Ub 36 - Fanawbuid tagsibaliwas Fakayabian

¹ Elyu gfataglayun yay glong te,

² “Agwantani yap sirut fanyai angku, aroro e fagyalongun kyay sabaliwas Dius.

³ Ngayu ku fagsafulun, ay gfatuyanan au sa emu te, Dius tam Takawat, matuyan.

⁴ Gfatuyanan au sa emu te, kwa kamuag, aroro au tagfakamatoan emu, kasakan tua ku fagsafulun.

⁵ Dius mabalyanan, ay kanya di e nafauri, kanya mabalyanan ay gfafasludan tua at algan.

⁶ Kanya wa gfaduge at mauri fag ngay taw nu gleleg, ay kanya gfon fagmasineun sa sangay taw tagafalingunan.

⁷ Kanya di gfabayan ngay taw at matuyan, ay kabavn kanya gfauseganan anya fagayu gasfuan at ngay fun.

⁸ Dewa katanya, at matuyan fag ngay taw nu gidapan, kata nu e nasiuk sik salambitan,

⁹ Dius gfasaful sanya fag ngay taw te, nataw at asalanan siginan at fakamatungudunun.

¹⁰ Ay kanya nafasaful sa anya fagayu at famararang, ay gsugu te, ‘Ubuni wan ay fagmauriun.’

¹¹ Ay kanya fagayu nu galo tua ban ay gfaning anya, di ban e fagayudanun ay manabayan tua ban gbanwan.

¹² Ay kanya fagayu nu dway gfaning, umbul ban yud e fagsafulun.

¹³ Ngay taw at yud gfaning Dius, gsuksuk gugat fakadotamaun sat amatanganan, ay Dius dewa gfaurianan anya fagayu, kanya fagayu wa get gubuk sas Dius.

¹⁴ Kanya fagayu kabul gina yay mabaguama, ay at nafakamulun maksvn nu mapla.

¹⁵ Sik taw gina gidapan, Dius gfalangfe anya, ay siginan at fagidapun, Dius gfasaful anya te, dungugani tua anya.

¹⁶ Dius nafayayu emu siginan at malimu, ay nafae fagmanabayanun emu, ay nafon sa emu tangayu ay at mataba fag ngay fakonun.

¹⁷ Ay katsi gafaurianan o kata at mauri fag ngay taw nu gafaurianan, ay wo masaruy ya at kinfasludan wan sa emu.

¹⁸ Dirii tua, laman di o gafaylatan sas fagmaramramanun, ay sa tagbia fag famaylatan.

¹⁹ O am fagmaramramanun ay am fagmakatuun mafagubuk emu laman gfaragang am fagidapun?

²⁰ Lag o kanbang nu kayabi, gina ngay taw gafaurianan sit mesa bale.

²¹ Dirii tua, ay lag o gfakamulun at mauri. Dius nafaidapan emu laman gfaragang tuo gfakamulun at mauri.

²² Amatangani, Dius mabalyanan, ay we takamoyung tagfasud anya.

²³ We mafoyung sa anya nu setain at fakamulun at masine, ay we malong te, kanya nasalan.

²⁴ Lag o kalyam gfauseganan sabaliwas Dius at ngay nafakamulun kata tibak taw nu gfauseganan galubad.

²⁵ Kanya fagayu nalag Dius at ngay nafakamulun, dewa katanya, nu glag, siginan way sad ngayayu.

²⁶ Anud, Dius mabalyanan, ay wa tam saful at kamasinean. Ay wa tam mafatap te, seyuk banwa nu gleleg.

²⁷ Dius nabul mamam siginans daga ay nafasas tungud, ay kanya nawat arak.

²⁸ Arak kaugwag siginans linyabu ay ganting sa sangay taw.

²⁹ We nasaful te, setain linyabu nu karapyag, ay setain nu glingsi sas banwa, Dius at fagbanwanan.

³⁰ Damai nu setain kanya nu gfae limbad sat ligung, ay nu setain nu gfae yamag anggan sas fagngabasadan dagat.

³¹ Siginans Dius at fagmabalyananun kanya gfunan ngay furuan ay gfon ngay fakonun sa sangay taw.

³² Kanya gted limbad ay gsugu te, sanya nu katuk.

³³ Limbad gfasaful te, e gakadasugun fulug. Anggan ngay fagbaugun saful yangay te, e kadasug.