Ub 31 - Fanawbuid tagsibaliwas Fakayabian

Ub Gfasaful te, Di e Asalanan

¹ Ay nafatuyanan au sa ku sadili te, dewa au nadama sa sik baguina, kwa ro galabian anya.

² Aroro nataw ban Dius at famasud sa sangay taw tagfakamulun takatanya?

³ O nunda ban ngay taw at yud matuyan wa gafaurianan, o ay tagfakamulun at mauri wa ban kabul?

⁴ O nunda Dius wa glag ku ngay dalan, ay gtap ku ngay siklang?

⁵ Nu nafamuag kway ay nafandaya,

⁶ Dius ro nu nanantuyan sabaliwa angku, sumaful te, kdi e asalanan.

⁷ Ay nu nasaruyan kway at masine fag dalan, ay nu nafaning kway ku fakaylatun, ay nu nafauri kway ku sadili,

⁸ tibai wa nangus ktaw takon ku natanum, ay umgulad wa nangus ku ngay fananumun.

⁹ Nu nataban kway tibak mangena ay nu nalabian kway ku ibama at bubay,

¹⁰ tibak mangama buli wa ku mangena ay fataladani wan.

¹¹ Aroro fagfanugtugun asalanan ay fakaplaun, ay fagayu tagfakamulun takatanya umfaurianan.

¹² Takatanya kata sik afuy tagfamin fagayu ku ramraman.

¹³ Ku ngay fagsuguan nu nke fagetun sa angku, nadungug ktua ay nagubuk anya fagayu.

¹⁴ Kway ro nafakamulun takatanya, setain ro ku fakamulun, Dius nu gfaurianan wan angku? Setain ro ku famalus gina kanya gfatuyan sabaliwa angku?

¹⁵ Dius at nawat angku, kanya yangay at nawat ku ngay fagsuguan.

¹⁶ Kway ro nagubuk tagidapan fag ngay taw, ay nu nafaidapan kway ngay fagbubayun,

¹⁷ ay kway ro kamon sa sangay taw at yud e fagtainan ya, Dius ro nafaurianan wan angku.

¹⁸ Dewa katanya, ebi gina au mabaguama, nagubuk au at yud e fagtainan ya, ay kaduge au gleleg, kdi nafabayan ngay fagbubayun.

¹⁹ Ay nu nalag au takarios aroro we lanbung,

²⁰ nafon au sik lanbung at madamvl, at fangawat ku ngay tupa at sigyu, ay kanya maksvn nu gfauseganan sa angku.

²¹ Ku take nu nafauri di at yud e fagtainan ya aroro saful au te, fagfawabiluganan gfadiuganan tua angku,

²² ku lafi nangus umrabas wan, ay anggan ku ngay take umgatvng wan.

²³ Kwa mafakamulun takatanya, aroro kalimu au at mabalyanan fag Dius at faurianan.

²⁴ Kwa gseg ku ramraman, ay kwa gamatangan te, kanya wan tagfon angku fagmanabayanun.

²⁵ Kwa gfanagsag te, ngayu ku ramraman siginan ku nainlufuyan.

²⁶ Kwa gseg menit at fagmasuloun ay magdanun at yamag.

²⁷ Ay kdi nafaylatan gseg tuy fagayu.

²⁸ Ku nafakamulun takatanya nu asalanan way, matuyan umfaurianan au aroro nafamabo au Dius.

²⁹ Kwa naylat ku ngay fawayan nu gafaurianan, ay kwa nauseganan gina e fagidapun.

³⁰ Ay kdi batang gdarangin te, fabuli wan anya fagayu.

³¹ Ku ngay fagsuguan saful te, nafafangon au nusnga sinu fag taw.

³² Nusnga sinu fag betaw wa batang e gtiug sisad dalan, aroro ku sakbawan bale maluangan tua gugat sas nusnga sinu fag taw.

³³ Kdi nasuksuk ku asalanan kata tibak taw at fakamulun.

³⁴ Ay kdi lang namaragangan ay nanansuksuan aroro kalimu au ngay taw at ngay longan.

³⁵ Nu e gfadiuganan di angku, griruk kro ku ngayan sit ba rirukan laman gfatuyanan sas Dius te, kdi e asalanan. Nu e foyungan di te, mauri au, glong kyay ro sa anya te, ‘Riruki yap.’

³⁶ Ay gfasanan kro kafag rirukan, ay mannga gfasi au ku tungud alfuyu kata sik sangbo, laman namalag au sas fagayu taw te, mafalganan au gsalubang nusnga setaw fag kamatoanan.

³⁷ Ay gfoyung au sas Dius fagayu ku nafakamulun ay nansalubang au anya kata sik funan at yud kapla.

³⁸ Nu nafauri kway ro ku fagagbilugun fag daga, ay nu ankata sik taw galiasun gwayway,

³⁹ ay nu naago kway at gutluan, ay nu nafauri kway ngay taw tagfakamulun sanya,

⁴⁰ tugbungi wa nangus si ku lutuk at madugi fag makmak abat ngate trigu ay barli.” Ste way tsigon Ub at longan.