Ub 28 - Fanawbuid tagsibaliwas Fakayabian

Ub Garingang sabaliwas Fagsafulun ay nu Kayamag

¹ E ngay fakalian at ke ngay sanbung salapi, ay e ngay famadalusan gintu.

² Nu gbul sanbung siginans lutuk, ay tansu siginan at nalanang fag gang.

³ Ay kanya fag ngay taw gasalungan laman gyamag sat fakalian. Kanya gfanrvbvy sat ngabasad, gang at ke tansu sa tiba daga fag sulbung.

⁴ Ay naali at dalan sat fagnanrvbvyan fangawat salapi sas daga lutuk sabaliwa at yud e taw, ay sat yud e gdalan, kanya kadaga gulitan sa sik taguigan fag lubyang,

⁵ Siginans daga ngay fakonun, ay afuy glanang sas daga lutuk.

⁶ Sanya e ngay suglat mafanud fag ngay gang melo gladlaksiun, ay gintu masuglat sisad lukbu.

⁷ Ay dewa ngay manuk tungud ay bio wa yangay glag kanya fag dalan.

⁸ Anggan madot fag mela ya batang gsiad sanya, ay anggan idu talun ya batang glao sanya.

⁹ Ngay taw naali wan anggan at matugas fag gang tagsis daga buksul.

¹⁰ Kanya fagayu kali wan at dalan sas wa gang ay nalag fagayu nusnge wain fag gang at mafanud.

¹¹ Ay kanya fagayu nabaud liskung ay nabuba sasad mayamag at nalag fag ngay ramraman.

¹² Daginan fagsafulun ay fagmatogdungugun?

¹³ We taw nasaful te, daginan, ay we ste sdaga.

¹⁴ Ay wa yangay e sis fagngabasadan dagat.

¹⁵ Ay we mabangsi fagsafulun ay fagmamatanganun, dewa ginto ay salapi,

¹⁶ ay amafanud yap at mafasinean fag gintu tagsiginans talun Ufir, ay gtungud yap tua tagridrirukun ay melo gladlaksiun fag ngay gang.

¹⁷ Takatanya gtungud tua gintu ay at mafanud fag ngay fagagbilugun, ay nu mafanud gtungud tua nusnge wain fag famasine at fangawat gintu.

¹⁸ Kanya nu kabayad gtungud tua tagsisad dagat fag gang at mafanud ay taganyang, ay amafanud yap tua tagsis ale fag gang at mafanud.

¹⁹ We mafasud fagsafulun dewa ngay gang tagradraskaun tagsiginans talun Etiupya, ay dewa gintu wa yangay mafabayad.

²⁰ Nu katanya, daginan tua fagsafulun?

²¹ Fagayu tagste swa daga fag ngay awatan we nalag fagsafulun, ay wa yangay ansure sas manuk tungud.

²² Dewa sat kinfaurianan at talun ay sat kinbul at talun, kanya fagayu gfanlongan way lang at nadungug sanya baliwa.

²³ Dius saful dalan tagsanya, ay sia way lang tagsaful sanya fag buknga.

²⁴ Aroro kanya glag way tangayayu fag fungfung daga ay fagayu tagsis daga banwa.

²⁵ Ebi kanya gina nafagaras tagmara ay nainsaful arak at kayuan,

²⁶ kanya nafalganan wan nu inda ban nu ganting, ay nu inda ban lingsi ay limbad at fakatukan.

²⁷ Ginanya fag buknga, kanya nadama fagsafulun ay nainsaful at kamafanudan, ay kanya nafaskud ay naylat.

²⁸ Ay kanya nalong sa sangay taw te, ‘Takalimu tua Fun ay takayayu tua fagmauriun, katanya tua ke fagsafulun ay tagtogdungug.’ ”