Ub 27 - Fanawbuid tagsibaliwas Fakayabian

¹ Ub gfataglayun garingang te,

² “Gfatuyanan au sas tagleleg fag Dius at nafaidapan angku, nustua wa matuyan nu gfawabilugan sabaliwa angku.

³ Kaduge kban gleleg yay, ay kaduge ban Dius gfon angku engasan,

⁴ kwa ban glong at mauri ay kwa ban kamuag.

⁵ Kwa gfadiuganan ayu te, matuyan am ay gtuyan au te, dewa katsi ku leleg, kwe asalanan.

⁶ Gfabadbaboan au te, kabavn matuyan ktua ay mabayan tua gugat ku amatanganan.

⁷ Dius nangus gfaurianan ku ngay fawayan kata nu gfaurianan at yud matuyan fag ngay taw.

⁸ Aroro nataw ya ban sik taw at yud gtoglag Dius at fagsegun, gina ban Dius nabul at leleg?

⁹ Ay o nunda ro Dius gdungug kanya nu get gubuk, nu ndasug sa anya fagidapun.

¹⁰ O ay guseganan tua ro sat mabalyanan fag Dius? O ay kayu ro buknga guro anya?

¹¹ Gfoyung au ayu sabaliwas Dius at fagmabalyananun ay glong au sa ayu at ngay balyawvtan.

¹² Dewa katanya, saful oma am tuy fagayu, ay wain fakatanyaun yay ay ngay aringang sa angku, at yud way e fanambagun?

¹³ Katatuy ban Dius at fagfadasugun sa sangay taw at mauri ay tagfangadotama.

¹⁴ Nusnga seyu man ban at ngay sisian, tuy ban fagayu umbul sas fagawayanan, ay tiba umbul sas fanlunus.

¹⁵ Ay at sawad ban umbul sas fakasaitun, ay fagayu ban nu nbul wan, we kabalu ya nusdi at ngay fagbubayun.

¹⁶ At mauri fag taw dewa nafungsu ngayuk salapi ay dewa ngayu at lanbung,

¹⁷ bunwa ban sia at nangagbilug, nu bunway ngay taw tua at matuyan at nansulun at ngay lanbung, ay at yud e asalanan at nangagbilug at ngay salapi.

¹⁸ Ay at nafalindug fag bale karasras way kata fansifig salanting, ay kata way sik tagulit gamasun at bale famoy.

¹⁹ Kanya gtiug way fia gfanagsag at ramraman, ay nu kafulo wan, at ramraman nalyam wan.

²⁰ Ay kadasug sa anya fakalimuun, kata lugwak nu nadalan anya gina mayabi.

²¹ Tagmara tagsiginans fakamenitan nabuba anya, ay nafalin anya siginan at fagbanwanan.

²² Gina gurungan glagyu, tagmara guyup gugat anya,

²³ kata nu gtiu gfalingun anya, ay ginasan gaiyan anya siginan at fagbanwanan.