andasug, daga ay banwa nauigan. Menit ay magdanun andulum, ay ngay galeme wa gdamlag ya.

¹¹ Yawi at aringang kata sik lingsi gina gsugu at ngay tagfawayan at maseganama ay tangayu. Ay kanya fagayu gfaning tua at suguan. Yawi at nafalganan fag menit gina ban namaurianan maksvn nu malimu. Sinu ro at magwanta?

Guro Laman Kafoli sas Dius

¹² Yawi nalong te, “Afolii wan sa angku sas fagdaul ay amatanganan; siginan nu yud am gfangon laman gdarangin, ay nu gwayway am, ay nu kabalu am.”

¹³ Ubuni wan ay fagmauriun sas fagdaul ay amatanganan siginan nu ggirat am ay ngay lanbung, laman gfasaful am sa sangay taw te, gubun am ay ngay asalanan. Afolii sa ay Dius Yawi, aroro kanya mafangafanyu ay mafamamatang, ay mafangesug ay di masakit gfangadotama. Ay mafalganan tua gfabali at amatanganan laman di gfadasug ngay faurianan.

¹⁴ Tibaginan ro, Yawi gfabali yay at amatanganan, ay gfon ayu ngayuk gutluan, laman e fon tuam sa anya ngay fanggalangun fag ngay rawvg ay ngay fanlangu.

¹⁵ Uyupi ay ngay budyung sas talun Siun ay famasaful sa sangay taw te, afuli laman e buknga am yud gfangon laman gdarangin.

¹⁶ Afuli tua laman gfalganan am ay sadili: ngay sisian, ngay mafagtainan, ngay bagu kasalug, ay at ngay bagu kadadwa.

¹⁷ Am fag ngay tagfon fanggalangun tagfakamulun sis Yawi at daga salubangan, waywayi sis buknga fagirugan ay Yawi at bale at tangbi ay darangini te, “Yawi, afanyui am fagagbilugun fag ngay taw. Lag kaylat kanya fagayu nu gafaplan ay nu gagbilugan tibak talun at ngay taw taglong te, ‘Dada wan ay Dius?’ ”

Yawi Ggubuk ngay Taw Uda

¹⁸ Yawi maksvn nu kesug ay nu kafanyu at ngay taw.

¹⁹ Ay kanya nabalus at ngay taw at darangin, ay nalong te, “Namon kban sa ayu ngay rawvg, fanlangu, ay langis, laman umkapsug am. Kwa kaylat tibak talun at taw nu gfalingun ayu.

²⁰ Ay at namawayan ban ayu fag ngay taw tagsiginans fawalan fag alvngvdan baliwa, nangaiyan kwan ay namasas talun at yud e taw. Taguna ban fag gaban namasa kwas Dagat at Mabulan. Ay taguyan ban fag gaban namasa kwas Mediteranyu fag Dagat. Ay kanya ban fagayu nu nbul, umbasung.” Nu katanya, maksvn nu madulo Yawi at nafakamulun.

²¹ Ngay taw Uda, lag am kalimu! Abat ngate, useganani tua, aroro Yawi at nafakamulun maksvn nu madulo.

²² Tagsis talun fag ngay mangilafang, lag am gafanawa ya aroro ngay makmak gtugbung wan, ay anggan ngay kayu igus ay wat ubas grawvg wan.

²³ Am fag ngay taw tagbanwan sis Siun, useganani sa tam Dius Yawi, aroro nafadasug sa ayu taguna fag arak laman gfalag te, matuyan. Kanya gfadasug tua gugat taguna ay taguyan fag arak kata ebi ginan.

²⁴ Ngay fagruyusan ban umkapnu ngay gutluan, ay fanlangu ban ay langis, gsawe sat ngay fagsuadan.

²⁵ Ay Yawi nalong te, “Gfafoli kwan sa ayu ay ngay tanum ngay liung at naon. Au wan at nafadasug sa ayu ebi fag ngay liung.

²⁶ Siginan ban katsi, ngayu ay fakonun ay kapsug tua ban am gugat. Nu katanya, kabavn gfauseganan tua ban am angku. Au wan ay Dius Yawi, at nafakamulun at ngay madulo sa ayu. Ay kabavn ban, diam gafaplan.

²⁷ Nu katanya, sumaful am te, si ktua gugat ayu fag ngay taw Israel. Au wan ay Dius Yawi. Ay kabavn ban, diam gafaplan.”

Fanfalad fag ngay Famonun

²⁸ Sanya ginan, namon kban ku Falad sas nusnga sinu fag taw. Ay ay ngay sisian ban namoyung ku ngay longan. Ay ay ngay fagtainan ban umke ngay taginfan. Ay ay ngay baguama ban lumag ngay taginfan.

²⁹ Ginanya ban fag ngay menit, namon kyangay ku Falad sa sangay fagsuguan.

³⁰ Namasure kban ngay madulo sas banwa ay sas daga kata taguk, ay afuy, ay at maksvn fag anus.

³¹ Ay menit ban umdulum ay magdanun ban umraska kata taguk. Yawi ban namafasludan fagayu takatanya gina andasug at nafalganan fag menit nu namaurianan ngay taw.

³² Ginanya ban, nusnga sinu fag taw taget gubuk sas Yawi, umlangfe sanya ginan fag faurianan. Aroro Yawi nalong te, umke sawad yay ban ngay taw Israel sis Buksul Siun, at masuad te, Erusalem. Kanya fag ngay taw Yawi at nafili ay at nafalangfe.