Ub 35 - Fanawbuid tagsibaliwas Fakayabian

¹ Elyu gfataglayun glong te,

² “O nu glong o matuyan wo nu malong o te, wo e asalanan sis Dius at daga salubangan?

³ Ay nainto o te, ‘Nataw ro ku fanambagun nu ddi kro gasalanan?’

⁴ Gbalus au emu ay anggan sam ngay fagadgalangan.

⁵ Tangdai sas banwa ay lingamani te, se abat linyabu.

⁶ Dewa o anke asalanan, Dius wa kataip, dewa o kamabo, we masuad sa anya.

⁷ Ay nu matuyan tuo, wa yangay e fanambagun sas Dius.

⁸ Dewa o gfakamulun at masine ay at mauri, sa way lang sa ngay taw am fagfalagan takatanya.

⁹ Ay am ngay nafalingun get gubuk te, falangfei anya fagayu siginan at mabalyanan fag taw.

¹⁰ Dewa katanya, kanya fagayu wa get sat nawat anya fag Dius, ay tagfon fagmanabayanun gina e fagidapun.

¹¹ Dius at nafon sa antam fag fagsafulun gtungud tua ngay mela ay ngay manuk tungud at fagsafulun.

¹² Ay kanya fag ngay taw dewa gdarangin, Dius wa gbalus, aroro kanya fag ngay taw kamuag way ay mauri.

¹³ Anud, Dius wa gdungugan at yud e masuad fag darangin ay wa kasalag.

¹⁴ Ub, kaugat waban Dius nu yud gdungugan emu, nu glong way o te, yo nalag anya, ay nafoyung wo sa anya am mamalong, ay gfanya way o lang at famalus.

¹⁵ Nalong yangay o te, Dius wa gfaurianan siginan at fandotaman, ay wa glag dewa taw gfakamulun at mauri.

¹⁶ Takatanya am nalong we masuad, at matuyan, wo nasaful am nalong.”