Ub 6 - Fanawbuid tagsibaliwas Fakayabian

Ub Naringang

¹ Ay Ub nabalus te,

² “Nu e ginsaful di te, se aksvn ku fagagwantanun, ay nu e gfabudbungguan di ku nadalan fag fagidapun,

³ ku fagidapun amabyat yap tua slagnas sis tigyangan dagat. Kanya wan ku fagnalongun at mauri.

⁴ Aroro at mabalyanan fag Dius kata wa nu nafana angku at maganga fag godun ay fagdaul ku bilug naganga. Ay natayukan au.

⁵ O kwa ro manga masine gfandeng? Dewa tagsis talun fag kabayu ay fag baka guni wan, way e makmak ya.

⁶ O kon o sik fakonun at yud kanamnam nu dway e suglat barara? Ay o kanamnam iklug at malaksi fag afud?

⁷ Au kwa yangay kaylat kon takatanya. Au kasuya kway takatanya.

⁸ Sinu manga at mafon angku ku fagetun? Dius nangus gfon sa angku ku fakaylatun.

⁹ Dius nangus grufa wan angku, ay at daluap nangus wa gaduanun gfabul angku.

¹⁰ Nu nfasludan di takatanya, kasun kro ay guseganan, dewa maksvn nu gidapan au, aroro nafoyung ktua at yud e malong fag Dius at longan.

¹¹ Kwe fagmabitsugun ya gfanya. Wain yay at fagfadugeun gugat nu gleleg au?

¹² Ku fagmabitsugun wa kaogat ya sik gang, ay ku bilug wa nkawat sik tansu.

¹³ Kwe fagmabitsugun ya laman gfalangfe ku sadili. Fagayu at nafon angku fanggubukun we si ya angku.

¹⁴ Sik taw takabalu, at ngay fagadgalangan masine nu ggubuk anya, kanya dewa natalyuyan at mabalyanan fag Dius.

¹⁵ Ku ngay faduksay wa matuyan sa angku, kata way sik liskung tagfanlugwak ay takalanggang vtv.

¹⁶ Kafag liskung gsawe nu nkapnu way at marios fag mamam.

¹⁷ Nu mangune wan matat way lang ay nu maroy wan, kalanggang way.

¹⁸ Ngay taglao nu nadalan sanya fag liskung, we fanginum, nu katanya, nu ndasug sas talun at yud e taw kanya fagayu kabul.

¹⁹ Ngay tagfalao siginans furuan Tema ay Syeba gseg te, nanginum ro sanya fag liskung.

²⁰ Dewa katanya, kanya fagayu anmomuy aroro gamatangan te, sanya e mamam way, ay aroro mangaro we mamam.

²¹ Nakata am kafag liskung, at yud nagubuk ya angku. Abat ngate, nu nalag am ku kayaunanan anlimu wayam.

²² Ay wain? O nunda get au ay famonun, ay o nunda gfainfanyuan au ayu te, gubuki angku siginan ay ngay ramraman?

²³ Ay naet au gubuk sa ayu te, ‘Falangfei angku sa ku ngay fawayan at yud e afanyu, ay siginan at mafansugu fag taw at daluap’?

²⁴ Longi angku nataw ku nasalan, ay gdungugan kro. Fayamagi angku ku ngay nakurang.

²⁵ Dewa ro mauri gdungug ay fagyalongun nu kanya tua ngap at matuyan. Dewa katanya, ay fantabugan sa angku wa mafanud ay wam mafatuyan.

²⁶ O kaylat am gfakasakan ku ngay nalong, ay gamatangan am manga te, we tungkul sik taw tagidapan at longan?

²⁷ Ay wain, o matuyan wam? Nafasik fagsuguan am sik sisian at yud e fagtainan ya, ay nafae bayad am ay fagadgalangan.

²⁸ Damai sa angku. O nu gdama am kamuagan au sa ayu?

²⁹ Faragangi wan nu gfauri am angku aroro kwa ngap e asalanan.

³⁰ O nu glong am kamuagan au? Saful ktua nu setain at masine ay at mauri.