Ub 19 - Fanawbuid tagsibaliwas Fakayabian

Ub Naringang

¹ Ay Ub gdog yay nabalus te,

² “Seduge tua ban nu gfaidapan am, ay gfauri angku siginan ay ngay longan?

³ Gfalingun am gugat angku, wam kapla ya say ngay nafauri angku.

⁴ Nu mafanud di te, e asalanan au, au wa ke fagidapun kanya.

⁵ Gamatangan am te, amatuyan yap am angku, ay gamatangan yangay am te, ku ngay fagidapun tagfatuyan te, e asalanan au.

⁶ Asafuli te, Dius wan at ke fakamulun sa angku takatatuy. Kanya wan at nafoli ngay sangdaw si ku ligung.

⁷ Dewa au guro get gubuk we gbalus ya angku. Naet koma fagmasineun ay we nafon angku.

⁸ Dius nabalabag ku dalan, ay nafadasug sik dulum laman kwa nanlao sanya.

⁹ Kanya nafamin wan ku ramraman anggan ku fagmasineun.

¹⁰ Kanya nafaidapan angku ay arvs anbul kwan. Ay kwe fagsegun ya, kata sik kayu at kin-gunut wan.

¹¹ Kanya maksvn nu kadotama angku, sak nalong te, at fawayan kway.

¹² Kanya kata nu namadasug sa angku sik ngay tagfawayan laman namawayan angku, ay kanya fagayu gligung ku bale.

¹³ Kanya nafayayu siginan angku ku ngay kalongan, anggan ku fagtoglagun fag ngay taw anyayu yangay siginan angku.

¹⁴ Ku ngay kaiban we munakbang ya si angku. Anggan ku ngay fagadgalangan wa gamatang ya angku.

¹⁵ Ku ngay betaw ay anggan ku fagsuguan fag ngay mangena wa toglag ya angku, ay nu glag angku kata kway lang tagsiginan tibak talun fag taw.

¹⁶ Nu nauro au ku fagsuguan, wa gdungugan ya angku, dewa au gyafakamatoanun anya.

¹⁷ Ku mangena kabasung way ku engasan, ay ku ngay faduksay mangama kasuya angku.

¹⁸ Ay anggan ngay sisian ayu sirut gfalingun wa angku ay kanya fagayu nu nalag angku kadkasean.

¹⁹ Fagayu ku ngay fagadgalangan at munakbang si angku nkuri wan angku, ay anggan ku talnayan nyayu yangay angku.

²⁰ Maksvn wan nu maniwang au ay arvs gakabulun kwan.

²¹ Ku ngay fagadgalangan, afanyui yap angku, aroro Dius gfaidapan angku.

²² Wain ay fagfalingunun angku kata Dius nu gfalingun angku? O nunda nu gamatangan am, ya nsak ku nainkidapanan?

²³ Ku ngay nalong nangus anriruk sas fagrirukan fag fafil.

²⁴ Ay mannga anriruk sas gang laman ban kabavn sanya tua gugat.

²⁵ Dewa katanya, nasaful kwa te, ku tagfalangfe gleleg tua, ay abandi ban kanya umdasug stie sdaga.

²⁶ Dewa ban ku bilug andan wan, gseg kwa ban te, lumag au Dius.

²⁷ Lumag kwa ban fia anya, ay kaylat kwa daul gyalagun anya.

²⁸ Nu gfataglayun wam gfalingun angku te, gidapan kwan aroro sa ku asalanan,

²⁹ anud Dius ban at faurianan umdasug sa ayu. Kanya gfaurianan wa fia ayu aroro maksvn nu kauri ayu. Ay ginanya ban, sumaful am te, Dius gfaurianan ayu.”