Ub 22 - Fanawbuid tagsibaliwas Fakayabian

Elifas Naringang

¹ Sanya ginan, Elifas tagsiginans Teman, nabalus te,

² “O e taw manga ke fagsafulun at magubuk Dius? Ay o nunda sik taw at mamatanganan e fanambagun sa anya?

³ O Dius guseganan nu matuyan tuo? O ay kanya guseganan nu ddi o e mamalong?

⁴ Dius gsalag ay gfauri emu, bunwa am fagfaningun anya,

⁵ nu bunway aroro maksvn wan am fagmauriun ay nu yud o gfaragang ya gfakamulun at mauri.

⁶ Nabul o am ngay faduksay at ngay lanbung laman at famaguna at famayad at bedan sa emu, ay nabul yangay o ngay taw at ngay lanbung, ay kanya fagayu lulas way lang.

⁷ Wo nafon mamam sa takadanum, ay wo yangay nafon fakonun sa takalunus.

⁸ Nagbilug o am fagmabitsugun ay am fagmabalyananun laman gfangago o lutuk.

⁹ Ngay fagbubayun dewa naet sa emu, wo nafon. Ay nafauri o anggan at yud e fagtainan ya.

¹⁰ Siginan takatanya am fakamulun, ngay sangdaw maligung emu, ay sik fanlimu ban kadasug masakit sa emu.

¹¹ Ay siginan yangay am nafakamulun takatanya, am fagyudun glag ya, ay am faginlubgubun wan sis lugwak.

¹² Dius nu gbanwan si tua tiba tungud fag banwa abat yap tua tiba tungud fag ngay galeme.

¹³ Nu katanya, nalong o te, ‘Dius wa saful ku fakamulun. Setain ro nu sumaful ay linyabu gligung way anya?

¹⁴ Linyabu gfarum Dius, nu katanya, kanya ro wa glag antam, kaduge kanya glao sis tungud banwa.’

¹⁵ O gfataglayun yay o gulit ngay taw dewa glugo wan nu gugali at mauri?

¹⁶ Kanya fagayu anbul wan sit yud kasakan fag buknga, kanya fagayu kata sik bale ke fagfatungkudan turuk, lugwak at nafalimus.

¹⁷ Kanya fagayu glong sat Mabalyanan fag Dius te, ‘Fabayani way lang emi. Nataw ro am fagmafakamulunun sa emi?’

¹⁸ Dewa katanya, Dius wan at nafapnu nusnge wain at masine sat mesa bale. Nu katanya, kwa kaylat at mauri fag ngay taw at fangatulun.

¹⁹ At matuyan fag ngay taw guseganan nu nalag te, at mauri fag ngay taw anfaurianan, kanya fagayu gfalingun kase,

²⁰ ay glong te, ‘Tam ngay fawayan anfaurianan wan ay at ngay ramraman nirug wan.’

²¹ Faningi Dius ay asadii sa anya, laman kanya gfon emu fagmabayanun.

²² Faningi at ngay suguan, ay fasii gugat am amatanganan at ngay longan.

²³ Nu kafoli tuo sas Dius, ay nu gfayayu tuo fagmauriun siginan ayu fag talanan, kanya gdog yay gfon sa emu fagmanabayanun kata ebi ginan.

²⁴ Lag o kesug am ngay ramraman; tuyani te, at kamafanudan kata way ngay lagnas ay gang sis liskung.

²⁵ Dius tua nangus am fakesugun fag ramraman, kata nu kesug o gintu ay salapi.

²⁶ Ay nu katanya tua, Dius gfae fagmanabayanun emu, ay di o kapla nangakbang anya.

²⁷ Darangini sa anya ay kanya dumungug emu, ay fafasludani tua am ngay fatuyanan sa anya.

²⁸ Nu katanya, nusnga setaw am fagnamakamulunun kafasludan tua ay kabavn am dalan mayamag tua.

²⁹ Ay sik taw nu kamomuy, darangini sas Dius te, fabitsugi anya, ay Dius ro ggubuk kafag taw.

³⁰ Ay anggan ke asalanan fag ngay taw nu nalag am ugali at matuyan, kanya ro umlangfe tua.”