Ub 4 - Fanawbuid tagsibaliwas Fakayabian

Elifas Naringang

¹ Ay Elifas tagsiginans Teman nabalus te,

² “O magwanta ro wo gdungugan ku fagyalongun? Kwa mafaragang ya.

³ Ebi nagubuk o ngayuk taw laman gafanud sas Dius ay nafabitsug o at mamomuy ay takalufuy.

⁴ Ay ginanya am ngay longan wan tagfaksvn kanya fagayu, ay tagbakvd fagayu takataid.

⁵ Ay katsi andasug wan sa emu kafag ngay fagidapun, ay o wan tagidapan ay takabalu.

⁶ O nunda nu gsuyu tuo Dius ay gugali at matuyan, o wa gfae fagafanudun ay gfae fagsegun emu?

⁷ Ay katsi, amatangani fia. O nunda e taw at yud e asalanan at kinfaurianan?

⁸ Sa ku nalag ay ku nasaful, ngay taw tagfakamulun at mauri, kanya ban fagayu umfaurianan.

⁹ Dius ban nu nafadasug at dotama sa kafag ngay taw, kanya ban fagayu umbul.

¹⁰ Tuy fag ngay taw kata ngay liun nu gngarngar, dewa katanya, umringo way ban at ngay bagang.

¹¹ Ay kata yangay ngay liun kabul sis lunus ay at ngay riangan gfanaruayan way lang.

¹² E ndasug sa angku sik longan at mafaydayuanan ay kwa nyamag, ay e nainas angku,

¹³ siginan sik taginfan, gina ngay taw gtiug.

¹⁴ Nu katanya, anlimu au ay gtadtaruyan, ay at kaksvnan ku ngay bini nauigan wan.

¹⁵ E nadalan si ku daga salubangan, ay anlimu au maksvn ay narinun.

¹⁶ Ay kanya anlindug si ku daga salubangan, dewa katanya, kwa natoglag, ay nadungug kngap sik aringang ginasan te,

¹⁷ ‘O nunda sik taw matuyan sis Dius at daga salubangan? Ay o nunda sik taw we malong sat nawat anya at daga salubangan?

¹⁸ Dius ro nu gaduanun way sat fagsuguan fia fag ngay tagbarita, ay nu nasaful way kafag ngay tagbarita at fagyudun mamatanganan,

¹⁹ kaugat wa ro kanya nu gaduanun sat nawat fag ngay taw tagsiginan ways daga, ay takaturis way kata sik fatung.

²⁰ Kanya dewa yay gleleg sis balabag sad yabi anbul wan ay kabavn wa kalag ya.

²¹ Ay kata sik bale ramit at kinrasras wan. Kanya fagayu anbul gina yay yud e fagsafulun.’