Ub 17 - Fanawbuid tagsibaliwas Fakayabian

¹ Gakabulun kwan, ku engasan gakafusun wan. Fagfolian mafalganan wan laman sa angku.

² Ngayuk takamalingun maligung angku; ay namatang au fagayu nu gfalingun angku.

³ Dius, gubuki angku. O way lang at mafagubuk angku.

⁴ Nafasaysalagan o ku ngay fagadgalangan at ngay amatanganan laman wa gdungugan. Nu katanya lag kaylat at ngay fantabugan nu gbabo angku.

⁵ Kanya fagayu kata sik taw tagdaya at fagadgalangan laman umke salapi, ay siginan takatanya at ngay fakamulun fagsigadan at ngay sisian nu gidapan.

⁶ Dius wa nasalag ngay taw nu gfalingun angku.

⁷ Maksvn nu kabalu au ay nu gfandama au andulum. Ay anniwang au ay arvs kayangfis kway lang sik aninu.

⁸ At masine fag ngay taw kadulo at kindasug sa angku. Kanya fagayu gamatangan te, mauri au ay kwa gtoglag Dius.

⁹ At matuyan fag ngay taw gugali tua gugat at masine, ay at yud e asalanan fag taw umkaksvn.

¹⁰ Aroro glong au sanya fagayu te, sayginan ya kanya fagayu nu ginsaful angku. Ay gtuyan au te, nusdi sadi si anya fagayu we gtogdungug.

¹¹ Munakbang wan ku ngay menit nu katabu. We masuad ya ku ngay algan ay ku fakaylatun.

¹² Glong am te, yabi nangus menit yakman, ay dulum nangus umsik fagmayamagun.

¹³ E fagsegun kyay te, namanwan kban sat kinbul at talun ay kaylat kwa grafad ku igyan sit madulum fag talun.

¹⁴ Gtuyan au te, fagfolian, kanya ku mama, ay ngay ulud, kanya ku mina ay ku faduksay mangena.

¹⁵ O e fagsegun kyay manga? Sinu at malong te, e fagsegun kyay?

¹⁶ Ay galo wa angku sas fagfolian ku fagsegun ay gadgaloan wami sas fagfolian.”