Ub 3 - Fanawbuid tagsibaliwas Fakayabian

Ub Naringang

¹ Nu glugo wan, Ub nalong at mauri sabaliwa at fangasalug fag menit.

² Kanya nalong te,

³ “Kauri au ku fangasalug fag menit.

⁴ Ginanya nangus fag menit madulum way gugat. Nangus tagsis banwa fag Dius wa namatang ya kafag menit.

⁵ Ginanya nangus madulum way gugat ay mannga linyabu gfarum way gugat menit, ay fagmadulumun nangus nafarum wan menit.

⁶ Ay ku fangasalug nangus fag yabi wa ntap sa tibak yabi, ay wa yangay nangus anriruk ya sas fagrirukan ngay magdanun ay ngay banwa.

⁷ Kwa nangus ansalug ya ginanya fag yabi, satu ro ginanya we nauseganan ya.

⁸ Tagabara nangus fag ngay taw at mafulo Libyatan, nafauri wan kafag yabi.

⁹ Ay ginanya nangus gina gakamenitun wa nsure ya tagurabas ay wa nangus anyamag ya ginanya fag balabag.

¹⁰ Kauri au ku fangasalug fag menit aroro wa nafaragang nu kasalug au, ay satu ro kwa naidapan kata katsi.

¹¹ Wain ku fagyudun anbul gina au gduksun siginan ku mina at basad ungdan?

¹² Wain ku mina faginfanyuun ay fagnafasusuun yay angku?

¹³ Satu nu nbul kdi ginanya, katsi ro manabayan kway fia gfiangalay,

¹⁴ gasfuan ngay fun ay ngay tagfangguna at kinbul wan at nafawat ngay bale ayu daul gina gfunan, ay katsi at kinkiklas wan.

¹⁵ Satu ro manabayan kwan kata ngay funan at nafapnu sat ngay bale gintu ay sanbung salapi.

¹⁶ Masine nu kata kdi ngap ngay sisian at kinbul wan gina kasalug, ay e nafoli wan gina yay yud nalag yamag.

¹⁷ Ngay taw mauri at kinbul wan wa mafakamulun ya at mauri sis fagfolian, ay takalufuy fag ngay taw at kinbul wan, gfiangalay wan.

¹⁸ At natabanan fag ngay taw at kinbul wan gfiangalay yangay sanya, ay kanya fagayu wa gdungug ya ngay taw tagfaidapan anya fagayu gfafakamulun.

¹⁹ Ay sanya yangay ngay taw takadungug ay at yud kadungug. Ay ngay fagsuguan wa gafagsuguanan ya at ngay tagfayafun.

²⁰ Wain Dius at fagfonun yay gugat fagmayamagun ay leleg sa sangay taw at ke fagagwantanun ay tagidapan?

²¹ Kanya fagayu nu kaylat nangabul gtungud yay nu gyabulun ramraman, ay dewa katanya, kanya fagayu ya kabul.

²² Kanya fagayu guseganan nu nbul di ay nu e nanamoli di anya fagayu.

²³ Wain Dius at fagfonun yay fagmayamagun sas taw at yud saful at fakadasugan?

²⁴ Kwa kaylat ya gfangon aroro maksvn nu gidapan au gamatangan, at kaksvnan gwayway au gfandeng.

²⁵ Ay fagayu ku fakalimuun anfasludan wan sa angku.

²⁶ Kwe fagmanabayanun ya, ay kwa kagwanta ya. Kwa batang ya gfiangalay abat ngate gafanawa kway gugat.”