Ub 33 - Fanawbuid tagsibaliwas Fakayabian

Elyu Gfakamatoan Ub

¹ Ub, dungugani fia, nangaringang au sa emu.

² Mafalganan kwan nangaringang, ay ku ngay fagnangaringangun si wa ku langbud leplep.

³ Ku longan siginan mandi ku amatanganan, ay nanlong au fia matuyan ku ngay fagsafulun.

⁴ Dius at Falad at nawat angku ay at nafon sa angku ku leleg.

⁵ Ay balusi tua ro angku, nu maringang yay o. Falganani ay salubangi angku.

⁶ Katsi si watas Dius at daga salubangan. Fagdua ta siginan way ta sdaga.

⁷ Nu katanya, lag o kalimu angku ay lag gamatangan te, gfalingun kro emu.

⁸ Nadungug kwan am ngay nalong te,

⁹ ‘Kdi e asalanan, ay kdi e kalong, ay kdi e nafakamulun at mauri.’

¹⁰ Ay nalong yay o te, ‘Dius narvbvy sik malong laman gfaidapan angku, ay gtap angku te, at fawayan.

¹¹ Kanya nasiuk sik salambitan si ku ngay darafa ay gulit fagayu ku fakamulun.’

¹² Ub, am ngay nalong wa matuyan. O nunda Dius kata way sik taw?

¹³ Wain am fagnalongun te, kanya wa gbalus taw at fagetun?

¹⁴ Dius nu garingang, bundi sayginan ay dua ginan, dewa katanya, ngay taw wa kaylat gdungugan ay wa gamatangan.

¹⁵ Kanya garingang siginans taginfan kaduge tam gtiug ngabasad sisad yabi.

¹⁶ Kanya ginas ngay taw sat day talinga ay gfalimu anya fagayu siginan at ngay famararang.

¹⁷ Kanya gfakamulun takatanya laman kanya fagayu gfaragang wan nu gasalanan ay nu kamatungudun,

¹⁸ ay laman umlangfe tua siginans fakabulun.

¹⁹ Dius nu gfasine taw at ugali, tibaginan gina nke fakasaitun, kata tagsis bini fag fakasaitun yud kafia ya,

²⁰ ay wa kaylat ya kon dewa at mataba fag fakonun.

²¹ Nu katanya, kanya umniwang, ay gatagyangun way lang.

²² Kanya gakabulun wan, ay ganangadasugun sa sangay kinbul at talun.

²³ Ay nu e sik libu di ktagbarita, ay at sadi nu mananwabilug di sas taw ay sas Dius, kanya ro nanlong sanya fag taw te, Kata tua tuy at matuyan.

²⁴ Ay Dius ro nu nfanyu anya glong ro sanya fag tagbarita te, ‘Falangfei kafag taw siginans fakabulun, aroro nasaful kwan famalyam at asalanan.’

²⁵ Nu katanya tua, umfoli ban at fagmabitsugun, ay at bilug umkata yay gina mabaguama.

²⁶ Kanya nu nadarangin sas Dius, Dius gbalus anya ay kaylat anya, ay kanya fag taw lumag Dius ay guseganan, ay Dius gfafoli sa anya at matuyan fag famanwanun.

²⁷ Ay nu katanya, kanya malong tua sa sangay taw te, ‘Nasalan au ay nafakamulun au at yud matuyan, dewa katanya, kdi anfaurianan kata at faurianan ma sa angku.

²⁸ Kanya nafalangfe tua angku siginans fakabulun, ay gfataglayun au sas fagelelegun.’

²⁹ Kin, kata kanya Dius at fagfakamulunun gugat sa sangay taw.

³⁰ Kanya gfalangfe ngay taw siginans fakabulun, laman ngay taw gleleg tua.

³¹ Ub, dungugani fia angku ay maragangani, ay au yakman lang tagaringang.

³² Ay nu e fagyalongun o, longi tua aroro gyasafulun au te, o di o e asalanan.

³³ Ay nu ddi ngani, maragangani way lang, ay gfoyung au emu ku fagsafulun.”