Ub 9 - Fanawbuid tagsibaliwas Fakayabian

Ub Naringang

¹ Ub nabalus te,

² “Matuyan am nalong, dewa katanya, sinu at mafatuyan te, kanya we asalanan sas Dius?

³ We fagmafakamulunun nusnga sinu takaylat gfabadbaboan Dius, aroro sa sik libuk fagintoun siginans Dius, we mafabalus nusdi at sadi.

⁴ Dius e fagsafulun ay e fagmabalyananun. Sinu yaro at mafawayan ay siwa anya fagmababoun?

⁵ Kanya nauig wa vtv ngay buksul, ay at kaksvnan nu kadotama kanya narufa wan kafag ngay buksul.

⁶ Kanya mafauig daga, anggan at fagtungkudan.

⁷ Kanya nu nasugu way, menit wa kasure ay galeme wa gdamlag.

⁸ Kanya tua at narafad banwa ay at mafaragang lugwak.

⁹ Dius wan at nawat ngay tagfulan fag ngay galeme, at ngayan Usu, Uryun, ay Pleyades, anggan ngay galeme tagsabaliwas fasiunan fag alvngvdan.

¹⁰ Dius gfasure nusnga setaw at madulo tam fagyudun saful, ay at ngay madulo yud e mafatap ya at kayuan.

¹¹ Dius nu nadalan sa angku, kwe nalag ay kwe namatang ay dewa nadalan sa ku akbang, kwa nasaful.

¹² Kanya nu e fakaylatun gbul we masalag anya. Nu katanya, sinu yaro at mafamayud sat ngay nafakamulun.

¹³ Dius nu ndotama wa gfaragang ya. Dewa Rakab fag fagsegan takatas ule daul at ngay fagsuguan garungan nu kalimu Dius.

¹⁴ Nu katanya, tain ro nu gbalus au Dius, ay daginan ro sik longan laman ku famabadbaboan anya?

¹⁵ Deyud kro e asalanan, kwa mabalabag ku sadili, ku balyawvtan namainfanyuan kway sas Dius ku taginsaful.

¹⁶ Dewa au get sa anya te, gkamatoan ami, ay dewa naylat, kanya ro wa gdungugan angku.

¹⁷ Aroro kanya gfaidapan angku kata fulug nu gfae fagidapun. Ay kanya nafamut yay ku fagidapun, dewa au yay e malong.

¹⁸ Arvs kwa maengasan ya aroro sat nafadasug fag fagidapun sa angku.

¹⁹ Nu sa baliwas fagmagarasun, we mababo anya. Ay nu nasas fagfawabiluganan, sinu at mafabadbaboan anya?

²⁰ Kdoma e asalanan, dewa katanya, kafaurianan kway siginan ku ngay nalong.

²¹ We fanambagun sa angku dewa au yud e asalanan. Kauri kwan ku leleg.

²² At masine ay at mauri fag taw gsudan way. Aroro ngap gsud way gafaurianan.

²³ Sik faurianan nu ndasug ay masakit nafabul at matuyan fag taw, Dius gfalingun kafag taw nu yud e fagsegun ya.

²⁴ Kanya nafatigwanan fagdaul daga sat mauri fag ngay taw, ay kanya nataup ngay tagfawabilugan at ngay mata laman wa matuyan ya nu ginsaful. Nu dway Dius at nafakamulun tuy, sinu tua ro?

²⁵ Ku ngay menit masakit kata sik taglagyu, ay kalangfe way vtv, ay we nfasludan at masine.

²⁶ Ay nu glangfe masakit mandi, kata at masakit fag sakayan lino, ay kata sik bio tagabanganan nanyukfu at fagnangagatun.

²⁷ Nafaragang koma nu gfandeng au ay gidapan, ay guseganan koma,

²⁸ dewa katanya, kalimu kyay gugat ku ngay nadalan fag ngay fagidapun, aroro ngap nasaful au te, kanya gtap angku te, sik tagasalanan.

²⁹ Kanya nu glong di te, e asalanan kyay, wain yaro ku fagfabadbaboanun yay gugat laman sa ku sadili?

³⁰ Dewa ro au nasugbu fagdaul ku bilug sasad lino, ay nafegus ku ngay daluap,

³¹ kanya ngap namatong yay gugat angku sat malifak fag alian, dewa ku sadili lanbung kapla kway.

³² Dius bundi sik taw kata angku, laman mabalus au anya, kwa yangay mabalus ay mafasas faginsafulan.

³³ E nanwabilug nangus emi laman namasadi emi fagdua.

³⁴ Kanya nangus gfaragang Dius nu gfalang angku, laman kwa kalimu ya.

³⁵ Ay nu katanya tua ro, kwa kalimu ya namakamatoan anya, dewa katanya katsi, kya mafakamulun takatanya.