Ub 40 - Fanawbuid tagsibaliwas Fakayabian

¹ Yawi nalong sas Ub te,

² “O namabadbaboan yay o angku, at mabalyanan fag Dius? Glong o te, nasalan au. Katsi balusi angku.”

³ Nu katanya, Ub nabalus Yawi te,

⁴ “Kwa gbalus emu, gragangan kyakman lang.

⁵ Ngayu wan ku nalong, nu katanya, kwa garingang ya.”

⁶ Ay Yawi gdog yay garingang sas Ub siginan sik tagribungan fag tagmara. Glong te,

⁷ “Falganani ay maseganamai. Ay balusi ro ku ngay fagintoun.

⁸ O gfatuyanan o te, nasalan au laman gfasure te, o tua at matuyan.

⁹ Ay o mabalyanan yangay o kata angku? Ay o maringang o kata sik lingsi kata nu garingang au?

¹⁰ Nu mafakamulun tua ro wo takatanya, gfatuyan ro wo te, anud, mabalyanan o, ay masine ay mauseganan.

^11-12 Falagi am dotama sa takamatungudun fag ngay taw, famomuyi ay rasrasi at mauri fag taw at kayaunanan.

¹³ Ay lubgubi anya fagayu sasad lutuk, sangay kinbul at talun.

¹⁴ Nu nakatu tua ro wo gfakamulun takatanya fagayu, au wa ro tagfauseganan emu ay gafanud kwa ro te, makatu tuo gfalangfe am sadili.

¹⁵ Damai Beemut fag mangilafang daul, ku nawat gina au kawat emu. Kanya kon makmak kata baka.

¹⁶ Dewa katanya, kanya mabitsug ay magaras.

¹⁷ At iug malugde mandi kata sik kayu sidru, ay at ngay balangbang gbia.

¹⁸ Ay at ngay bini katugas sik tansu ay sanbung.

¹⁹ Sas fagayu ku awatan, kanya wan at madulo. Dewa katanya, kanya ku nawat way ay gbabo kway.

²⁰ Kanya gfangonan sas wa buksul, gina tibak mangilafang gawean sis wa talun munakbang si anya.

²¹ Kanya nu gtungkud sis wa dugi ay sit ke sigbo fag bunaw.

²² Kanya gfalanbung sis wa dugi ay sis wa daga fun kayu tagsis buknga fungsu fag datag.

²³ Kanya wa gafanawa dewa glugwak, ay dewa malubguban wan sis Liskung Urdan gina glugwak.

²⁴ Sinu at manamadarafun anya laman nanggamat? Sinu at masangdaw anya ay at masanggit at dungus?