Ub 41 - Fanawbuid tagsibaliwas Fakayabian

¹ Ub, o masanggit ro wo Libyatan? Ay o mafasangdaw ro wo sik lubid sat leplep?

² O masiuk ro wo sik lubid sat dungus, ay o masanggit ro wo at sulang.

³ Nu nafakamulun ro wo takatanya, kanya ro gfainfanyuan garingang sa emu.

⁴ Ay o nunda ro kanya kawat sik nasadian laman sa emu ay nangafagsuguanan sa emu kaduge gleleg?

⁵ Ay o mafagup ro wo anya kata sik fagutan fag manuk tungud, laman am ngay baguina at fanggalawan?

⁶ Ay o e tagfalao ro manga takaylat gbul, ay nanramyuk ayu sirut laman namabayad?

⁷ Ay o at matares manga fag bangko karuk sat alfuyu ay sat balat?

⁸ Ay nu nagamat o anya gamatang ban o gugat te, maidap taggamat anya, ay wa ban o namaskud ya nanggamat.

⁹ We fanambagun takatanya, aroro kalimu wo nu nadama o.

¹⁰ Nu dway e magamat anya, sinu at namaskud namawayan angku?

¹¹ Sinu at malong te, e bedan au sa anya? Fagayu ste swa daga au wan tagagbilug.

¹² Namoyung au emu te, se bitsug Libyatan, ay se aksvn at fagmabalyananun.

¹³ Sinu at malusi ay at manangurus at balat?

¹⁴ Ay sinu at manansuang at bibig? Malimu tua at ngay bagang.

¹⁵ Ay at sariksik sit tungud guyuy madamvl, kata sik ngay famalabag tagladlaniban ngayu.

^16-17 Ay tuy fagayu gtadtayukan ay dewa tagmara wa matalfus, ay we mafalunggab.

¹⁸ Kanya nu nangusngus e gduksun siginan at dungus kata sik limbad, ay at ngay mata maraska kata gina bagu kamenit.

¹⁹ Kanya nafasure sik afuy, ay batsio kalfas siginan at bibig.

²⁰ Ay anke anus siginan at dungus, kata sik anus tagsiginan sik takuluk fag mamam sis tikung at masalean.

²¹ Ay at engasan mafae afuy sa sik uing, aroro siginans afuy at naduksun siginan at bibig.

²² Ay siwa at liug at fagmabitsugun, ay fagayu at nadama anya kalimu.

²³ Ay kanya galunan ayu daul ay matugas ay we mafalelegan.

²⁴ Matugas yangay at baga, katugas sik gang fanligis trigu.

²⁵ Ay nu nlindug, anggan at mabalyanan fag ngay taw maksvn nu kalimu.

²⁶ Wa karuk sa anya fiso, bangko, ay banyas.

²⁷ Nu sa anya, sanbung kalumak way sbilugan fare ay tansu kalumak way sik kayu at kinyabuk.

²⁸ Dewa e gbusuy anya, wa glagyu, ay gang tagsiginans aruranggut, kata way upa nu natayuk.

²⁹ Ay nu e nafalang anya, at famalang fag ngay kayu kata way lang sik naggusadan bilugan fare. Gina gfatos bangko laman gfana anya, kanya kase way fia.

³⁰ Ay at ungdan e ngay sariksik yangay kata sik ngay bubug at kinrufa. Ay nu nalafangan e ngay fagsian kata nu nalao sasad lifak,

³¹ Ay nu nauig dagat, mamam nabura kata sisad tikung fag mamam nu kuluk, ay kata takuluk fag langis sisad bisu.

³² Ay kanya nu nalao sasad mamam, mamam gbura kata at malaksi fag buk.

³³ We mafasud anya ste swa daga. Kanya at sadi at awatan at yud e fakalimuun.

³⁴ Kanya gfalingun fagayu mela takamatungudun, ay kanya wan fagayu mela sisad talun at fun.”