Ub 37 - Fanawbuid tagsibaliwas Fakayabian

¹ Nu gfulug wan ku dubdub gsubsubuan.

² Dungugani, Dius at aringang kalung kata sik lingsi.

³ Kanya gfae limbad sas fagdaul banwa, ay kadasug sas fungfung daga.

⁴ Ay sanya ginan e kadungug sik fawas, Dius at aringang kata sik lingsi, ay kanya wa gfaragang nu gfalingsi.

⁵ Dius at aringang maksvn nu madulo, kata sik awang, ay kanya nafakamulun nusnge wain at madulo tam fagyudun saful.

⁶ Kanya nafanting at marios fag arak sas daga, ay naugwag yangay sas daga at maksvn fag arak,

⁷ laman taw gfiangalay tua siginan at nafakamulun, ay laman nangamatangan sabaliwa Dius at ngay nafakamulun.

⁸ Ngay mangilafang gsuksuan sat mesa fagsuksuanan, ay gbanwan sanya gina gfulug.

⁹ Fulug kadasug, ay anggan at marios fag tagmara kadasug yangay.

¹⁰ Siginan Dius at engasan mamam ansik yelu, anggan tagbia fag lino antugas.

¹¹ Kanya nafapnu mamam sa sangay linyabu ay sanya ginan anke ngay limbad.

¹² Kanya nasugu ngay linyabu laman gbaribungan sas fagdaul daga.

¹³ Kanya nagbilug tuy fagayu laman gfasine taw at ugali, ay gfarak sas daga, laman gfalag at fakesugun.

¹⁴ Ub, dungugani ay amatangani sabaliwa Dius at ngay nafakamulun fag ngay madulo.

¹⁵ O nasaful wo nu setain Dius nu gsugu linyabu, ay nu setain nu gfalimbad siginans linyabu?

¹⁶ O nasaful wo nu setain ngay linyabu nu giwangan? Dius at ngay awatan takatanya at madulo, ay at fagsafulun kasakan.

¹⁷ Gafangenit o aroro sat masugba fag tagmara siginans fasiunan fag alvngvdan.

¹⁸ O magubuk ro wo Dius nu gfae linyabu, katugas sik taganyang fag salaming tansu?

¹⁹ Longi emi nu setain at masine em fagnanlongun sas Dius. Wami saful em longan ro, aroro yami bangan e fagsafulun.

²⁰ Nu kaylat au gfakamatoan Dius, o e manamasaful sa anya? Sik taw at nafakamatoan Dius, umfaurianan.

²¹ Nusnga sinu we madama sas menit at yamag. Tagmara nu nauyup ngay linyabu, menit masulo.

²² Siginans fawalan fag alvngvdan, Dius at fagmasuloun takata sik gintu kadasug, ay at fagmaduloun gligung anya.

²³ Wa tam manangakbang sat mabalyanan fag Dius, aroro maksvn nu mabalyanan ay nu matuyan.

²⁴ Nu katanya, ngay taw gsuyu anya, ay kanya wa kasalag ngay taw taglong te, e fagsafulun.”