Ub 34 - Fanawbuid tagsibaliwas Fakayabian

¹ Elyu gfataglayun glong te,

² “Am fag ngay taw taglong te, ‘E fagsafulun ami,’ dungugani fia angku.

³ Leplep gfaskud fakonun, ay talinga gdungugan aringang at matuyan ay at yud matuyan.

⁴ Katanya yangay tam, nangasaful tam nu setain at matuyan ay at masine.

⁵ Ay Ub glong te, ‘Kdoma e asalanan, dewa katanya, Dius wa nafon angku fagmatuyanun.

⁶ Dewa au matuyan Dius glong way te, kamuag kway, ay dewa au yud e nafakamulun asalanan, kanya nafae fakasaitun angku at yud gfangafia.’

⁷ We taw kaksvn Ub nu gagwanta dewa e gfalingun.

⁸ Kanya at fakaylatun at fagaloan at mauri way fag taw,

⁹ ay glong te, ‘We fanambagun sa sik taw nu gugatan way gfauseganan Dius!’

¹⁰ Nu katanya, am, dungugani tua angku, am taglong te, gtogdungug am. At mabalyanan fag Dius wa gfakamulun at mauri.

¹¹ Kanya gfon sa sangay taw kata at ngay mesa nafakamulun, ay at fagfonan sa way lang tagugali at matuyan.

¹² Natuyan au te, at mabalyanan fag Dius wa gfakamulun at mauri, kanya wa gfayud e masuad at matuyan.

¹³ O nunda e nafalu anya laman gfunan fagdaul daga? Ay o e nasugu sa anya te, ‘Funani fagdaul daga?’

¹⁴ Dius ro nu gbul wan tam leleg,

¹⁵ fagayu ro taw gasfuan umbul, ay kafoli sas daga.

¹⁶ Ub, nu nyamag tuo, dungugani ku longan.

¹⁷ O Dius ro manga gfunan nu dway kaylat fagmatuyanun? Wain am fagfayudun at matuyan ay at mabalyanan fag Dius?

¹⁸ O nunda bunwa sia at naiyan ngay fun at yud matuyan?

¹⁹ Kanya di e fagfili fagayu funan, ay wa yangay e fagfadiugananun at maramraman man ay at yud e kwa aroro sia way at nawat way anya fagayu.

²⁰ Dewa at mabalyanan fag fun kabul way masakit gina mayabi, deyud e nafakamulun sa anya at mauri.

²¹ Dius gulit ngay taw at fakamulun.

²² At mauri fag taw wa mananuksuan dewa sit madulum fag suluk.

²³ Dius wa guro ya taw laman nansalubang ay namatuyan sabaliwa anya.

²⁴ Kanya wa ginsaful ya ngay funan laman namalin siginan anya at fakamulun ay namatigwanan sa tibak taw.

²⁵ Aroro kanya saful way ngay fun at fakamulun, ay nafalin yangay siginan anya at ngay fagmabalyananun, ay nafabul gina mayabi.

²⁶ Ay kanya nafaurianan kafag ngay fun sis fagngayuan taw aroro sat ngay fagmauriun.

²⁷ Kanya nafakamulun takatanya aroro kanya fagayu natalyuyan anya, ay wa nafandungug at balyawvtan.

²⁸ Kanya fagayu nafalingun at ngay taw at yud e kwa, ay Dius nadungug kafag ngay nafalingunan nu get gubuk.

²⁹ Dewa katanya, Dius dewa maragangan ay gsuksuan ginanya fag buknga, we taw malong te, kanya nasalan. At matuyan, Dius gulit tua gugat fagayu taw,

³⁰ laman gfaragang wan at yud gafanud sa anya nu gfunan, ay laman at ngay taw di kasangdaw.

³¹ O e batang glong sas Dius te, ‘Nagwantan au gidapan, ay siginan ban katsi kwa gasalanan ya.

³² Foyungi angku o e asalanan au, ay nu nke asalanan kway, kwa ban gdog ya gfakamulun takatanya’?

³³ Setain ro Dius nu mabalus am fagetun nu dway o gubun am asalanan? O wan tagamatangan ay bunwa au ya, nu katanya, longi sa angku nu setain am algan.

³⁴ Ngay taw at ke fagsafulun ay tagtogdungug gdungugan tua angku.

³⁵ Ay kanya fagayu glong te, garingang o deyud o e fagsafulun.

³⁶ At masine nu e namaskud emu, aroro nu garingang o kata way o sik taw at mauri.

³⁷ Nafamut o am asalanan aroro sam fagmauriun sas Dius, nafauri o ay nafalingun Dius si em daga salubangan.”