Ub 32 - Fanawbuid tagsibaliwas Fakayabian

Elyu Naringang

¹ Ub at fagadgalangan fag tulu nafaragang wan nu garingang, aroro ngap Ub gfabulun way te, “Kwe asalanan.”

² Sanya sik taw at ngayan Elyu. Kanya Barakel at baguama, ay Bus at fufu siginan Ram at kasugfunanan. Kanya kadotama Ub aroro abat ngate, nafayud at sadili, at nafayud Dius way.

³ Ay kanya kadotama yangay Ub at fagadgalangan fag tulu, aroro kanya fagayu wa nafatuyan te, Ub e asalanan. Ay nafoyung way te, Dius at nasalan.

⁴ Aroro kanya fagayu amafagtainan yap tua Elyu, Elyu nafanya yay nu yud garingang ya, laman nangaringang yangay sas Ub.

⁵ Dewa katanya, kafag tulu way e fagmaringangun ya, Elyu andotama.

⁶ Ay nalong te, “Au mabaguama kyay ay am mafagtainan oma am, ay ebi ginan kapla kyay garingang, ay kwa ngap namaskud nanlong sa ayu sabaliwa ku fagsafulun.

⁷ Nu glong kro am tua at namoyung, aroro mafagtainan wam ay ngayu wan ay fagsafulun.

⁸ Dewa katanya, at matuyan, Dius at falad tagsis taw, kanya tua tagfon fagmatogdungugun.

⁹ Fagmafagtainanun wa mafafon fagsafulun ay fagmatuyanun.

¹⁰ Nu katanya, dungugani angku ay glong au ku fagsafulun.

¹¹ Gfanya au gugat te, seduge ro nu gdog am garingang, nu setain at matuyan ay fagyalongun ay gdungugan au ay ngay longan at matuyan.

¹² Ay nadungugan au fia ay ngay nalong, dewa katanya, nusdi sadi si ayu we nafatuyan te, Ub e asalanan, ay wam nafabalus at ngay fanlonganan.

¹³ Ay lag am gamatangan te, am way lang at ke fagsafulun. Dius tua tagbalus anya ay bunwa taw.

¹⁴ Ub wa nafakamatoan angku, nu katanya, kwa ro gbalus anya siginan ay ngay nalong.

¹⁵ At katsi nababawan wam, ay wam e famalus ya sa anya.

¹⁶ Ay katsi aroro wam e famalus ya, o gfanya kyay?

¹⁷ Katsi au man at nanlong sa ayu sabaliwa ku fagsafulun.

¹⁸ Aroro ngayu ku fagyalongun ku fagyudun kagwanta ya.

¹⁹ Kata au sik bagu fag fagsuadan fanlangu at mapnu at bilug tagakagiratun wan.

²⁰ Garingang kwan laman ku amatanganan kamanabayan wan.

²¹ Kwe fagnamadiuganun ay kwe fagnamasunun.

²² Kwe fagfaylatanun nusnga sinu, aroro nu nafakamulun kway ro takatanya, ku Takawat ro gfabul angku.