Ub 38 - Fanawbuid tagsibaliwas Fakayabian

Yawi Naringang

¹ Sanya ginan, Yawi nabalus Ub siginan sik maksvn fag tagmara tagbaribungan; kanya glong te,

² “Wain am fagawabiluganun sa ku fagsafulun? Am ngay longan tagfatuyan te, wo e fagsafulun.

³ Falganani, nanginto kro sa emu, ay balusi ro angku.

⁴ Inda o ebi gina au kawat fagdaul daga at fagtungkudan? Nu e fagsafulun o, longi angku.

⁵ O nasaful o sinu at nafalganan daga at fagtungkudan ay at kadaulan ay at fatuan?

⁶ Sinu tagbakvd daga at fagtungkudan, ay sinu at nafatungkud sanya kafag fagfatungkudan daga,

⁷ gina ngay tagurabas gasfuan gseg galubadan, ay ngay tagbarita gasfuan guro guseganan?

⁸ Sinu at nafae famalabag dagat, ay at nafalugwak siginan sad fagngabasadan?

⁹ Au wan at nawat at madamvl fag linyabu, laman fagmadulumun tagtabun dagat.

¹⁰ Nafae fatuan au dagat kata sik sakbawan at madingdingan ay nafae famatawad au.

¹¹ Nalong au sas dagat te, ‘Ste way o tsigon, lag o glangfe; ste way tsigon am tagbia fag ngay lugwak.’

¹² O batang wo gsugu te, ‘Asurei menit,’

¹³ laman gyamag sas fagdaul daga, ay namaragang at ngay mauri at fakamulun gina madulum?

¹⁴ Aroro menit nu nsure, fagdaul daga kalag kata sik famasaful fag fanriruk ay sik lanbung at mafalutan.

¹⁵ Yamag gfaragang at mauri fag ngay taw, laman kanya fagayu di gfakamulun at mauri sat ngay iba.

¹⁶ O batang wo nangadasug sas bukbuan dagat, ay sas fagngabasadan?

¹⁷ O e nafoyung wa emu sakbawan tagsabaliwa ngay kinbul at talun?

¹⁸ O nasaful o fagdaul daga at kadaulan? Longi angku nu nasaful o.

¹⁹ O saful o daginan yamag ay dulum?

²⁰ O mafafoli ro wo kanya fagayu siginan at fakadasugan?

²¹ O kin ngaro, nasaful wo tuy fagayu, aroro ansalug wo gina kawat tuy fagayu, ay ngaduge wa ngaro nu gleleg o.

²² O batang wo sa sangay fagfungsuan arak at marios ay yelu fag arak takadaul ngay gang ayu sirut?

²³ Kafag arak at marios ku nafalganan galay e fagidapun ay e awayan.

²⁴ O saful o dalan tagsas limbad at fakadasugan ay tagmara tagsiginan baliwa sfakamenitan?

²⁵ Sinu at nawat arak ay fulug at dalan?

²⁶ Sinu at nafae arak sat yud e gbanwan fag talun?

²⁷ Sinu at nafae arak sat yud e gbanwan fag talun, laman makmak gtugbung?

²⁸ Sinu arak ay damug at mama?

²⁹ Ay daginan at kinsik yelu fag damug,

³⁰ gina mamam matugas kata sik gang, ay dagat at mamam tagsit tungud baliwa matugas yangay?

³¹ O makatu ro wo grabing ay gluas galeme tagfulan Pleyades ay Uriun?

³² O mafasure ro wo ngay galeme sit kasakan fag buknga? O ay mafafoyung ro wo dalan sa sangay tagfulan fag ngay galeme at ngayan te, Tagbia ay Talay fag Usu?

³³ O saful wayo sas banwa at ngay ugali ay o mafakamulun o takatanya sas fagdaul daga?

³⁴ O masugu o sas linyabu te, fae araki?

³⁵ O masugu o sas limbad te, ‘Limbadi’ ay o gfaning emu?

³⁶ Sinu at nafon sas taw fagsafulun ay fagmatogdungugun?

³⁷ Sinu tagsaful gtap ngay linyabu? Sinu at mafaugwag mamam siginans banwa,

³⁸ laman at magong fag ngay lukbu umsik ngay lifak at mabilug?

³⁹ O marvbvy o ngay liun at fakonun laman kanya fagayu kapsug

⁴⁰ kaduge kanya fagayu gsuksuan sa sangay luib ay sa sangay fun kayu ayu sirut?

⁴¹ Sinu tagfafangon ngay ugak, kanya fagayu nu kalunus wan ay at ngay riangan nu naet fakonun sa angku?