Ub 39 - Fanawbuid tagsibaliwas Fakayabian

¹ O nasaful o nu ginain ngay kambing talun nu griangan? Ay o batang o glag gina bian griangan?

² O natap o nu seyuk magdanun siginan nu gfasigad gfafion, sitsigon nu griangan? O ay saful o te, nu ginain ban nu griangan?

³ Kanya fagayu grungan gidapan maksvn, yakmay nariangan.

⁴ Ay at riangan nu nbia wan, nalao wan ay wa nfoli ya.

⁵ Sinu at nafalfas tagsisad araw fag ngay asnu?

⁶ Nafon au sa anya talun at yud e taw laman at fagnanfangonan, ay nafabanwan au anya sa sik talun at yud e gbanwan ya.

⁷ Ay nafamanabayan au anya, ay nafae fagbanwanan. Kanya anyayu siginans furuan daul tangayu nu garingang, ay wa kaylat nu e gfagup anya.

⁸ Kanya gfoyfolian sa sangay buksul at ke ngay makmak, laman grvbvy at fakonun.

⁹ O mafafakamulun o at mela fag baka? Ay o mafafatawad o anya sisad ubung fagngabak yabi?

¹⁰ Ay o mafasiuk ro wo, ay magbilug laman nangali am fagtanuman?

¹¹ O gseg o at fagmabitsugun, laman gfakamulun at maidap fag fakamulun?

¹² Ay o gseg o te, manamaful ay manangaut am gutluan sam fagruyusan?

¹³ Manuk daul at fakfak nu kalag masine. Dewa katanya, kalaw at fakfak amasine yap.

¹⁴ Manuk daul gfamato at ngay iklug sis daga laman kaenbung.

¹⁵ Ay wa gamatangan ya te, mae nasiad, ay tagsis talun fag ngay mela mafakwan.

¹⁶ At ngay riangan kata way nu yud anya, ay wa gamatangan ya te, o e fanambagun ban at nainkidapan.

¹⁷ Aroro kwa nafoyung sa anya fagsafulun ay fagmayamagun.

¹⁸ Dewa katanya, nu gtarung masakit, amasakit yap skabayu.

¹⁹ Ub, o nunda o wan at nafon sas kabayu at fagmabitsugun, ay o nunda o yangay at nafae sigyu anya at masine ay takaburago?

²⁰ O nunda o wan at nafon at fagmabitsugun laman matulbu kata sik liung? Ay gfalimu ngay taw siginan nu guni.

²¹ Kanya masakit nu gfalelegan at ngay si, laman kamanagsag at fagmabitsugun, ay gtarung sas fagawayanan.

²² We fakalimuun ay wa kalimu fiso tagsumbalian at uyup.

²³ Ay tagsakay si anya fag tagfawayan at ngay bangko ay at famalabag ganinag.

²⁴ Lukbu kalayug at kasakitan nu gtarung, ay kanya wa gragangan ya nu nadungug budyung nu gawang.

²⁵ Kanya nu nadungug budyung nu gawang, guni ay gayuk wan awayan dewa ngayayu yay. Ay gdungug nu e garingang sis fagawayanan, ay ngay fun tagfawayan nu gbarisanan guro.

²⁶ Ay o nunda o wan at nafoyung bio nu glayug, at nangadasug sas alvngvdan fag afud daga?

²⁷ O nunda o yangay at nasugu bio nu glayug ay nu kawat at fugad sa tangabat fag buknga?

²⁸ Bio nu gbanwan sa tangabat fag ngay gang, ay at fagnanuksuanan sat matubi.

²⁹ Sanya ginan, gbanawan at fagnanyukfuun, ay nu gbanawan, ngayayu tua at faglagun.

³⁰ Ay kanya nu nalag at mabulan, nalayug sanya, laman namul kafag mabulan at taguk ay gfainum sat ngay riangan.”