Ub 5 - Fanawbuid tagsibaliwas Fakayabian

¹ Ub, dewa o get fanggubukun we ggubuk emu, dewa tagbarita wa nanggubuk emu.

² Fagfangadotamaun ay fagfangafanawaun tagfabul at mamomuy ay yud e fagsafulun fag ngay taw.

³ Nalag au sik taw at yud mamatanganan nu mabayan, ay Dius nu gfauri kanya fag taw ay at talanan.

⁴ Ay at ngay sisian we fagnanlagyuan ya ay wa yangay e ggubuk ya anya fagayu gina sis faginsafulan.

⁵ Ay tiba way ban ktaw takon at gutluan. Ay anggan at ngay tanum at rawvg tagsis wa dugi, takalunus way fag ngay taw at nangon. Ay ngay taw ban tagfangalabian ramraman gago wan kafag taw at ngay ramraman.

⁶ Fagidapun ay fagmauriun wa siginan sad daga.

⁷ Taw gidapan wan siginan ngay nu kasalug, kata sik singsing afuy at nalayug sat tungud.

⁸ Nu au di emu, nangakbang kwan sas Dius, laman namoyung sa anya ku kayaunanan.

⁹ Kanya at nafakamulun nusnga setaw at madulo at yud e mafayamag, ay at yud katap ya nu gfalangfe.

¹⁰ Kanya nafaarak sas fagdaul daga ay sa tam ngay gamasun.

¹¹ Kanya gfaksvn ngay taw takamababaun ay kafanyu at mafanyuan fag ngay taw.

¹² Kanya nafae yud e masuad takamuag fag ngay taw at algan, laman wa mfasludan at ngay algan.

¹³ Kanya saful way te, at ke fagsafulun kamasaweun way, ay nasalag way ngay tagfandaya at algan.

¹⁴ Kanya fagayu wa glag dewa mayamag, ay dewa sis buknga menit galafangan way lang nu glao kata gina mayabi.

¹⁵ Dius gfalangfe ngay taw at yud e kwa siginans fagidapun, ay siginan at mabalyanan fag ngay taw tagfalingun anya fagayu.

¹⁶ Nu katanya, ngay taw at yud e kwa e fagsegun tua, ay gaiyan wan at mauri fag ngay taw.

¹⁷ Mauseganan sik taw, Dius nu nafalyam tua at ngay nasalan. Nu katanya, lag o glong te, at mabalyanan fag Dius nu gfasine am ugali mauri way.

¹⁸ Aroro sia yay tagfafia sat nafae fakarukan, ay kanya yangay tagfasun sat nafaidapan fag ngay taw.

¹⁹ Kanya gfalangfe tua gugat emu galay o anke faurianan ay anke fakalimuun.

²⁰ Kanya gfalangfe emu galay e fanlunus ay galay e gawayan.

²¹ Kanya ggubuk emu, gina tibak taw gfalingun emu, ay di o kalimu dewa andasug faurianan.

²² Manabayan tuo dewa e fanlunus ay e faurianan, ay wo kalimu ya tagsis talun fag ngay mangilafang.

²³ Aroro kafag ngay mangilafang wa manangagat ya emu, ay di ban o gidapan ya gtanum dewa si tagagangun fag gamasun.

²⁴ Ay am fag talanan manabayan tua nu gbanwan am, ay di e kalyam am ngay fagbaugun.

²⁵ Ay am ngay kasugfunanan ban ngayu tua, kayu ngay makmak sas fagdaul daga.

²⁶ Ay gleleg tua ban o gugat yakmay sit nafalganan fag buknga.

²⁷ Kata em nadalan ay em nasaful tuy fagayu mafanud, nu katanya, dungugani tua ay fakamuluni laman ban manabayan tuo gugat.”