Ub 7 - Fanawbuid tagsibaliwas Fakayabian

¹ Taw at leleg ste swa daga maidap, kata sik tagfakamulun tagfaebayad.

² Kata sik fagsuguan takaylat gtungkud, ay kata yangay sik tagfakamulun tagfanya at bulan,

³ kata kanya ku kayaunanan; ngayu wak magdanun nu gidapan au, ay fagngabak yabi kabalu kwan.

⁴ Kaduge au gtaygilidan, gamatangan au te, seduge ya nu kamenit? Maranan way at buknga nu gleleganan, ay gbidbilingan au sitsigons balabag.

⁵ Fagdaul ku bilug gauludun ay ku balat kalusi, ay ku ngay baktvk gakabuksangun wan.

Ub Gdarangin sas Dius

⁶ Ku leleg, kata menit masakit nu kalangfe, yud e fagsegun. Ay amasakit yap tua sik fangawat lanbung.

⁷ Dius, amatangi ku leleg aroro kata way sik engasan, ay kwe fagmanabayanun ya.

⁸ Katsi e lagan yay o angku, ay abandi ban wo e lagan ya. Grvbvy ban o angku, ay wa ban o e lagan ya.

⁹ Nu setain ngay linyabu nu kalyam, katanya yangay ngay kinbul wa kafoli ya.

¹⁰ Kanya wa guli ya sat bale, ay ngay tagtoglag anya wa ban gamatang ya anya.

¹¹ Nu katanya, kwa mafafaragang nu garingang au, aroro ku dubdub kaptus wan, ay nu masine gelongan kwan ku fakauriun si ku amatanganan.

¹² Dius, wain ro am fagulitun yay angku? O nunda sik tagfangagat kway tagsisad dagat?

¹³ Nu kaylat kwan gtaygilidan laman gfafia ku fagidapun,

¹⁴ gfalimu o angku siginan ngay taginfan ay am fagyafafasludanun.

¹⁵ Nu katanya, kaylat kwan nu e gturis ku liug; kaylat kwan kabul, nu gamut gleleg kyay gugat gidapan.

¹⁶ Kauri kwan ku leleg ay kwa kaylat ya gleleg. Ay fabayani wa angku aroro ku leleg we tungkul ya.

¹⁷ Wain yay am fakaksvnun tua nya nu gfae masuad o ay kafanyu sik taw?

¹⁸ Ginsaful o gugat anya kayu balabag ay gfaskud o anya sas fagayu buknga.

¹⁹ Nu masine di, fabayani yap angku dewa way sik buknga.

²⁰ Tagulit ngay taw, nu nke asalanan kway sa emu, nataw ku asalanan? Wain am fagnafiliun angku laman am fagfaidapanun? O gfaidapan au emu?

²¹ Wain am fagyudun gfalyam ku asalanan? Wa glugo ya nu kabul au, ay dewa ban o grvbvy angku, wa ban o e lagan ya.”