Ub 18 - Fanawbuid tagsibaliwas Fakayabian

Bildad Naringang

¹ Nu ntabu katanya, Bildad tagsiginans Sua nabalus anya te,

² “Ub, seduge tua ban nu garingang o takatanya? Am aringang at matuyani tua, ay gfakamatoan romi emu.

³ O nu gdama o emi kata waymi ngayu sik ngay mangilafang, ay o gamatangan o te, sik ngay yud e fagsafulun waymi?

⁴ Siginan am dotama nafauri o am sadili, o nunda Dius nanfabayan fagdaul daga laman sa emu? O ay namalin ngay gang siginan at mesa fagmatungkudan?

⁵ At mauri fag ngay taw umbul. Kanya fagayu kata way sik salung tagakarabungun.

⁶ Tagsi anya fagmadulumun wan, aroro at salung anyungu wan.

⁷ Ebi kanya e fagmaksvnun oma, dewa katanya, katsi nalyam wan, ay at nafauri anya at sadili yay algan.

⁸ Kanya yay at nalao sas sangdaw ay nafaiktan at sadili.

⁹ Ay at ngay darafa wa maalfas ya.

¹⁰ Ay e nafae sik sangdaw sit dalan ay nafaut lutuk.

¹¹ Ay si wat ligung fagayu at malimu, ay nusnga nday nu glao, kata nu e gfafalo anya.

¹² Ay aroro kalunus wan, kanya garimanan wa ayu sirut kamomuy, ay fagmauriun mafalganan wan laman namabul anya.

¹³ Ay takamabul fag bangbang gfamin at balat, ay at take ay at darafa kadan wan.

¹⁴ E nafalelegan wan anya siginan at fagsarirungan fag bale, ay nataban anya sat malimu fag fun.

¹⁵ At mauri fag ngay taw at fagbanwanan ankiklas wan, ay umkirug sa tagigang fag afuy.

¹⁶ Ay umkata sik fun kayu at ngay lalid at kinyango wan, ay at ngay sanga kinyango wan.

¹⁷ Fagayu tagste swa daga kalyam wan anya, ay wa ban gamatang ya anya.

¹⁸ E gaiyan wa anya siginan at mayamag fag talun ay e nantaban wa anya sas fagfolian sat madulum fag talun.

¹⁹ Kanya wa nke sisian ya ay wa nke fufu, ay fagayu at kalongan anbul wan.

²⁰ Dewa ndaginan fag taw umdulo ay umlimu sat kindasug sa anya.

²¹ Ay glong te, ‘Kata kanya at kumdasug sat mauri fag taw ay at yud gtoglag Dius.’ ”