Ub 8 - Fanawbuid tagsibaliwas Fakayabian

Bildad Naringang

¹ Bildad tagsiginans furuan Sua nabalus te,

² “Seduge ya ban nu garingang o takatanya? We masuad am ngay aringang.

³ At mabalyanan fag Dius wa yud gfae masuad fagmatuyanun ay fagmasineun.

⁴ Am ngay sisian anke asalanan sas Dius, nu katanya, at kindasug fag faurianan kasakan way sa anya fagayu.

⁵ Dewa katanya, nu kakbang tuo sas Dius ay gfainfanyuan get sa anya,

⁶ ay nu gugali tuo at matuyan ay at masine, Dius ggubuk ay gfafoli emu kata ebi ginan am kayaunanan.

⁷ At fagnamonun sa emu fag ramraman gtungud tua ebi am ramraman.

⁸ Ay intoi sat ngay mafagtainan ay nanginsaful o sabaliwa at ngay mangaguyang at fagsafulun.

⁹ Aroro kata yay nu yud glugo nu kasalug tam ay kurang yay tam fagsafulun, ay tam ngay menit ste swa daga kata way sik aninu at masakit kalyam.

¹⁰ Ay dungugani kanya fagayu nu glong sa emu at ngay fagsafulun.

¹¹ Sik tanum tagsisad mamam kayango way nu dway e mamam ya.

¹² Kanya fag tanum kalangke wa vtv dewa bagu gtugbung deyud buknga famulan.

¹³ Katanya yay sik taw at natalyuyan Dius, wa ban e fagsegun ya.

¹⁴ Kanya at ngay fagsegun umrasras ban kata sik baginawa at bale.

¹⁵ Ay kanya nu nasarare sanya fag bale kasuak way, ay nu ndafut kagatvng way vtv.

¹⁶ Ngay taw nu glag, kanya masine tua at kayaunanan, kata sik tanum at marugme ay menit at fagdamlagun tua gugat, ay at ngay sanga glangfad sas fagdaul tanuman.

¹⁷ At ngay lalid gulitan gang, ay kaylat sa tagagangun.

¹⁸ Dewa katanya, nu e nagunut wan, nalyam wan.

¹⁹ Katanya yangay at leleg at fakatabuan, ay e sik tanum natubus yay anya si aro taw at fagtugbungan.

²⁰ At mafanud, Dius di gaiyan sik taw at matuyan. Ay wa ggubuk at mauri fag taw.

²¹ Kanya gdog yay gfasa emu fagusegananun, ay gfanagsag ban o guro.

²² Kanya ban namapla fagayu takauri emu ay gfasaruayan kanya fag ngay talananan.”