Ub 2 - Fanawbuid tagsibaliwas Fakayabian

Faduak Famaskud sas Ub

¹ Sik menit, Yawi at ngay tagbarita maful sit daga salubangan, ay sanya yangay Satanas, laman nandog nansalubang Yawi.

² Ay Yawi nainto sas Satanas te, “Daginan o?” Ay Satanas gbalus te, “Gfoyfolian au stae ay sas fagdaul daga.”

³ Ay Yawi gdog yay ginto sas Satanas te, “O nalag o ku fagsuguan Ub? Fagayu taw sas fagdaul daga we kaksvn anya, aroro at ugali masine tua ay matuyan, ay gfaning tua angku ay gsaruy fagmauriun. Kanya matuyan tua gugat sa angku dewa o nafabulun sa angku laman kaylat au nu gfaurianan o anya deyud e asalanan.”

⁴ Satanas nabalus te, “Sik taw guseganan tua dewa namin wan fagayu at fagagbilugun, nu ddi ro kanya anbul.

⁵ Ay nu nafaurianan long ro wo at bilug, matuyan kanya ro lumong wan sa emu at mauri.”

⁶ Ay Yawi nalong sas Satanas te, “Kin, namakamulun wo kata am fakaylatun sa anya, ay dewa katanya, lag gfabul.”

⁷ Ay Satanas nalo wan siginans Yawi at daga salubangan ay nafaidapan Ub siginan sik ngay famaktvk, siginan at darafa sitsigon at alfuyu.

⁸ Ay Ub nabul sik nagrufan tikung at fanggarit at ngay bangbang kaduge malunggung sisad dafug.

⁹ Ay at mangena nalong sa anya te, “O matuyan yay o gugat sam Dius? Longi wan sa anya at mauri, maro gfabul wan emu.”

¹⁰ Ay Ub gbalus te, “Am ngay longan kata way sik mauri fag mangena at ngay longan. O nunda ban at masine way lang fagayu tam fakaylatun siginans Dius, o ay nunda ban bunwa anggan tua fagidapun?” Ub dewa nadalan takatanya fagayu, kanya di nasalanan ay di nafayud Dius.

Ub at Fagadgalangan at Tulu

¹¹ Ub at fagadgalangan at tulu nadungug at kindasug sa anya. Kafag tulu at ngay ngayan te, Elifas sik taw Teman, ay Bildad sik taw Sua, ay Sufar sik taw Naama. Ay mangama tulu ansadi nansibo Ub laman namalag te, kabalu yangay, ay laman namasun anya.

¹² Ay siginans fakasurayan mangama tulu nu nalag Ub arvs wa natoglag, ay kafag tulu nawayway maksvn ay nagirat at mesa lanbung ay nafasat mesa alfuyu dafug laman gfalag te, kabalu.

¹³ Ay kanya fag mangama tulu namalunggung sisad lutuk magamut at fagadgalangan Ub kaduge fituk menit ay fituk yabi. Kadugenya mangama tulu wa naringang aroro nalag te, Ub maksvn nu gidapan.