Ub 29 - Fanawbuid tagsibaliwas Fakayabian

Ub at Nabul fag ngay Famonun

¹ Ub gfataglayun garingang te,

² “Nu kafafoli kdi at kinlangfe fag ngay menit, kata ebi gina Dius gdiri angku,

³ ay gina yay gyamag ku dalan, kaduge au glao sisad madulum,

⁴ ay gina masine ku kayaunanan, Dius ku fagadgalangan fia, ay gfayu ku ngay kalongan.

⁵ Dius at mabalyanan gufud tua angku ebi, ay magamut tuami talamean.

⁶ Ku ngay baka nafon tua angku at susu bilug, ay siginan ku ngay tanum ulibu anke ngay langis au.

⁷ Nu nalao au sas sakbawan furuan daul gina ngay funan gkamatoan,

⁸ ngay baguama kadaydalan nu nalag angku, ay at ngay mafagtainan malindug laman gfababaun sa angku.

⁹ Anggan ngay funan gragangan way lang.

¹⁰ Ay at ke fanambagun fag ngay taw wa yangay garingang ya.

¹¹ Fagayu taw nu nalag angku gfanagsag gdungugan nu garingang au,

¹² aroro nagubuk au at yud e kwa fag ngay taw ay at yud e fagtainan, ay at yud e fagnangakbangan ya.

¹³ Ay ngay taw tagakabulun nafadante angku, ay ku nagubuk fag ngay fagbubayun galubadan guseganan.

¹⁴ Kabavn gfakamulun au at matuyan ay at masine, takata tagsi ku bilug fag lanbung at masine.

¹⁵ Ngay taw at yud glag, au wan tuga at mata, ay at yud malao fag ngay taw, au wan tuga at darafa.

¹⁶ Ay at yud e kwa fag ngay taw, au wan tuga at mama, ay dewa ngay taw ku fagyudun toglag, nainsaful ktua at ngay mamalong.

¹⁷ Nafayud au e fagmabalyananun at mauri fag ngay taw, ay nafalangfe au at nafaidapan.

¹⁸ Nu glong au, ngaduge tua ban nu gleleg au, ay kabul kban mafufuama magamut ku ngay kalongan,

¹⁹ Aroro ebi kata ktua sik fun kayu at ke ngay lalid tagdasug sas mamam, ay galay yabi at ngay don tagadamugan tua.

²⁰ Kabavn mabitsug ktua, ay ngay taw gseg gugat angku.

²¹ Ay kaduge au gfoyung, ngay taw gragangan tua ay gdungugan tua fia masine.

²² Dewa au ntabu garingang, kanya fagayu gragangan way gugat, aroro kanya fagayu naylat wan ku ngay longan.

²³ Kanya fagayu kaylat ku ngay longan, kata nu kaylat arak nu kadasug.

²⁴ Nu naase au kafag ngay taw at amatanganan kabitsug, aroro ku kamatan at kamasinean gfae fagusegananun anya fagayu.

²⁵ Kata au sik fun tagfoyung anya nu setain at fakamulun at masine. Gfunan au kata sik fun daul at magamut sit ngay tagfawayan, ay gfasun au fagayu takabalu.