Ub 21 - Fanawbuid tagsibaliwas Fakayabian

Ub Naringang

¹ Ay Ub nabalus te,

² “Dungugani fia angku, laman mafasun yangay am angku.

³ Kaduge au garingang, dungugani angku. Ay nu ntabu kwa ro garingang, falinguni wa angku nu kaylat wam.

⁴ Bunwa taw tagfaidapan angku nu bunway Dius tua. Katanya at malong at fagmunagudun way ku fangagwanta.

⁵ Lingamani angku, o wa ro am e fakaduloun? Ay taupi ay bibig.

⁶ Nu namatangan au sat ngay kindasug sa angku, gtadtaruyan au kalimu.

⁷ Wain at mauri fag ngay taw at faglelegun tua gugat ay kadanama ay nustua kabalyanan ya?

⁸ Kanya ngap fagayu nalag tua at ngay sisian ay at ngay fufu nu kagurang.

⁹ Ay kanya fagayu gbanwan tua manabayan ay we fakalimuun ya. Dius wa gfaurianan anya fagayu.

¹⁰ At ngay baka ngayu tua nu griangan, ay fagayu kagurang tua.

¹¹ Ngayu tua at ngay sisian, at kayuan kayu sik gaban tupa, ay kanya fagayu tagfalelegan at ngay afud bilug.

¹² Ay kabavn kanya fagayu gfangalubadan gasfuan nu gfawang fagfadkalinganun ay fagfawangun ke ngay bakyang, ay gfanagsag gdungugan nu e gtulali.

¹³ Kabavn, kanya fagayu manabayan ay kabul yangay manabayan.

¹⁴ Dewa katanya, kanya fagayu glong sas Dius te, ‘Fabayani wa emi. Wami kaylat am ngay balyawvtan.

¹⁵ Sinu o fag Dius at Mabalyanan em fagnamaningun, ay nataw ro am fanambagun nu nadarangin ami sa emu?’

¹⁶ Aroro at mafanud, kanya fagayu nu karamraman bunwa siginan at fagmakatuun, nu katanya, kwa kaylat at ngay fangatulun.

¹⁷ At mauri ngap fag ngay taw wa ngayu takabul. Dius di vtv kadotama laman gfadasug fagidapun sa anya.

¹⁸ Kanya di gaiyan anya fagayu, kata sik tagbaribudan fag tagmara nu gfalayug upa.

¹⁹ Glong am te, ‘Aroro siginan sik taw at asalanan, Dius gfaurianan kafag taw at ngay sisian.’ Dius nangus gfaurianan wan tagasalanan laman kafag taw sumaful te, e asalanan.

²⁰ Ay kanya nangus fagayu dumalan faurianan. Fabayani wan Dius nu gfadasug at fandotaman sa anya fagayu.

²¹ Ay kanya ban fagayu nu nbul wan, wa gamatangan ya sat mesa talnayan.

²² O e mafoyung fagsafulun sas Dius? Sia wan tagwabilug ngay awatan tagsis banwa.

²³ E ngay taw takabul gina maseganama ay gina manabayan ay gina e ngay ramraman,

²⁴ ay gina yay mabitsug at bilug.

²⁵ Ay e ngay taw yangay takabul sat maksvn fag fagidapun yud ya anke fagmanabayanun.

²⁶ Dewa katanya, kanya ban fagayu gsudan way nangafoli sas daga, ay ulud ban kon way at ngay bilug.

²⁷ Nasaful kwan nu setain ay ngay namatangan, ay nasaful kyangay nusnga setaw ay algan sa angku.

²⁸ Ginto am te, ‘Dada wan at maramraman fag taw at bale, ay dada wan at mauri fag ngay taw at fagbanwanan?’

²⁹ O nunda wam nainto sat ngay tagdalan, ay o nunda wam nadungugan ngay taw tagdalan sanya nu gfansulitan?

³⁰ O nunda glong te, ‘At mauri ban fag taw umlangfe gina Dius gfaurianan fag menit.’

³¹ We gsalag ya at mauri fag ngay taw ay we namasud ya anya.

³² Ay gina nanamoli anya, e gulit at fagfolian,

³³ daga nabul wan at bilug, ay ngayuk taw at nanamoli.

³⁴ Nu katanya, setain ro nu mafasun am angku siginan ay longan at yud e masuad? Fagayu ay nalong we mafanud!”